Väle woat daut sea enoolent soonen Dach, wan daut räajnisch es un see tus sent un nuscht to doonen haben. Robert sajcht: “Aun soonen Dach huck ekj bloos tus un weet nich, waut ekj doonen saul.”

 Jeit die daut uk noch mol soo? Wan jo, dan woat die dis Artikjel halpen.

•  Goot to weeten

•  Waut du doonen kaust

•  Waut aundre Jugentliche sajen

•   Daut Fon halpt die nich emma

   Wan eena bloos dän Tiet äwa em Internet romspält, bloos daut de Tiet saul vegonen, dan woat eenem daut bloos noch dolla enoolent. Jeremy, waut 21 Joa es, sajcht: “Eena kjikjt en eentwajch em Fon nenn, oba eena haft eenen gaunz ladjen Kopp.”

   Elena, eene junge Mejal, jeit daut krakjt soo. See sajcht: “Daut Fon kaun eenem nich to aules halpen. Daut lenkjt eenem auf, oba no daut es eenem daut noch dolla enoolent.”

•   Daut licht aun diene Enstalunk

   Halpt daut, drock to sennen, daut eenem daut nich enoolent woat? Die mott daut uk scheen gonen, waut du deist. Karen weet noch, woo daut bie ar wia. See wia dän gaunzen Dach drock enne School, oba ar wort daut enoolent. See sajcht noch: “Eena mott dän Kopp doabie haben, daut eenem daut scheen jeit.”

 Hast du daut jewist? Wan du jenuach Tiet hast, es daut nich een Trubbel, oba eene Jeläajenheit, waut nieet to lieren. Wäajen du hast Tiet, die doa nentoloten.

 Proow waut nieet. Sieekj die niee Frind. Doo soont, waut die scheen jeit. Lia die waut nieet. Menschen, waut veschiednet intressieet to doonen, woat daut nich soo leicht enoolent un uk aundre woat daut nich enoolent, met dee toop to sennen.

 De Schreft sajcht: “Jeff die gaunz han, to daut waut du en diene Krauft doonen kaust” (Liera 9:10, PB).

 Melinda sajcht: “Ekj lia mie nu Kjneesisch un ekj doo jieda Dach emma wieda lieren. Nu weet ekj, waut ekj aul lang ea haud sult doonen. Ekj jleich daut, mie met waut drock to moaken. Wäajen dan strenj ekj mie aun un ekj hab lota daut Jefeel, daut ekj waut jedonen hab.”

 Nemm die waut väa un schauf doaropp. Wan du weetst, wuarom du waut deist, dan hast du uk mea Freid doabie. Mau rajcht de Schooloabeit woat die scheen gonen to doonen, wan du weetst, wuarom du daut deist.

 De Schreft sajcht: “De Mensch kaun nuscht bätret doonen, aus . . . sikj to siene Oabeit freien” (Liera 2:24, PB).

 Hannah sajcht: “Ekj wia en mien latstet Schooljoa met miene Schooloppgowen hinjenjebläwen. Doawäajen must ekj dan acht Stund dän Dach lieren. Daut hieet sikj veleicht soo, eenem wudd daut kjennen enoolent woaren, oba daut deed nich. Wäajen ekj wull aum Enj von mien latstet Schooljoa goode Prozent haben. Un doawäajen jeef mie daut Moot, mie auntostrenjen.”

 Wan du waut nich endren kaust, dan nemm daut soo aun, aus daut es. Mau rajcht bie soont, waut eenem sea scheen jeit to doonen, kaun soont mank sennen, waut eenem enoolent woat. Daut kaun sennen, daut mau rajcht Plons sikj kjennen endren, waut du met diene baste Frind toop hautst, un dan kaust du die auleen feelen. Enne Städ daut du dan ommootich un truarich woascht, proow leewa aun waut goodet to denkjen.

 De Schreft sajcht: “Een vejnieejdet Hoat freit sikj jieda Dach” (Spricha 15:15, PB).

 Ivy sajcht: “Eene Frindin rod mie too, ekj sull lieren miene Tiet, waut ekj auleen wia, goot to brucken, soo daut mie dee scheen jinkj. See säd uk, daut eena mott utjejlikjt sennen. Nich emma met Frind toop sennen, uk nich emma auleen. Daut wudd mie mien gaunzet Läwen toom gooden sennen.”