Waut wie en disen Artikjel seenen woaren

•  Waut es dän Pape siene Veauntwuatunk?

•  Waut es aun eenen Voda besonda?

•  Vodasch un Dajchta

•  Rot fa Vodasch

•   Ea jun Kjint jebuaren es. Waut von Ehemaun du nu best, wiest, waut vonne Pape du lota woascht sennen. Daut Buak Do Fathers Matter? sajcht:

   “Wan een Voda siene Fru halpt, waut schwanga es, dan woat hee uk lota, wan daut Bäbe ieescht jebuaren es, sikj mea met daut aufjäwen. Woo kaun hee siene Fru halpen? Biejlikj kaun hee Sachen enkjeepen fa daut Bäbe un uk met siene Fru toop no eenen Dokta foaren. Hee kaun uk daut kjliene Bäbe em Muttalief opp eenen Komputa seenen un hieren, woo daut Hoatje jeit.”

   James sajcht: “Ekj wull nich, daut miene Fru sikj soo feeld, daut see daut auleen must derchgonen aus see schwanga wia. Ekj proowd ar to halpen, soo goot aus ekj kunn. Wie deeden toop de Stow fa ons Bäbe reedmoaken. Daut wia eene sea scheene un besondre Tiet fa ons, aus wie proowden, aules reedtomoaken, ea ons Bäbe jebuaren wia.”

   Waut de Schreft sajcht: “Jie sellen nich bloos no daut kjikjen, waut junt selfst intressieet, oba uk no daut, waut dän näakjsten intressieet” (Filippa 2:4, PB).

•   Wan jun Bäbe ieescht jebuaren es. Du kaust een goodet Veheltnis haben met jun Bäbe, wan du daut hoolen deist un met daut spälst. Doo uk methalpen, daut Bäbe to besorjen. Woo jun Kjint lota woat sennen, haft väl doamet todoonen, woo sea du aus eene Pape doamet bie best, wan daut oppwaust. Wan du proofst, een goodet Veheltnis met jun Kjint to haben, dan wiest daut, daut du jun Kjint väl räakjenst.

   Richard sajcht: “Späl met dien Kjint oppe Flua un sie sposich, soo aus Frauzen rieten. Sie nich too iernst, lach uk äwa die selfst. Hool em Denkj, daut jun Kjint daut ieeschte von junt aus Elren lieet, waut Leew es.”

   Waut de Schreft sajcht: “Kjinja sent een Säajen vom HARN; Kjinja sent een Jeschenkj von am” (Psalm 127:3, PB).

•   Wan jun Kjint oppwaust. Forscha haben rutjefungen, daut Kjinja, waut een goodet Veheltnis met äare Pape haben, enne School bäta veraunkomen. Dee haben uk weinja Trubbels met äare Jefeelen un doonen nich soo leicht Droggs brucken ooda waut schlajchtet doonen, soo aus biejlikj stälen. Nemm die Tiet fa jun Kjint, soo daut jie kjennen een goodet Veheltnis haben.

   Dennis sajcht: “Aus mien Sän von tus wajchtrock, säd hee to mie, hee woat sikj daut mieeschte no onse Unjahoolungen bangen, waut wie emma hauden, wan wie opp eene lange Reis wieren ooda aus wie Owentkost eeten. Eenje von onse wichtichste Unjahoolungen haud wie onverhofs, wan ekj mie daut nich wudd jedocht haben. Daut wia wäajen wie soo foaken toop wieren.”

   Waut de Schreft sajcht: “Siet väasechtich, daut jie derch dit Läwen gonen aus kluake Menschen un nich aus soone, dee nich weeten, waut to de Sach jehieet. Un nuzt de Tiet ut” (Efeesa 5:15-16, PB).

 Mieeschtens kjemmat de Voda sikj om daut tietelje un beschizt de Famielje. Un de Mutta kjemmat sikj dolla doarom, daut aule en de Famielje schaftich sent (5. Mose 1:31; Jesaja 49:15). Oba eenje Mol mott de Mame uk utschaufen un de Pape halpt ar dan uk tus. Forscha sajen, daut de Pape un Mame beid haben een besondret Poat en de Famielje. a

 Judith Wallerstein, waut äwa Famieljes studieet, vetalt, waut see selfst beläft haud: “Aus miene 12-joasche Dochta von eene Koa unjajefoaren wort, un aus see en de Ambulans wia, wull see, daut äare Pape metfua, wäajen see sikj sechra wia, daut hee ar wudd beschitzen kjennen. Oba lota em Hospitol wull see haben, daut ekj sull dän gaunzen Dach biesied äa Bad setten toom ar berujen.” b Daut wiest, daut de Mame un Pape beid wichtich sent.

 Daniel sajcht: “Wan doa eene Pape es, dan feelt de Famielje sikj sechra un beschizt. Oba wan de Mame daut auleen mott, es daut schwanda. Jeweenlich es daut de Mame, waut de Kjinja metfeelent toohorcht un Leew wiest. Beid schaufen fein toop.”

 Waut de Schreft sajcht: “Mien Kjint, horch doano waut dien Voda die jelieet haft, un vejat diene Mutta äare Wieed nich” (Spricha 1:8, PB).

 Jeweenlich deit een Voda siene Dochta lieren, woo aundre Mana ar behaundlen sellen. See kaun daut opp twee Wäaj lieren:

•   See beoobacht, woo de Pape met de Mame omjeit. Wan du aus Pape diene Fru Leew un Respakjt wiest, dan woat june Dochta seenen, no waut see wudd sellen kjikjen bie eenen Maun, wan see sikj lota befrieen well (1. Petrus 3:7).

•   See beoobacht, woo de Pape met ar omjeit. Wan du aus de Pape diene Dochta Respakjt wiest, dan lieescht du ar, daut see sikj selfst respakjten mott. Un see lieet, daut aundre Mana ar uk wudden sellen soo behaundlen.

   Oba wan eene Pape kjeen Mol tofräd es, met waut siene Dochta deit, dan woat see sikj wieetloos feelen. Un see woat veleicht emma doano kjikjen, daut aundre Mana met ar tofräd sent, uk wan dise Mana nich goodet em Senn haben.

   Wayne sajcht: “Wan eene Dochta daut weet, daut äare Pape ar leeft un ar unjastett, dan woat see nich soo leicht eenen Jung jleichen, waut nich wudd een gooda Ehemaun sennen.”