Unaymantapachaña Diospa Gobiernonta suyakushanchej. Pisi tiempomantawantaj chay Gobierno, allin kausayta apamonqa. Chaypitaj allinta, kusisqataj kausakusunchej. Biblia nin jinataj “allin kawsay” kay jallpʼapi kanqa (Salmo 72:7). Jinapis, ¿maykʼajtaj Diospa Gobiernon kay jallpʼapi kamachenqa? ¿Imaynatá kamachenqa? ¿Imaynatá chay Gobierno yanapawasun?

Bibliaqa nerqaña Diospa Gobiernon niraj chayamushajtin ima señaleschus kananta. Chay señalesmanta wakenqa, guerras, yarqhaykuna, onqoykuna, terremotos, sajra runas yapakusqan ima kanku (Mateo 24:3, 7, 12; Lucas 21:11; Apocalipsis 6:2-8).

Chantapis Biblia nillarqataj: ‘Qhepa pʼunchaykunapeqa, kausay may llakiy kanqa, maytataj sajrayanqa. Imaraykuchus runasqa kay jina kanqanku: paykunallata munakojkuna, qolqeta munakojkuna. Tatasninkuta mana kasojkuna, mana graciasta qoyta yachajkuna, wasanchajkuna, runa masinkuta mana munakojkuna, mana uj yuyayllaman chayayta munajkuna, qhasimanta tumpajkuna, munayninkuwan atipachikojkuna, manchay phiñas, allin kajta mana munakojkuna, runaykachajkuna, Diosta munakunankumanta nisqataj, paykunaj munaynillankuta maskʼajkuna’, nispa (2 Timoteo 3:1-4). Unaymantapachaña wakin runasqa ajina karqanku. Jinapis kay tiempopeqa ni jaykʼaj jina rikukushan.

Bibliaj nisqanqa 1914 watamantapacha juntʼakuyta qallarerqa. Wakin yachayniyoj runas, políticos, qhelqajkunapis, nillankutaj chay watamantapacha kausay astawan sajrayasqanta. Por ejemplo, Dinamarca suyumanta uj yachayniyoj runa Peter Munch nerqa: “1914 watapi guerra kasqanmantapacha, jallpʼapi kausayqa manaña ñaupajta jinachu. Imajtinchus allinta ñauparishaspa, [...] ujllata jallpʼapi suwas astawan miraykun, chejninakuy yapaykukun”, nispa.

Chaywanpis chay llakiykunaqa pisi tiempomantawan chinkanqaña. Imajtinchus kay tiempopi imaschus pasashasqanqa, sutʼita rikuchiwanchej Diospa Gobiernon kay jallpʼapi kamachiyta qallarinantaña. Jesusqa kay qhepa pʼunchaykunapi waj señal kanantawan nillarqataj. Pay nerqa: “Diospa Gobiernonmanta sumaj willaykunapis jallpʼantinpi willakonqa tukuy laya runas yachanankupaj, chaypachamá tukukoyqa jamonqa”, nispa (Mateo 24:14).

Chay sumaj willaykunatataj Jehovaj testigosnin runasman willashayku. Ujnin revistaykoqa ajina sutikun: Torremanta Qhawaj. Jehová Diospa Gobiernonmanta willashan. Chay revistataj parlashan imatachus Diospa Gobiernon kay jallpʼapaj, runaspaj ima ruwananmanta.

Chayta yachanapajqa tawa imasta qhawarina:

1. Diospa Gobiernonqa mana saqenqachu ni mayqen gobierno paypa gobiernonman ujchakunanta.

2. Kay jallpʼamanta gobiernosqa kamachillaytapuni munanqanku. Jinapis qhasillata Diospa Gobiernonman churanakonqanku (Salmo 2:2-9).

3. Diospa Gobiernonqa tukuy gobiernosta chinkachenqa, imajtinchus paykunaqa kamachillaytapuni munanqanku (Daniel 2:44; Apocalipsis 19:17-21). Paykunataqa uj maqanakupi chinkachenqa, chay maqanakuytataj Armagedón sutiwan rejsikun (Apocalipsis 16:14, 16).

4.   Diospa Gobiernonpa kamachiyninpi tiyakuyta munajkunaqa, mana Armagedón maqanakuypi wañonqankuchu, uj mosoj jallpʼapitaj tiyakonqanku. Bibliaqa nin “may chhika” runas kanankuta (Apocalipsis 7:9, 10, 13, 14).

Diospa Gobiernonpa kamachiyninpi kausakunapajqa, Diosta rejsinanchej tiyan. Uj kutipi Jesusqa Diosmanta mañakushaspa nerqa: “Kaymin wiñay kausayqa: Qan kʼata cheqa Diosta rejsisunanku, kachamusqayki Jesucristotapis”, nispa (Juan 17:3).

Diosta rejsiyqa ashkha imaspi yanapawanchej. Chaymanta iskayta qhawarina. Diosta rejsispaqa paypi sinchʼita creesun. Diospi creespataj paypa Gobiernon tumpamantawan kamachinanmanta mana iskayrayasunchu (Hebreos 11:1). Chantapis Diosta rejsiyqa yanapallawanchejtaj payta munakunapaj jinallataj runa masinchejtapis. Diosta munakuspataj payta tukuy sonqo kasukusun. Runa masinchejta munakuspataj, Jesuspa nisqanta kasukusun. Jesús nerqa: “Imastachus munankichej runas qankunapaj ruwanankuta, chayllatataj qankunapis paykunapaj ruwapuychej”, nispa (Lucas 6:31).

Diosqa uj sumaj tata jina allin kajtapuni noqanchejpaj munan. Payqa munan ‘cheqa kaj kausaypi’ sumajta kausakunanchejta (1 Timoteo 6:19). Kay tiempopeqa mana ajinatachu kausakushanchej. May chhika runasqa sapa día llakiyllapi rikukushanku. Diospa Gobiernonpi imaynachus kausay kananta yachanapajqa wakin imasta qhawarina.