Kiko Ta Kuerpo Gobernante di Testigunan di Yehova?
Kuerpo Gobernante ta un grupo chikitu di kristian maduro ku ta duna guia na e Testigunan di Yehova mundialmente. Nan trabou ta konsistí prinsipalmente di dos kos:
Nan ta supervisá preparashon di instrukshon bíbliko pa nos publikashonnan, reunionnan i skol di Testigunan di Yehova.—Lukas 12:42.
Nan ta supervisá e trabou mundial di Testigunan di Yehova; nan ta dirigí e predikashon i ta supervisá uso di e fondonan ku ta risibí mediante donashon.
Kuerpo Gobernante ta sigui e ehèmpel ku “e apòstelnan i e ansianonan na Herúsalèm” a pone den promé siglo, kendenan a tuma desishon importante pa henter e kongregashon kristian. (Echonan 15:2) Meskos ku e hòmbernan fiel ei, e miembronan di Kuerpo Gobernante no ta lider di nos organisashon. Nan ta buska e guia ku Beibel ta duna i asina nan ta rekonosé ku Yehova Dios a nombra Hesukristu komo Kabes di e kongregashon.—1 Korintionan 11:3; Efesionan 5:23.
Ken ta e miembronan di Kuerpo Gobernante?
E miembronan di Kuerpo Gobernante ta Kenneth Cook, Jr., Samuel Herd, Geoffrey Jackson, Stephen Lett, Gerrit Lösch, Anthony Morris III, Mark Sanderson i David Splane. Nan ta sirbi na nos sede mundial na Warwick, New York, Merka.
Kon Kuerpo Gobernante ta organisá?
Kuerpo Gobernante a forma seis komité pa supervisá vários aspekto di nos trabounan, i kada miembro ta sirbi riba un òf mas di e komiténan akí.
Komité di Koordinadó: Nan ta supervisá e asuntunan legal i ta tuma medida ora tin desaster, ora situashon di emergensia presentá ku ta afektá e Testigunan di Yehova i ora tin insidente den kua e Testigunan di Yehova ta ser persiguí pa motibu di nan kreensianan.
Komité di Personal: Nan ta supervisá tur asuntu ku tin di haber ku e famia di Bètel.
Komité di Publikashon: Nan ta supervisá imprenta i mandamentu di literatura bíbliko, konstrukshon di Salòn di Reino, ofisina di tradukshon i sukursal.
Komité di Sirbishi: Nan ta koordiná e trabou di predikashon di “e bon notisia di e Reino.”—Mateo 24:14.
Komité di Siñansa: Nan ta sòru pa preparashon di e instrukshonnan ku ta duna na e reunionnan, e skolnan i e programanan di oudio i vidio.
Komité di Redakshon: Nan ta prepará kontenido di e publikashonnan bíbliko i informashon ku ta pone riba nos website i supervisá e trabou di tradukshon.
Fuera di e trabounan ku e miembronan di Kuerpo Gobernante ta hasi den e komiténan akí, nan ta reuní tur siman pa papia tokante e nesesidatnan di e organisashon. Durante e reunionnan akí, e miembronan ta analisá loke Beibel ta siña i nan ta laga spiritu santu di Dios guia nan. Semper nan ta purba di yega na desishon unánime durante nan reunionnan.—Echonan 15:25.
Ken ta e ayudantenan di Kuerpo Gobernante?
E ayudantenan di Kuerpo Gobernante ta kristian konfiabel ku ta asistí e komiténan di Kuerpo Gobernante. Nan tin e kapasidat i eksperensia nesesario pa hasi e trabounan ku e komité ku nan ta asigná na dje ta supervisá. (1 Korintionan 4:2) E ayudantenan akí ta asistí tur siman na e reunion di e komité ku nan ta forma parti di dje. Aunke e ayudantenan no ta tuma e desishonnan, nan ta duna konseho i informashon balioso na e komité. Ademas, nan ta implementá e desishon ku e komité a tuma i ta keda vigilá e resultadonan i progreso di e desishonnan ku a tuma. Fuera di e tareanan ei, Kuerpo Gobernante por asigná nan pa bishitá e rumannan na vários parti di mundu òf pa duna diskurso na evento spesial, manera na e reunionnan anual òf e graduashonnan di Gálad.
Komité |
Nòmber |
---|---|
Komité di Koordinadó |
|
Komité di Personal |
|
Komité di Publikashon |
|
Komité di Sirbishi |
|
Komité di Siñansa |
|
Komité di Redakshon |
|