Salmos 55:1-23
Takichejpaj. Kay takiytaqa cuerdasniyoj tocanasta waqachispa takina. Maskil.* Davidpa takiynin.
55 Diosníy, mañakusqayta uyariway ari.+
Khuyarikunawaykita mañakusqaytaqa, ama mana uyarejmanqa tukuychu ari.*+
2 Diosníy, uyarillaway ari, yanaparillaway ari.+
Llakiywanqa ni imanakuyta atishanichu.+
Phutisqa kashani.
3 Enemigosneyqa ñakʼarichinawankuta nishanku.
Sajra runasqa mana khuyarispa ñakʼarichishawanku.
Paykunaqa sinchʼitapuni ñakʼarichishawanku.
Manchay phiñasqas noqapaj kashanku, maytapuni chejnikuwanku.+
4 Sonqoy nanawan.+
Wañuyta manchachikuni.+
5 Manchariytaj kharkatiytaj japʼiwan.
Kharkatishallaniña.
6 Kutin kutita nini: “Paloma jinallapis lijrasniyoj* kayman.
Maymanpis phawapuyman manaña llakikunaypaj.
7 Karuman phawapuyman.+
Chʼinnejpi tiyakamuyman.+ (Sélah).*
8 Sinchʼi wayramanta, sinchʼi paramantawan karuman phawapuyman.
Usqhay usqhayta phawapuyman pakakamunaypaj”, nispa.
9 Jehová Diosníy, chay sajra runaspa umankuta muyuchiy,+ yuyaychakusqankutapis pantachiy.*
Llajta ukhupeqa chʼajwasta, maqanakusta rikuni.
10 Chaytaqa tuta pʼunchay llajtaj perqa patasninpi rikuni.
Llajta ukhupeqa sajra ruwaykunalla tiyan, llakiy kausaylla tiyan.+
11 Chay llajta ukhupeqa ñakʼariylla tiyan.
Plazanpeqa runasta chʼaukiyashanku,* ñakʼarichishankutaj.+
12 Mana enemigoychu burlakuwan.+
Enemigoychus burlakuwanman chayqa, aguantakullayman.
Mana chejnikuwaj runachu contrayta oqharikushan.
Chejnikuwaj runachus contrayta oqharikunman chayqa, paymanta pakakuyman.
13 Qanqa amigoy kashaspa contrayta oqharikushanki, qanwan noqawan kikinkamalla kanchejpis.+
Qanqa amigoy kanki, sumajta rejsiyki.+
14 Qanwan noqawanqa sumajta kausakoj kanchej.
Diospa wasinmanpis ashkha runaswan khuska yaykurej kanchej.
15 Enemigosneyqa tukuchisqa kachunku.+
Sepulturapi* kausashaj pʼampasqa kachunku.
Paykunaqa sajra imasllata yuyaychakunku, sonqonkupeqa sajra imaslla tiyan.
16 Noqarí Diosman qhaparikusaj.
Jehová Diosmin salvawanqa.+
17 Chʼisiyayta, tutamanta, jinallataj chaupi pʼunchaytapis llakiywanqa ni imanakuyta atinichu, waqashallaniña.+
Diostajrí mañakusqayta uyarimuwan.+
18 Diosqa kacharichiwanqa contrayta maqanakojkunamanta.
Paylla kacharichiwanqa chay chhika enemigosniymanta.+
19 Diosqa kamachina tiyananpi unaymantapachaña tiyasqa kashan.+ (Sélah).
Paymin qhaparikusqayta uyarenqa, enemigosniypa contrantataj sayaykonqa.+
Chay runastaj Diosta mana manchachikusqankurayku+mana cambiayta munanqankuchu.
20 Amigoyqa amigosninpa contrallantataj maqanakoj sayaykorqa.+
Ni trato ruwasqaykutapis valecherqachu.+
21 Parlasqasnenqa mantequillamanta aswan llampʼu,+sonqonpirí maqanakuyllata yuyaychakun.
Parlasqasnenqa aceitemanta aswan lluskʼaman rijchʼakojtinpis,filochasqa espadas jina kanku.+
22 Tukuy llakiyniykita Jehová Diosman saqepuy.*+
Paytaj sayachisonqa.+
Payqa ni jaykʼaj saqenqachu cheqan runa urmananta.*+
23 Qantajrí Diosníy, chay sajra runastaqa sepulturaman chayachinki.+
Chay runasqa runa wañuchis kanku, llullastaj. Paykunaqa jóvenes wañonqanku.+
Noqarí Diosníy, qanpi atienekusaj.
Sutʼinchaykunasnin
^ Chayri “Amataj pakakuychu yanapata mañakusojteyqa”.
^ Lijra: waj lugarespi ninku ala.
^ Chayri “parlayninkutapis pejtuy”.
^ Chayri “engañashanku”.
^ Chayri “Llasa qʼepiykita Jehová Diosman jaywapuy”.
^ Chayri “chankaykachananta”.
