NI MENSENG en Niesil, January 24, 2018, tohnpeneinei en Pedel nan Wehin Amerika oh Canada perenki arail rong pakair tohrohr ehu me Brother Kenneth Cook, Jr. iangala Pwihn me Kin Apwalih Mwomwohdiso nan Sampah Pwon en Sounkadehdehn Siohwa kan.

Brother Cook ipwidi oh tikida nan Pennsylvania, Wehin Amerika. E sukuhlkihsang emen ienge tohnsukuhl duwen padahk mehlel mwohnte eh kesepwil sang pwihn kaeisek riau oh papidaisla nan June 7, 1980. E tepida doadoahngki pali laud en eh ahnsou ong papah Siohwa nin duwen pioneer men nan September 1, 1982. Mwurin eh pioneerki sounpar riau, e ale luhk en kohla Pedel oh tepida papah nan Pedel en Wallkill, New York, nan October 12, 1984.

Erein sounpar 25, Brother Cook ahneki soangsoangen pwukoa kan nan palien wiahda pwuhk oh nan Ohpis en Pedel. E pwoudikihda Jamie nan pahr 1996, oh Jamie iang ih papah nan Pedel en Wallkill. Nan December 2009, Brother oh Sister Cook keseula ni Watchtower Educational Center nan Patterson, New York, wasa me Brother Cook kin doadoahk nan palien ntingihda kisinlikou (Writing Correspondence Department). Nan April 2016, mwurin ara pwurala Wallkill erein ahnsou mwotomwot, Brother oh Sister Cook keseula Brooklyn, New York. Sounpwong limau mwuri, ira keseula ni poasen kaun me mi Warwick, New York. Nan January 2017, Brother Cook idihdida pwehn papah nin duwen sounsawas men ong Palien Nting en Pwihn me Kin Apwalih Mwomwohdiso nan Sampah Pwon.