Arí. Jehovaj testigosnenqa, Biblia Jehovaj yuyaychasqan kasqanta yuyayku, may sumaj yachachinapaj kasqanta ima (2 Timoteo 3:​16). Ajinata yuyayku Ñaupa chantá Mosoj Testamentomantawan. Jehovaj testigosnintaj Ñaupa Testamentota Hebreopi Qhelqasqa nispa sutichayku. Mosoj Testamentotataj Griegopi qhelqasqa niyku.

 Apóstol Pabloqa Jehová yuyaychasqanman jina kayta nerqa: “Ñaupajta qhelqasqa kajqa yachachinawanchejpaj qhelqasqa karqa”, nispa (Romanos 15:4). Chayrayku Hebreopi Qhelqasqaspeqa may sumaj yachachiykuna kasqanta nisunman. Astawanpis sumaj yuyaychaykunata, unay tiempopi imaschus kasqanmanta ima willaykunata ima tarisunman.

•   Unay tiempopi imaschus kasqan. Hebreopi Qhelqasqaqa imaynatachus Dios Jallpʼanchejta ruwasqanta chantá imaynatachus runas juchasapasman tukusqanchejta sutʼinchan. Chay sutʼinchaykunataj yachachiwanchej maymantachus jamusqanchejta, imaraykuchus wañusqanchejta ima (Génesis 2:7, 17). Chantapis Hebreopi Qhelqasqaspi yachakullanchejtaj imaynatachus Dios ñaupa runasta yanapasqanta. Paykunaqa noqanchej jinallataj llakiykunapi rikukorqanku (Santiago 5:17).

•   Sumaj yuyaychaykuna. Hebreopi Qhelqasqaspeqa Proverbios chantá Eclesiastés libros kashanku, chaykunapitaj kunan tiemponchejpaj jina may sumaj yuyaychaykuna tiyan. Sutʼincharinapaj, niwanchej imaynatachus familianchejwan kusisqa kausakunata (Proverbios 15:17), imaynasmantachus maychus kajllata llankʼayta qhawanata (Proverbios 10:4; Eclesiastés 4:6) chantá imaynatachus jóvenes kashaspa kausayninchejta may sumajta apaykachanata (Eclesiastés 11:9–12:1).

 Chantapis mayta yachakusunman Moisespa Leyninmanta chantá Torá nisqamanta, Bibliapi ñaupa kaj phishqa librosninmantawan. Cristianosqa niña chay leykunata kasunanchejchu kajtinpis yuyaychaykunasnenqa mayta yanapawasunman familianchejwan kusisqas kausakunapaj (Levítico 19:18; Deuteronomio 6:5-7).