A DIOS a dilu er a rechad er a Israel el kmo: “Ng diak le bor ngii a re mechebuul er a delongeliu.” Tia el Llach a mileketmokl me bo el omekerreu er a remechebuul e dirrek el ngubeteterir er a belsir. (Duteronomi 15:1-4, 7-10) Me a Jehovah a tilbir el kmo ngmo omekngeltengat er tir a uchul me ngmle kirel el diak a remechebuul er a delongelir a rechad er a Israel. Me nguaisei, te mo mukngeltengat a lsekum te oltirakl a llechul a Jehovah, engdi tir a dimlak.

Tiang a diak el belkul a kmo, a remechebuul a delebeakl e a remerau a ngeltengat er a Dios. A rebetok el blak a rengrir el mesiungel a Dios er a irechar a mle mechebuul. A profet el Amos a mle klekerengel a sib e chad er a omeridm el rodech. (Amos 1:1; 7:14) Sel taem er a profet el Elias, e ngmla er ngii a bosech er a beluu er a Israel, me ngmle kirel el olengit a ngeso er a chebuul el mellakl el dil, el uleak a mengasireng el rolel e a merikengko me a cheluch er ngii a di millemolem el ngar er ngii er a taem er a bosech. Me alta e tir el terung a dimlak bo el merau, engdi a Jehovah a milsterir aike el ousbech.​—1 King 17:8-16.

A tekoi el mo duubech a sebechel el chobulii a chad, el ua accident me a secher, el ngii a sebechel el choitechetur a chad me ngmo diak el sebechel el oureor. Me a kodall a sebechel el mo uchul e a chad a oridii a bechil me a rengalek a mo diak a demerir me a rederrir. Me a choua aika el blekeradel a diak el olechotel a kmo ngdellebeakl el mla er a Dios. Sel cheldecheduch el kirel a Naomi me a Ruth a olechotel a ungilreng er a Jehovah sel lomekerreu er tirke el ousbech a ngeso. Alta e a Naomi me a Ruth a urrideterir a rebecherir, engdi a Jehovah a ulemekngeltengat er tir e milsterir aike el ousbech.​—Ruth 1:1-6; 2:2-12; 4:13-17.

Me ngbleketakl el kmo a chelebuul a diak el dellebeakl el mla er a Dios. Tirke el blak a rengrir el mo er a Jehovah a sebechir el mo oba ulterekokl el reng er a tekingel a King el David el kmo: “Ngak a dikea kbuik ele kchudelal chad, ngdi kmal dirkak kisa tal ungil chad el mechoit er a RUBAK, ma lechub e a re ngelekel di lolengetngit a kall.”​—Psalm 37:25.

[Siasing er a 7 el llel]

Alta e a Naomi me a Ruth a mle chebuul engdi a Dios a mle betik a rengul e ulemekngeltengat er tir