Wäa es de Antichrist, ooda Jäajenchrist?

AUFSPÄLEN

Waut de Schreft doatoo sajcht

De Antichrist es nich mau eena auleen ooda eene bestemde Grupp, wiels de Schreft sajcht, daut doa “väl Jäajenchristen” sent (1. Johanes 2:18, PB). Daut Wuat Jäajenchrist, ooda Antichrist, kjemt von een griechischet Wuat, waut “jäajen (ooda enne Städ) Christus” bediet. Un daut sent aul dee, waut soont doonen, waut hia aunjejäft es:

Dee aunerkjanen nich, daut Jesus de Christus (Messias) es ooda daut hee Gott sien Sän es (1. Johanes 2:22).
Dee stalen sikj jäajen dän Christus, waut Gott sien Jesaulwda es (Psalm 2:1-2; Lukas 11:23).
Dee jäwen väa, selfst de Christus to sennen (Matäus 24:24).
Dee vefoljen Christus siene Nofolja, un daut waut se siene Nofolja aundoonen, es fa Jesus soo, aus wan se am daut aundeeden (Aposteljeschicht 9:5).
Dee sajen, see sent Christen, oba doonen soont, waut schlajcht es ooda veleiden aundre (Matäus 7:22-23; 2. Korinta 11:13).

Jieda eena, waut soont deit, woat Jäajenchrist jenant. Oba de Schreft nant uk dee aula toop aus Grupp “Jäajenchrist” (2. Johanes 7, PB). De Jäajenchrist kjeem daut ieeschte en de Tiet von de Apostel verendach un es von dan aun noch emma jewast un haft väl prooft auntorechten. Un krakjt daut haft de Schreft uk verutjesajcht (1. Johanes 4:3).

Aun waut sent Jäajenchristen to kjanen?

Dee vebreeden faulsche Lieren, waut met Jesus to doonen haben (Matäus 24:9, 11). Biejlikj sent daut soone Menschen, waut de Dree-Eenichkjeit lieren ooda daut Jesus de hechsta Gott es. Dise Lieren sent krakjt daut Jäajendeel von Jesus siene Lieren, wiels hee säd: “De Voda es jrata aus ekj” (Johanes 14:28, PB).
Jäajenchristen nämen daut nich aun, waut Jesus doaräwa lieed, woo Gott sien Kjennichrikj schauft. Eenje Gloowesleidasch sajen biejlikj, daut Christus derch Menschen Rejierungen schaufen deit. Un daut es uk gaunz jäajen daut, waut Jesus säd: “Mien Kjennichrikj es nich von dise Welt” (Johanes 18:36, PB).
Dee sajen, daut Jesus äa Har es, oba dee komen daut nich no, waut hee lieed, biejlikj daut de goode Norecht vom Kjennichrikj jeprädicht saul (Matäus 28:19-20; Lukas 6:46; Aposteljeschicht 10:42).