Wie lieren von Gott derch siene Profeeten
En de Vegonenheit jeef Gott siene Profeeten wichtje Norechten fa de Menschen. Kjennen dise Norechten ons wiesen, woo wie kjennen Gott siene Säajnungen kjrieen? Jo. Well wie mol seenen, waut wie von dree true Profeeten lieren kjennen.
ABRAHAM
Gott moakt kjeenen Unjascheet un well aule Menschen säajnen.
Gott vespruak dän Profeet Abraham: “Derch die woaren aule Velkja oppe Ieed jesäajent” (1. Mose 12:3).
Waut lia wie doavon? Gott leeft ons sea un well aule Menschen säajnen, waut am jehorchen: Mana uk Frues un uk Kjinja.
MOSES
Gott es metliedent un säajent dee, waut sikj aunstrenjen, am kjanen to lieren.
De Gott, waut aule Macht haft, jeef dän Profeet Moses de Krauft, groote Wunda to doonen. Un doch bäd Moses: “Lot mie nu uk weeten, waut diene Wäaj sent, soo daut ekj weeten kaun, wäa du best un uk wieda diene Aunerkjanunk haben woa” (2. Mose 33:13). Gott freid sikj äwa daut, no waut Moses fruach un holp am, bäta to vestonen, woo hee haundeld un waut hee fa een Gott wia. Toom Biespel lieed Moses, daut “Gott, metliedent, [un] voll Jnod” wia (2. Mose 34:6-7).
Waut lia wie doavon? Gott well ons aula säajnen: Mana uk Frues un uk Kjinja. Doatoo mott wie ons aunstrenjen, am bäta kjanen to lieren. Hee sajcht en de Heilje Schreft, woo wie am aunbäden un deenen sellen un daut hee ons väl räakjent un ons säajnen well.
JESUS
Wie kjennen eewich von Gott jesäajent woaren, wan wie Jesus kjanen lieren un waut hee deed un lieed.
En Gott sien Wuat es väl äwa Jesus sien Läwen un siene Lieren jeschräwen. Gott jeef Jesus de Krauft, daut dee kunn väl Wunda doonen, soo aus de Blinje, Doowe un Lome heelen. Hee wuak mau rajcht Menschen vom Doot opp. Jesus wees doaderch, woo Gott aule Menschen lota noch mol säajnen wudd. Hee säd uk, waut jieda eena doatoo doonen must. Hee säd: “Daut eewje Läwen es dit: daut see die, dän eensich woaren Gott, un Jesus Christus, dän du jeschekjt hast, kjanen lieren” (Johanes 17:3).
Jesus wia metfeelent, leeftolich un frintlich. De Mana un Frues, de junge un elre kjeemen aula no am, wiels hee soo oppnäment wia un säd: “Lieet von mie, wiels ekj sie saunftmootich un von Hoaten deemootich, un jie woaren Ru finjen fa june Seelen” (Matäus 11:29). Jesus wia gaunz aundasch aus de Menschen to siene Tiet, waut de Frues schlajcht behaundlen deeden. Hee wia to dee leeftolich un behaundeld dee met Respakjt.
Waut lia wie doavon? Jesus wees de Menschen groote Leew, un hee haft ons een butajeweeneljet Väabilt jeloten, woo wie aundre behaundlen sellen.
JESUS ES NICH GOTT
De Heilje Schreft sajcht, “wie haben mau eenen Gott”, un Jesus Christus wia sien deemootja Bootschofta (1. Korinta 8:6). Jesus säd kloa un dietlich, daut Gott hecha wia aus hee un daut dee am no de Ieed jeschekjt haud (Johanes 11:41-42; 14:28). *
^ Varsch 17 En daut 4. Poat von daut Heft Eene goode Norecht von Gott jeit noch mea äwa Jesus Christus notoläsen. Daut es em Internet opp www.mr1310.com to haben.
