De tweeda Breef aun de Korinta 13:1-14
13 Dit es daut dredde Mol, daut ekj no junt kom. “Aules mott met twee ooda dree Zeijen kloa woaren.”
2 Wan ekj nu uk nich bie junt sie, es daut oba soo, aus wudd ekj toom tweede Mol bie junt sennen. Un ekj doo dee em Verut woarnen, waut ea jesindicht haben, un uk aul de Äwaje, daut ekj dee nich woa veschoonen, wan ekj woa wadakomen kjennen.
3 Daut es, wiels jie no Bewies sieekjen, aus Christus derch mie rät. Un waut hee mank junt deit, es nich schwak, oba hee wiest siene Krauft mank junt.
4 Dauts soo, hee wort aum Pol omjebrocht, aus hee schwak wia. Oba hee es aum Läwen wäajen Gott siene Krauft. Un wie sent uk schwak, soo aus hee wia, oba wie woaren met am toop läwen wäajen Gott siene Krauft, waut en junt wirkjt.
5 Unjasieekjt junt emma wada, aus jie em Gloowen sent. Prooft daut emma wada auf, woo daut met junt steit. Ooda woa jie daut nich en, daut Jesus Christus met junt veeent es? Wan nich, dan es Gott nich met junt tofräd.
6 Ekj hop werkjlich, daut jie daut enwoaren, daut Gott met ons tofräd es.
7 Wie bäden Gott doarom, daut jie nuscht Schlajchtet doonen muchten. Daut doo wie nich doaropp, daut et saul soo loten, daut Gott met ons tofräd es, oba daut jie daut doonen, waut goot es, wan daut uk sull soo loten, daut Gott met ons nich tofräd es.
8 Wie kjennen nuscht jäajen de Woarheit doonen, oba wie kjennen bloos daut doonen, waut fa de Woarheit es.
9 Wie freien ons secha jiedatsmol, wan wie schwak sent un jie stoakj sent. Un wie bäden doarom, daut jie trajchtjestalt woaren.
10 Dauts, wuarom ekj dit schriew, wan ekj nich doa sie. Soo woa ekj de Macht nich derwen hunjsch brucken, waut de Har mie jejäft haft, wan ekj ieescht doa sie, oba daut ekj dee brucken kaun toom junt oppbuen un nich dolrieten.
11 Tolatst Breeda, freit junt wieda, lot junt wieda trajchtstalen un treesten, siet junt em Denkjen eenich, läft en Fräd. Dan woat de Gott von Leew un Fräd bie junt sennen.
12 Bejreest junt unjarenaunda met eenen heiljen Kuss.
13 Aule Heilje bestalen junt to jreessen.
14 Ekj bäd doarom, daut dän Harn Jesus Christus sien grootet Metleet* un Gott siene Leew un de heilja Jeist, waut ons aula jejäft es, met junt es.
Footnooten
^ Ooda: “siene onvedeende Leeftolichkjeit”.
