Medewehla ia duwen koperment ehute nin sampah eh kak wia kamwahu ong aramas. Rahnwet aramas tohto kin lokolok pwehki re uhdahn semwehmwe, a meteikan uhdahn kepwehpwe. Ahpw koperment en sampah ehu me kin wehwehki anahn akan en aramas pahn kak tehk mwahu me koaros ale dahme re anahne. Ia duwe, ke leme aramas akan pahn kak wiahda soangen koperment ehu me duwehte met?​—Wadek Seremaia 10:23.

Erein poadopoad, koperment kan sohte kin pweida ni ahl tohto pwehn apwalih towe kan, ahpw keieu me semwehmwe kan. Ekei koperment kin lemei. (Eklesiasdes 4:1; 8:9) Ahpw Koht Wasa Lapalahpie ketin inoukihda me e pahn ketikihda koperment ehu me pahn wiliandi koperment teikan koaros. Kaun en koperment wet pahn uhdahn apwalih mwahu aramas akan.​—Wadek Aiseia 11:4; Daniel 2:44.

Siohwa Koht ketin pilada emen me warohng wia Kaun en sampah, me iei sapwellime Ohl, Sises. (Luk 1:31-33) Ni Sises eh ketiket sampah, e kin ketin nsenohki sewese aramas akan. Nin duwen Nanmwarki men, e pahn ketin kaminiminpene aramas en wehi koaros oh ketikihsang lokolok koaros.​—Wadek Melkahka 72:8, 12-14.

Ia duwe, aramas koaros pahn pwungki Sises en ketin wia arail Kaun? Soh. Ahpw Siohwa kin ketin kanengamah. (2 Piter 3:9) E ketikihong aramas akan ahnsou mwahu en pwungki Sises nin duwen arail Kaun. Ahnsou keren, Sises pahn ketikihsang aramas suwed nin sampah oh e pahn ketikihdo popohl oh meleilei nin sampah pwon.​—Wadek Maika 4:3, 4.