AUM Medwäakj, dän 24. Jaunewoa 2018, zemorjes freiden de Betelfamielje en de Stäts un en Kanada sikj, aus dee hieeden, daut Brooda Kenneth Cook jr. von dan aun toom Väastaunt von Jehova siene Zeijen jehieed.

Brooda Cook es en Pennsylvanien enne Stäts jebuaren un oppjewossen. Hee lieed de Woarheit derch eenen Schoolpoatna kjanen, jroz ea hee met de School foadich wia, un hee leet sikj dän 7. Juni 1980 deepen. Dän 1. Septamba 1982 funk hee aus Pionia met dän Voltietdeenst aun. Aus hee twee Joa Pionia jewast wia, wort hee enjelot em Betel to deenen un vom 12. Oktooba 1984 aun holp hee dan em Betel en Wallkill, New York, met.

En de näakjste 25 Joa haud Brooda Cook dan veschiedne Oppgowen en de Drekjarie un en de Betel-Offiz. Hee befried sikj aune 1996 met Jamie, un see deend dan met am toop em Betel en Wallkill. En Dezamba 2009 schekjten se Brooda un Sesta Cook no daut Betel en Patterson, New York, un doa schauft hee en de Aufdeelunk, waut Froagen von onse Läsa beauntwuat. Lota wieren Brooda un Sesta Cook wada een Stootje en Wallkill un worden dan en Aprell 2016 no daut Betel en Brooklyn, New York, jeschekjt. Fief Moonat lota trocken see no de Hauptoffiz en Warwick, New York. En Jaunewoa 2017 wort Brooda Cook dan een Helpa vom Schriewkommitee vom Väastaunt.