“Qan uyarinki mañakususqankuta. Tukuy runas qanman jamunku” (Salmo 65:2).

Wakin runasqa ninku orakuspa allin sientekusqankuta. Jinapis mana creenkuchu pipis uyarishasqanta. Diosmanta mañakoyqa mana sonqollanchejtachu tiyaykuchin problemasniyoj kashajtinchej. Bibliaqa niwanchej Jehová * Diosqa ‘payta wajyakojkunaj qayllankupi kashasqanta, cheqa sonqowan payta wajyakojkunaj qayllankupitaj. Yanapata mañakusqankuta uyarispa, paykunata salvasqanta’ (Salmo 145:18, 19).

Chayrayku nisunman Jehová Diosqa kamachisninta mañakojtinku uyarisqantapuni. Diosqa munakuywan nin: “Mañakoj jamuwankichej, noqataj uyarisqaykichej”, nispa (Jeremías 29:12).

“Mana saykʼuspa Diosmanta mañakuychej” (Romanos 12:12).

Bibliaqa niwanchej mana saykʼuspa mañakunata, chantapis ‘sapa pʼunchay Diosmanta mañakunata’. Chaywan sutʼita reparanchej Jehová Diosqa paymanta mañakunata munasqanta (Mateo 26:41; Efesios 6:18).

¿Imaraykutaj Dios munan mañakunanchejta? Kaypi piensarina. Tukuy tataschá munanku wawitanku “yanapariway tatáy” ninankuta. Uj tataqa yachanña imatachus wawitan necesitasqanta chayri imaynachus kashasqanta, jinapis yanaparinanta nejtenqa reparan wawitanqa paypi atienekusqanta, qayllanpitaj kasqanta. Ajinallatataj Jehová Diosman orakuspaqa, paypi atienekusqanchejta rikuchinchej, qayllanpitaj kayta munanchej (Proverbios 15:8; Santiago 4:8).

“Tukuy llakiyniykichejta Diospa makinman saqeychej, imaraykuchus payqa qankunamanta llakikun” (1 Pedro 5:7).

Diosqa munakuwasqanchejrayku, llakikuwasqanchejraykutaj mañakunanchejta munan. Diosqa yachan imaschus llakichiwasqanchejta, yanapaytataj munawanchej.

Rey Davidqa tukuy kausayninpi Jehová Diosmanta yanapata mañakorqa. Willakorqataj imatachus yuyasqanta, imaynachus kashasqantataj (Salmo 23:1-6). ¿Imaynatá Dios Davidta qhawarqa? Diosqa Davidta munakorqa, tukuy mañakusqantataj uyarerqa (Hechos 13:22). Ajinallatataj noqanchejtapis Diosqa mañakojtinchej uyariwanchej, noqanchejmanta llakikusqanrayku.

Kay palabrastaqa qhelqarqa salmo librota qhelqajkunamanta ujnin. Payqa yacharqa mañakojtin Jehová Dios uyarisqantapuni. Chaytaj mayta yanaparqa. Diosman astawan qayllaykorqa, llakiykunata aguantananpajtaj kallpata japʼerqa (Salmo 116:1-9).

Dios uyariwasqanchejtapuni yachaspaqa, mana saykʼuspa paymanta mañakusunchej. Pedromanta parlarina. Payqa Españapi tiyakun, wawantaj uj accidentepi wañuporqa. Chay wawanqa 19 watasniyoj kasharqa. Pedroqa chay llakiypi kashaspa Diosmanta tukuy sonqo mañakorqa kutin kutita yanapananta, sonqochanantataj. Pedro nin: “Jehová Diosqa mañakojtiy uyariwarqa, hermanostaj sonqochawarqayku noqata señoraytawan”, nispa.

Diosmanta mañakojtinku wawanku mana kausarimojtinpis, orakoyqa Pedrota familiantawan mayta yanaparqa. Señoran María del Carmen nin: “Diosmanta mañakusqayqa llakiyniyta aguantanaypaj yanapawarqa. Yacharqani orakusqayta Jehová Dios uyariwasqanta, imajtinchus mana anchata llakikorqanichu, sonqo tiyasqataj kasharqani”, nispa.

Bibliapi nisqan chantá ashkha runaspa kausayninku sutʼita rikuchiwanchej Diosqa orakojtinchej uyariwasqanchejtapuni. Jinapis Diosqa mana tukuypa mañakusqankutachu uyarin. ¿Imaraykutaj Dios wakinta uyarin wakintataj mana?