9 CAJ YACHACUY
¿Imanötaj familiakuna kushishga kawayanman?
1. ¿Imanirtaj autoridadchöraj casakuyanman?
Kushishga Dios Jehovaga munan familiakuna shumaj kawayänantami (1 Timoteo 1:11, NM). Paymi familiakunataga kamargan. Autoridadman aywaykur casakuyga yanapakun taytakuna wamrankunata shumaj winachiyänampajmi, chaynöpa jauka jaukala kawakuyänampaj. Casakuyta munaj cristianukunaga autoridadkuna rurayangan leyta wiyakurmi inscribikuyänan. Lei Lucas 2:1, 4, 5.
Diosga munan mana rakikaypa y mana traiciunanakushpa casadukuna kawapäkunantami (Hebreos 13:4). Rakikaytaga aläpami chikin (Malaquías 2:16). Chayno kaptimpis, majan traiciunashga kaptinga, culpaynaj kajga rakikärir yapay jukwan casakuyta puedinmi. Lei Mateo 19:3-6, 9.
2. ¿Imanötaj tratanakuyanman casadukuna?
Jehovaga olguta warmita kamashga casado kawaynincho yanapanakuyänampajmi (Génesis 2:18). Juk gosaga warmimpa uman cuenta karmi wasincho familianta manteninan y Diospita yachachinan. Jina warminta kuyanganraykurmi imaykata ruranan. Juknin jukninmi kuyanakuyänan y respetanakuyänan. Y juchasapa karmi, kushishga kayänampajga perdunanakuyta yachakuyänan. Lei Efesios 4:31, 32; 5:22-25, 33, y 1 Pedro 3:7.
3. ¿Problemakuna kaptinga rakikäkuriyanmanchuraj?
Casado kawaycho problemakuna kaptinga ishkankunami kuyaylapa tratanakuyanan (1 Corintios 13:4, 5). Bibliaga manami consejakunchu problemankunata alchayänanraykur jukla rakikäkuriyänanta. Lei 1 Corintios 7:10-13.
4. ¿Wamrakuna imano kayänantataj Dios munan?
Kushishga kayänantami munan. Chaymi yachachin mozo o jipash kangan wichan imano kushishga kawayänampaj. Jina munanmi taytankunapita yachakuyänantapis (Colosenses 3:20). Jinamampis, Payta y Churinta sirvir kushishga kayänantami munan. Lei Eclesiastés 11:9–12:1; Mateo 19:13-15, y 21:15, 16.
5. ¿Imanötaj taytakuna yanapäyanman wamrankuna kushishga kayänampaj?
Mikuyninta, wasita y ropankunata gormi (1 Timoteo 5:8). Jina yachachiyanmanmi Dios munashganno kawaytapis (Efesios 6:4). Taytakuna Diosta lapan shongunwan kuyaptinga, wamrakunapis chaynölami rurayanga. Bibliapa yachachikuyninga ali runa kayänampajmi yanapayta puedin. Lei Deuteronomio 6:4-7 y Proverbios 22:6.
Wamrakunaga necesitayan alita rurayangampita wayllupänantami. Horaga alimi kanga astapänata y rimapänata, chaynöpa mana aliman mana jegarpunampaj (Proverbios 22:15). Chayno kaptimpis, manami gayapänanchichu ni juyupaga magakachärinanchichu. Lei Colosenses 3:21.
Jehovapa testigunkunaga wamrakunaman y taytakunaman pensarmi achka librukunata jorgayämushga. Lapampis Biblialapitami. Lei Salmo 19:7, 11.
