Ong-liqa Jehoväpa testïgunmi, y Bulgaria nacionchömi täran. Pëqa juk warmitash Bibliapita yachatsinaq. Tsë warmipa jutinqash Zlatka, y pëpa nunanqa manash Bibliapita parlapäyänanta munaqtsu. Kënömi nin panintsik Ong-lim: “Casädu vïdapaq Bibliachö ima ninqanta tsë warmita yachëkätsirmi nirirqä familianwan shumaq kawakunampaqqa, nunantawan wamranta ‘kuyaqmi’ ninampaq. Tsënö nïkuptïnam, llakinashqa rikëkamarnï kënö nimarqan: ‘Familiärëkurqa ¡imëkatapis rurämanmi!, peru nunäta y 9 watayoq warmi wamrätaqa manam ni imëpis “kuyaqmi” nita puëdirqötsu’”.

Tsënash Panintsikqa shumaqlla kënö tapurinaq: “Nunëkitawan wamrëkitaqa, ¿imanirtaq kuyanqëkita nita puëdinkitsu?”. Tsënash kënö ninaq: “Mamänïqa manam ni imëpis ‘kuyaqmi’ nimarqantsu, y awiläpis manash mamänïta ni imëpis ‘kuyaqmi’ nishqatsu kanaq, tsëmi noqapaqqa fäciltsu nunäta o wamräta ‘kuyaqmi’ nïqa”. Tsëshi panitsikqa Bibliachö Mateu 3:17 ninqanta leyirapurnin, Jesustapis papänin Jehovä ‘kuyaqmi’ ninqanta yarpätsinaq. Y yanapëkunampaq Teytantsik Jehoväta mañakunampaqshi ninaq.

Tsëpita ishkë junaqllatash, panintsikta tsë warmi kushishqa kënö ninaq: “¡Jehovätam mañakurqä yanapamänampaq, y yanapamashqam! Wayïman nunä chëkamuptinmi nirqä, ‘Bibliachömi yachakurqö qamta respetakur kuyanaqpaq’. Y tsënö nirirmi shütëkurnin, ‘allipam kuyaq’ nirqä. Tsëpita mas tardintanam wamrätapis waqurkur (makallarkur), “llapan shonqüwanmi kuyaq’ nirqä”. Y tsënö cuentarirshi panita kënö ninaq: “¡Tsëtsika watapam nunäta ni wamräta ‘kuyaqmi’ nita puëdirqötsu, peru kananmi sïqa alli sientikü!”.

Y semänallatanash panintsik Ong-liqa, Bibliapita yachatsinqan warmipa nunanta reqirinaq. Tsë nunash kënö ninaq: “Mëtsikaqmi niyäman, warmï qamkunawan Bibliapita manana yachakunampaq, peru qamkunawan warmï yachakur qallanqampitam ¡mas alli y kushishqa kawakuyä!”