Khuyakoj runaqa, wajkunaj llakiyninkumanta llakikun, paypa llakiyninpis kanman jinata. Chaypajqa llakiyniyoj runa imaynachus kashasqanpi piensarin. Uj doctor nin: “Wajkunamanta khuyakoyqa sonqonchejpi kashan”, nispa.

TʼUKURINA: Runaslla wajkunamanta khuyakunanchejpaj jina ruwasqa kanchej. ¿Imaraykutaj runaslla ajina kanchej? Imaraykuchus Biblia nisqanman jina, runasqa Diospa rijchʼayninman jina ruwasqa kanchej (Génesis 1:26). Diosman rijchʼakunchej, munakusqanchejpi, khuyakusqanchejpi ima. Khuyakusqanchejrayku wajkunata yanaparejtinchejqa, munakuyniyoj Diosninchej Jehová jinallataj ruwashanchej (Proverbios 14:31).

Diosqa khuyakuwanchej, llakiypi kajtinchejtaj sonqon mayta nanan. Ñaupa tiempopi, israelitasqa Egipto suyupi unayta esclavos karqanku. Chaymantataj 40 watasta chʼin pampaspi llakiyta puriykacharqanku. ¿Dios paykunamanta sonqonta nanachikorqachu? Arí. Biblia nin: “Israelitas llakisqa kashajtinku, paypis llakisqallataj karqa”, nispa (Isaías 63:9). Jehová Diosqa mana israelitaspa llakiyninkuta qhawallarqachu, paypis llakikullarqataj. Payllataj nerqa: “Allinta yachani ñakʼarisqankuta”, nispa (Éxodo 3:7). Diosninchej nillarqataj: “Pillapis aylluyta llankhaykojqa ñawi papaytapis llankhaykunman jina”, nispa (Zacarías 2:8). Pillapis noqanchejta ñakʼarichiwajtinchej, Diosninchejpis noqanchejwan khuska sonqonta nanachikun.

Wakin kuti sonqonchej juchachawanchej, yuyanchejtaj mana Diospa khuyakuyninta japʼinapaj jinachu kasqanchejta. Chay kutispi yuyarikuna, “Diosqa sonqonchejmanta aswan kuraj kasqanta, tukuy imatataj yachasqanta” (1 Juan 3:19, 20). Diosninchejqa noqanchejmanta nisqaqa sumajta rejsiwanchej. Payqa llakiyninchejta sumajta yachan. Yuyayninchejta, sonqonchejtapis sumajta rejsin, khuyakuwanchejtaj.

 Biblia niwanchej

• “Tata Diosmanta qhaparikojtiykichej, payqa uyarisonqachej. Paymanta mañakojtiykichej, nimusonqachej: Kaypi kashani, nispa” (ISAÍAS 58:9, 10).

• “Noqa yachani imastachus qankunapaj wakichisqayta, mana mana walejta kawsanaykichejpajchu, manachayqa, qankuna allinta kawsakunaykichejpaj, jinallataj jamoj tiempopipis allin kawsayllatapuni tarinaykichejpaj. Noqa Tata Diosmin chayta nini. Chaypachaqa qankuna sutiyta oqharinkichej Diosniykichejpaj rejsikapuwasqaykichejrayku, mañakoj jamuwankichej, noqataj uyarisqaykichej” (JEREMÍAS 29:11, 12).

• “Waqayniypa sapa sutʼuyninta qan botellapi japʼinki, chaytaj libroykipi qhelqasqa kashan” (SALMO 56:8)

Dios khuyakuwasqanchejta yachay, ¿llakiykunapi yanapawanchejchu? Arí. Mariaj kausayninmanta parlarina.

Pay nin: “Wawayqa iskay watasta cancerwan mayta ñakʼariytawan, 18 watasniyoj wañuporqa. Chayrayku kausayneyqa qʼala llakiylla karqa. Jehová Dios wawayta mana sanoyachisqanmanta, paypaj phiñasqa kasharqani.

”Chaymanta sojta watasninman, uj kʼacha amigayman Dios mana munakuwasqanta nerqani. Paytaj willarisqayta sumajta uyariwarqa. Chaymantataj Bibliapi 1 Juan 3:19, 20 versiculosta leeripuwarqa. Chaypi nin, ‘Diosqa sonqonchejmanta aswan kuraj kasqanta, tukuy imatataj yachasqanta’. Chantá amigayqa niwarqa, Diosninchej llakiyninchejta sumajta entiendesqanta.

”Jinapis Diospaj phiñasqallapuni kasharqani. Ajinapi Salmo 94:19 versiculota leererqani. Chaypi nin: ‘Sonqoy ukhupi ashkha llakiyniyoj kashajtiy, sonqochawasqaykeqa almayta kusicherqa’, nispa. Chay versiculoj nisqanqa sonqoy ukhukama chayarqa. Tiemponmantaj, Jehová Diosman llakiyniyta willakuyta aterqaniña. Yacharqani pay uyariwasqanta, entiendewasqanta ima”.

Diosninchej llakiyninchejta entiendesqanta, khuyakuwasqanchejtataj yachayqa, mayta sonqochawanchej. Chantá, ¿imaraykutaj llakiykuna mana tukukunchu? ¿Juchasninchejraykuchu Dios castigashawanchej? ¿Diosninchej llakiykunata chinkachenqachu? Chayta qhepan yachaqanaspi yachakusun.