KISAKIS laud ehu kin kamwakid kitail en kasalehda atail kalahngan. Sises ketin kasansalehda iren mehn kasukuhl wet mwurin eh ketin kamwahwihala ohl ehk me ahneki soumwahu laud ehu oh sohte mehkot kak kamwahwihirailla ni ahnsowo. Emen nanpwungen ohl ehk ko “ahpw pwurodo rehn Sises, ngihl laudida, kapikapinga Koht.” Sises eri mahsanih: “Kaidehk me ehk me mwakelekellahro? A ia me duwemeno?” (Luk 17:12-17) Dahme kitail kak sukuhlki? Ia uwen atail kak mwadangete manokehla wiewia kadek me meteikan kin wiahiong kitail!

Pweinen pweipwei sapahlo weksang kisakis teikan koaros. Nanpwungen kisakis koaros me kohdahr met iei kisakis me keieu laud. Eri, ia duwen omw pahn mwekidki dahme Koht ketin wiadahr pwehki kowe?

• Esehla Meno me ketikihda kisakiso. Aramas koaros sohte kak uhdahte alehdi mour soutuk pwehki pweinen pweipwei sapahlo. Ahpw, Sises ketin mahsanih nan eh kapakap ong Koht: “Iet wehwehn mour soutuk, aramas akan en eseikomwihla, me komwihte Koht mehlel, oh pil esehla Sises Krais me komw ketin poaronedohr.” (Sohn 17:3, NW) Ma emen ndaiong uhk me ohl emen doarehla omw mour ni ahnsou me ke kisin serihte, ke sou pahn men kalaudehla omw esehla duwen ohlo oh dahme kahrehda e doareiukala? Siohwa Koht me ketikihda kisakis en pweinen pweipwei  sapahlo ong doarepen mour sohte ketin kupwurki ken esehte ihs ih, ahpw ken pil ahneki nanpwungmwahu keren reh. Paipel kin kangoangehkin kitail: “Kumwail keido mpen Koht, oh e pahn ketin keiong mpamwail.”​—Seims 4:8.

• Pwosonla pweinen pweipwei sapahlo. “Mehmen me kin pwosonla Sapwellime Iehros, iei ih me kin ahneki mour soutuk.” (Sohn 3:36) Ia wehwehn en pwosonla? E kin wehwehki wiewia; en pwosonla pweinen pweipwei sapahlo kin anahne en mie wiewia. (Seims 2:17) Soangen wiewia dah? Ke kin ahneki kisakis ehu ihte ni ahnsou me ke kin nantihong oh alehdi. Eri ke anahne nantihong oh pwosonla pweinen pweipwei sapahlo. Ia duwen? Sukuhlki kupwuren Koht oh kapwaiada. * Kapakapkihong Koht mahkpen dipomw oh nsenmwakelekel. Likih Koht ni unsek me pweinen pweipwei sapahlo uhdahn pahn wahdo popohl, sohte keper, oh paiamwahu ni ahnsou kohkohdo ong koaros me kin pwosonla. Mepwukat pahn mihmi kohkohlahte!​—Ipru 11:1.

• Iang towehda Katamanpen pwoulahn Sises. Sises ketin wiahda mwekid kesempwal wet pwehn katamankihong kitail anahnepen pweinen pweipwei sapahlo. Me pid duwen kasarawien mwekid wet, Sises mahsanih: “Kumwail wia met ong ni katamanpei.” (Luk 22:19) Sounkadehdehn Siohwa kan pahn wia katamanpen pwoulahn Sises Niare, April 11, 2017, mwurin kihrlahn ketipin. Prokram wet pahn reireiki awa ehu, oh e pahn mie padahk ehu me pahn kawehwehda kesempwalpen pwoulahn Sises oh ia duwen eh pahn wahdo kapai kan met oh ni ahnsou kohkohdo. Sounpar nekiero kereniong aramas riedep nan sampah pwon iang towehda Katamano. Se perenki luke komwi en iang kiht kasalehda atail kalahnganki sapwellimen Koht kisakis me keieu laud.