Ora bo tende ku “E fin ta serka!,” kiko ta bini na bo mente? Bo ta pensa ku Hesus ta bai shelu ku tur bon hende i manda tur mal hende fièrnu? Òf bo ta kere ku e fin simplemente ke men ora bo muri? Ora algun hende pensa riba e preguntanan akí, nan ta bira masha preokupá; otronan no ta wòri mes i tin hende asta ta hasi mofa di nan.

Beibel ta bisa na Mateo 24:14 ku “e fin lo yega.” E suseso akí ta ser yamá tambe “e gran dia di Dios” i “Armagedon.” (Revelashon 16:14, 16) Ta bèrdat ku tin hopi konfushon den e religionnan tokante kiko e fin ta. I hopi hende ta mir’é komo algu straño òf ku sierto pesimismo. Sinembargo, Beibel mes ta splika bon kla kiko e fin ta i kiko e no ta, i e ta yuda nos mira si e fin ta serka òf nò. Mas importante ainda, e ta siña nos kon pa sobrebibí e fin! Pero promé, laga nos klarifiká algun idea robes tokante e fin i definí kiko e ta realmente. Pues, segun Beibel, kiko “e fin” ta nifiká?

1. E FIN TA UN KATAKLISMO DEN KUA TERA TA KABA NA KANDELA.

   Beibel ta bisa bon kla ku “[Dios] a establesé tera riba su fundeshinan, pa asina esei no kita for di su lugá nunka mas.” (Salmo 104:5) E teksto akí ta sigurá nos ku Dios lo no destruí tera i hamas lo lag’é kaba na nada!—Eklesiástes 1:4; Isaías 45:18.

2. E FIN LO NO YEGA NUNKA.

   Al kontrario, Beibel ta bisa ku Dios a pone un fecha kaba pa e fin. Marko 13:32 i 33 ta bisa: “Pa loke ta e dia ei òf e ora, ningun hende no sa, ni e angelnan den shelu ni e Yu, sino e Tata so. Keda alerta, keda lantá, pasobra boso no sa ki ora e tempu stipulá ta.” Klaramente anto, Dios (“e Tata”) a “stipulá” e dia i ora eksakto pa e fin yega.

3. E FIN LO SER KOUSÁ PA HENDE ÒF METEORIT KU TA BIN DAL DEN TERA.

   Beibel no ta apoyá e ideanan ei. Kiko sí lo kousa e fin anto? Revelashon 19:11 ta bisa: “Mi a mira shelu habri, i ata un kabai blanku. I esun sintá riba dje yama Fiel i Berdadero.” I versíkulo 19 ta sigui bisa: “Mi a mira e bestia salbahe i e reinan di tera i nan ehérsitonan ku a bini huntu pa bringa kontra esun sintá riba e kabai i kontra su ehérsito.” (Revelashon 19:11-21) Maske gran parti di e palabranan akí ta simbóliko, nos por komprondé sí ku Dios lo manda un ehérsito di angel pa kaba ku su enemigunan.

1. FIN DI TUR GOBIÈRNU HUMANO.

   Beibel ta bisa: “E Dios di shelu lo lanta un reino [gobièrnu] ku nunka lo no wòrdu destruí, i e reino ei lo no pasa pa ningun otro pueblo; e lo garna i pone un fin na tur e reinonan akí, ma e  mes lo dura pa semper.” (Daniel 2:44) Manera punto 3 a trese padilanti, “e reinan di tera i nan ehérsitonan” ku ta “bini huntu pa bringa kontra esun sintá riba e kabai i kontra su ehérsito” lo ser destruí.—Revelashon 19:19.

2. FIN DI GUERA, VIOLENSIA I INHUSTISIA.

   Salmo 46:9 ta bisa: “[Dios] ta hasi gueranan stòp te na e fin di tera.” Na Proverbionan 2:21 i 22 tin pará skirbí: “E rektonan lo biba den e tera, i e perfektonan lo keda den dje; ma e malbadonan lo wòrdu kòrtá kitá for di tera, i e traidornan lo wòrdu ranká for di dje ku rais ku tur.” Anto e buki di Revelashon ta bisa: “Tende! Mi ta traha tur kos nobo.”—Revelashon 21:4, 5.

3. FIN DI RELIGION KU A DESEPSHONÁ DIOS I HENDE.

   Yeremías 5:31 ta bisa: “E profetanan ta profetisá ku engaño, i e saserdotenan ta goberná manera nan ta haña ta bon. . . . Ma kiko boso lo hasi na fin di esaki?” Anto Hesus a bisa: “Hopi hende lo bisa mi riba e dia ei: ‘Señor, Señor, nos no a profetisá den bo nòmber, saka demoño den bo nòmber i hasi hopi obra poderoso den bo nòmber?’ Sinembargo, lo mi bisa nan públikamente e ora ei: ‘Mi no konosé boso! Bai for di mi, hasidónan di maldat!’”—Mateo 7:21-23.

4. FIN DI HENDE KU TA STIMA MALDAT I KU TA APOYÁ INHUSTISIA.

   Hesukristu a bisa: “Awor bon, esaki ta e base pa huisio: E lus a bini na mundu; ma hende a stima skuridat en bes di lus, pasobra nan obranan tabata malu.” (Huan 3:19) Beibel ta konta di un destrukshon mundial ku a tuma lugá den e tempu di e hòmber fiel Noe. Beibel ta bisa: “E mundu di e tempu ei a ser destruí ora el a keda inundá ku awa. Pero pa medio di e mesun palabra, e shelu i tera ku ta eksistí awor ta reservá pa kandela i ta wardá pa e dia di huisio i di destrukshon di hende malbado.”—2 Pedro 3:5-7.

Tuma nota ku Beibel ta kompará e binidero “dia di huisio i di destrukshon” ku e destrukshon di “e mundu” den tempu di Noe. Kua mundu a ser destruí? Ta “hende malbado,” esta, e enemigunan di Dios “a ser destruí,” no nos planeta. Asina tambe, durante e binidero “dia di huisio” di Dios, lo e destruí tur hende ku skohe pa ta su enemigu. Pero e amigunan di Dios sí lo sobrebibí, meskos ku Noe i su famia.—Mateo 24:37-42.

Imaginá bo kon dushi lo ta pa biba riba e tera akí despues ku Dios kaba ku tur influensia malbado. Ta bisto anto ku e mensahe di Beibel tokante e fin ta un bon notisia! Pero kisas ainda bo ta puntra bo mes: ‘Beibel ta bisa na ki tempu e fin lo bini? E ta serka? Kon mi por sobrebibié?’