Ekj wia en Santo Domingo en de Dominikaunische Republikj jebuaren un ekj wia de latsta von vea Kjinja. Miene Elren hauden eene goode School jehaut un dee wullen, daut äare Kjinja mank goode Menschen oppwossen. Noch vea Joa ea ekj jebuaren wia, hauden miene Elren een poa Missionoaren jetroffen von dän mormonen Gloowen. Miene Elren wieren vewundat, woo renlich dee junge Mana wieren un woo fein dee sikj oppstalden. Miene Elren worden sikj dan boolt eenich, daut onse Famielje wudd eent von de ieeschte Famieljes opp dee Insel sennen, waut doa wudd bie de Mormonen biegonen (de Kjoakj von Jesus Christus von de Heilje en de latste Doag).

Aus ekj oppwoss, jleicht ekj daut emma, met de Menschen von dee Kjoakj toop to sennen un ekj jleicht daut uk, woo dee äwa de Famielje dochten un daut dee daut fa sea wichtich talden, een goodet Benämen to haben. Ekj wia brow, daut ekj kunn een Mormon sennen un ekj wull noch mol een Missionoa woaren von dee Kjoakj.

Aus ekj 18 Joa wia, trock wie no de Stäts, daut ekj doa kunn no eene goode School gonen. Soo bie een Joa lota kjeemen mien Onkel un miene Taunte no ons no Florida. Daut wieren Jehova siene Zeijen. Dee kroagden ons no eenen Kongress, wua von de Schreft jerät wort un ekj wia sea vewundat, daut jieda eena doa enne Schreft metkjikjt un sikj uk Sachen oppschreef. Dan schlemd ekj mie uk eene Bliesteft un een Papia un dan deed ekj dautselwje.

No dän Kongress säden miene Onkel un Taunte, daut wan ekj aulmols wull Missionoa woaren, dan kunnen dee mie halpen, een bät mea von de Schreft to lieren. Mie kjeem sikj daut no eene goode Iedee väa, wiels ekj haud bat dan väl mea von daut Mormonen-Buak jelieet aus von de Bibel.

Wan wie ons äwa Fon von de Schreft unjahilden, dan rooden mien Onkel un miene Taunte mie emma too, daut ekj daut sull met de Schreft vejlikjen, waut ekj jleewd. Dee wullen haben, ekj sull mie selfst secha moaken, waut de Woarheit wia.

Doa wia soo väl von dän mormonen Gloowen, waut ekj haud aunjenomen, oba nich werkjlich jewist haud, waut de Schreft doavon säd. Miene Taunte schekjt mie een Erwachet! von dän 8. Nowamba 1995, waut von Jehova siene Zeijen rutjejäft woat. Doa wieren waut Artikjels bennen, waut von dän mormonen Gloowen räden. Ekj kunn daut nich jleewen, daut doa soo väl mormonen Lieren wieren, wua ekj nuscht von wist. Un daut brocht mie bat doa, daut ekj mie mol de Mormonen äare Websied unjastunt toom seenen, aus daut opp iernst soo wia, waut daut en daut Erwachet! säd. Un daut wia werkjlich soo. Un noch dietelja wort mie daut, aus ekj de Museums en Utah besocht, waut von de Mormonen wieren.

Ekj docht emma, daut daut Mormonen-Buak un de Bibel tooppausten. Oba aus ekj dan ieescht mol opp iernst de Bibel läsd, dan wort ekj en, daut dee sikj wadaspruaken. Biejlikj en Hesekiel 18:4 (JHF) sajcht daut, daut de Seel stoawen kaun, oba daut Mormonen-Buak sajcht en Alma 42:9: “De Seel kaun nienich stoawen.”

Buta daut stieed mie daut uk noch, daut de Mormonen äa Launt emma soo huach hilden. Biejlikj woat de Mormonen jelieet, daut de Goaden Eden en de Stäts jewast wia en Jackson County, Missouri. Un de Leidasch von dee Kjoakj sajen, daut Gott de stätsche Rejierunk brucken woat toom lota äwa de gaunze Welt rejieren.

Wua mie daut dan stonen bleef wia: Woo es daut dan met aundre Lenda, soo aus daut Launt, wua ekj jebuaren wia? Eenen Dach räd ekj äwa Fon met eenen Maun, waut sikj utlieed toom Missionoa woaren bie de mormonen Kjoakj un dan fruach ekj dän mol no daut. Ekj fruach dän jlikjtoo, aus hee wudd jäajen eenen aundren Mormon kjamfen, wan doa Kjrich wia. Ekj kunn daut nich jleewen, aus dee säd, hee wudd. Ekj socht noch wieda no äwa de Lieren von mienen Gloowen un räd uk met de Leidasch von de mormonen Kjoakj. Dee säden, daut et nu ommäajlich wia, daut to weeten, wua ekj no fruach, oba lota wudd wie daut vestonen kjennen.

Ekj wia sea entwei äwa dit un dan docht ekj doa mol jescheit äwa no, wuarom ekj verheipts wull een Missionoa woaren von de Mormonen. Dan wort mie daut dietlich, daut ekj bloos wull Missionoa woaren, wäajens ekj aundre halpen wull un mie sach daut moakhauftich, soon Läwen to haben, aus de Missionoaren hauden. Oba von Gott wist ekj nich opp iernst väl. Wan ekj uk ieremol waut von de Schreft jeläst haud, docht ekj oba nich, daut et werkjlich wichtich wia. Ekj wist nuscht von, waut Gott sikj fa de Menschen ooda fa de Ieed väajenomen haud.

Aus ekj met Jehova siene Zeijen toop de Schreft studieed, dan lieed ekj veschiednet: Ekj lieed, daut Gott eenen Nomen haud un waut doa passieet, wan een Mensch stoaft un woo Gott Jesus brucken woat toom aules utfieren, waut hee vesproaken haft. Entlich lieed ekj mol, waut en dit besondre Buak bennen wia. Un ekj jleicht daut uk, aundre von de Woarheit to vetalen, waut ekj lieed. Ekj wist daut aul emma, daut et eenen Gott jeef, oba nu kunn ekj gaunz frie to dän räden, soo aus to mienen basten Frint. Ekj leet mie dän 12. Juli 2004 deepen bie Jehova siene Zeijen, un sas Moonat lota sad ekj mie dan gaunz fa dän Deenst en.

Fief Joa lank schauft ekj en de Hauptoffiz von Jehova siene Zeijen en Brooklyn, New York. Mie jinkj daut scheen, daut ekj doa halpen kunn, Biblen un biblische Bieekja moaken, waut millionende Menschen von aulawäajen oppe Ieed togood kjeemen. Un mie jeit daut uk noch emma scheen, wan ekj aundre kaun halpen, mea von Gott to lieren.