Qayllanchejpi kaj imasta qhawarejtinchej, imaschus kasqanta yachanapaj, ñawisninchej ñojtunchejwan khuska llankʼan. Sutʼinchanapaj, uj frutata qhawarispa mikhuytachus manachus ajllanki. Cielota qhawarispataj paramunantachus manachus yachanki. Kay qhelqasqata leerispataj imatachus niyta munasqanta entiendenki. Mana reparajtiykipis, coloreswan yanapachikushanki. ¿Imaynamantá?

Frutaj colornenqa poqosqañachus chayri kʼukullarajchus kasqanta willasunki. Chayman jinataj mikhuyta chayri mana mikhuyta ajllanki. Phuyusta, cieloj colorninta ima qhawarispa, imayna pʼunchaychus kananta yachanki. Letraswan papelwan mana uj colorllachu kasqankuraykutaj, kay qhelqasqata leerishanki. Arí, mana reparajtinchejpis, imatapis yachanapaj coloreswan yanapachikunchej. Chaywanpis coloresqa, mana chayllapajchu yanapawanchej.

Mercadopi vendenapaj imasqa, munarinanchejpaj jina tukuy laya colorespi maytʼusqa kanku. Mana reparakojtinchejpis, vendejkunaqa pikunamanchus vendeyta munasqankuman jina coloresta ajllanku. Pʼachasta ruwajkuna, kʼachanchajkuna, imatapis sumajta ruwayta yachajkuna ima, colores sonqonchejta kuyurichisqanta yachanku.

Maypichus uywakusqanman jina, runaqa coloresmanta uj jinata yuyan. Sutʼinchanapaj, Asiamanta wakin runas, pukaqa suertepaj chayri fiestaspaj kasqanta yuyanku. Africamanta wakin lugarespitaj pukata lutupaj apaykachanku. Chaywanpis wakin coloresqa, casi tukuynejpi kikin yuyaykunata runaj sonqonpi jatarichin. Kinsata qhawarina:

PUKA. Kay colorqa, mayllapipis kʼancharin. Chantapis guerrapi, kallpapi, chayri ima sajra jamunanpi yuyachikun. Sonqota sinchʼita kuyurichin, cuerponchejta mikhuyta usqhayta chʼonqananpaj tanqan, yawartapis usqhayllata purichin.

Hebreo simipi “pukapaj” oqharikusqan palabraqa, “yawarpaj” oqharikusqan palabramanta jamun. Chantapis Bibliaqa, runa wañuchi khuchichakoj warmimanta parlaspa, kulli puka pʼachawan pʼachallisqa kasqanta nin. Pichus “puka phiña animalpa patampi tiyasqa kasharqa, chay animaltaj Diospaj sajrata rimay sutiswan juntʼa karqa” (Apocalipsis 17:1-6).

QʼOMER. Puka colormanta nisqaqa, sonqota tiyaykuchin, cuerponchejta mikhunata pisimanta pisi chʼonqananpaj tanqan. Chantapis llakiykunata qonqachikun, samarinapajtaj may sumaj. Uj huertata chayri orqosta qʼomerllata rikuspaqa, ajinapuni kasqanta nisunman. Génesis libroqa, Diosninchej tukuy qʼomerkunata, sachʼasta, plantasta ima, runas kusisqa kausakunankupaj ruwasqanta nin (Génesis 1:11, 12, 29, 30).

YURAJ. Kay colorqa kʼanchaypi, mana manchachikuypi, llimphu kajpi ima yuyachikun. Chantapis kʼacha, mana sajrayoj, mana chʼichiyoj kaywan ninakun. Bibliaqa kay colorta ashkhata oqharin. Mosqoypi jina rikhurej runas, ángeles ima, yuraj pʼachawan pʼachallisqa  rikhurinku. Chaytaj cheqan, yupaychayninkupitaj llimphus kasqankuta rikuchin (Juan 20:12; Apocalipsis 3:4; 7:9, 13, 14). Yuraj caballospi lloqʼasqa soldados sumaj awasqa, yuraj llimphu linowan pʼachallisqas kasqankoqa, cheqan guerrawan ninakun (Apocalipsis 19:14). Diosqa juchasninchej pampachasqapuni kananta rikuchinawanchejpaj, jinata nin: “Juchasniykichejqa may jina pukapis kachunku, ritʼi jina yuraj kanqanku”, nispa (Isaías 1:18).

Diosqa colores sonqonchejta kuyuchiyta atisqanta yachan. Chaytataj imaynatachus Biblia coloresta oqharisqanpi rikunchej. Sutʼinchanapaj, Apocalipsis libroqa, kay tiempopi guerras, yarqhay, mikhunarayku chayri onqoykunarayku wañuy kananta ima ninanpaj, imaymana colorniyoj caballospi lloqʼasqa soldadosta rikuchin. Chaykunataj yuyarinapaj jinapuni.

Ñaupajtaqa, lliphipej yuraj caballo rikhurin. Chaytaj Cristo Jesús, cheqan kajman jina maqanakusqanwan ninakun. Chay qhepanta, puka caballoñataj rikhurin. Chaytaj naciones maqanakunankuwan ninakun. Chantá yana caballoñataj rikhurin, mayqenchus yarqhaywan ninakun. Qhepatataj qʼellu caballo rikhurin, patanpi lloqʼasqa kajpata sutintaj “Wañuy” (Apocalipsis 6:1-8). Chay coloresqa, sapa caballo imawanchus kay tiempopi ninakusqanta yuyarikunapaj yanapawanchej.

Bibliaqa imatapis yuyayninchejman churanapaj, coloresta oqharin. Arí, kʼanchayta, ñawistawan Ruwaj Diosqa, entiendenanchejpaj, yuyarinanchejpaj ima, coloreswan yanapawanchej. Coloresqa, rikusqanchej imachus kasqanta yachanapaj yanapawanchej, sonqonchejta kuyurichin, yachachiykunatapis yuyarichiwanchej. Arí, kusisqa kausananchejpaj, Diospa sumaj regalon.