República Dominicänapa capitalnin Santo Domingo markachömi yurikurqä, y teytäkunapa chusku wamrankunapitaqa noqam último kaq kä. Teytäkunaqa alli estudiashqam kayarqan y alli kawakoq familiachö winatsiyamëtam munayarqan. Chusku wata yurinäpaq pishikaptinmi teytäkuna mormón misionërokunata reqiyarqan, y respetakoq kayaptin, limpio y shumaq altsapäkushqa puriyaptinmi espantakushqa quedariyarqan. Ichik tiempollachömi täräyanqä República Dominicanachö familiäkuna puntata tikrariyarqan Iglesia de Jesucristo de los Santos de los Últimos Días nishqan religionman, jina Iglesia Mormöna nirpis reqiyanmi.

Noqaqa Iglesiä imatapis ruranqankunachömi imëpis yanapakoq kä, pero familiata y imanöpis kawayänampaq kaqkunata precisaqpaq churayanqanmi masqa gustamaq. Mormón kanqäpitaqa kushishqam karqä y misionero kanäpaqmi churapakarqä.

18 watata ushariptïmi, alli universidadchö estudianärëkur Estados Unïdospa familiäwan ëwakuyarqä. Juk wata pasarinqanchönam, Jehoväpa testïgon tiökuna Florïdaman watukayämaqnï shayämurqan y asamblëankunamanmi invitayämarqan. Tsëchö llapan këkaqkuna Bibliapa textonta ashiyanqanta y entiendiyanqanta qellqayanqanta rikanqämi alläpa gustëkamarqan, tsëmi papeltawan lapicërota mañakurirqä y pëkunanölla rurar qallëkurqä.

Asamblea ushariptinnam, misionero këta munanqäta musyarnin, tiökuna niyämarqan Bibliata más entienditsiyämänampaq yanapamëta munayanqanta. Y tsëqa allinömi noqapaq karqan, porque mormón librotam más reqeq kä Bibliapitapis.

Kutiriyanqanchönam, Bibliapita parlar sïguiyarqä telëfonopa.  Creinqäkunata Bibliawan igualatsinäpaqmi imëpis animayämarqan. Kikïlla rasumpa kaqta cuentata qokunätam munayarqan.

Religionnïpa yachatsikïninkuna rasumpa kanqantam creeq kä, pero rasumpa kaqchöqa manam musyaqtsu kä Bibliapa yachatsikïninwan igualanqanta. Tiämi apatsimarqan Jehoväpa testïgonkuna rurayanqan 8 de noviembre de 1995 ¡Despertad! revistata, tsëchömi mormón religionpaq ishkë yachatsikïkuna karqan. Espantakurqämi religionnïpa mëtsika creencianta mana reqinqäta cuentata qokurnin, tsëmi Internetpa päginäkunachö ashirqä tsë revista rasumpa o mana rasumpa ninqanta musyanäpaq y rasun kaqllatam ninaq. Jinamampis, Utah markachö mëtsika mormonkunapa musëonkunata watukanqächömi más cuentata qokurirqä revista rasun kaqta ninqanta.

Bibliawan Mormón Libro igual-lla yachatsikuyanqantam creeq kä. Tsënö kaptimpis, Bibliata rasumpa yachakur leinqachömi, contränakunqanta cuentata qokurirqä. Këllata rikärishun, Ezequiel 18:4 textochömi Bibliaqa alma wanunqanta nin. Pero Alma 42:9 mormón librochönam alma ni imëpis mana wanunqanta nin.

Jina tsënö jukläya creiyaptimpis nacionninkunarëkur imëkata rurayanqanmi pantatsimarqan. Jukqa karqan (Misuri, Estados Unidos) Jackson markachö unë tiempochö Edén huerta kanqanta niyanqanmi. Y juknam “Diospa gobiernon chämuptin, Estados Unïdospa bandëran culpannaq karnin, igual derëchoyoq kayänampaq libre postechö orgüllowan lapapänampaq kaqta” Iglesiapa profëtankuna niyanqan.

Tsëkuna pasakunan kaptinqa, nacionnïta y wakin nacionkunata imaraq pasanqa nirmi tapukoq kä. Juk tardem misionëropaq estudiëkaq reqinqä qayaramarqan y tsë tëmapitam parlapar qallëkurqä. Directom kënö tapurirqä: “Nacionniki juk nacionwan guërrachö këkaptin, ¿tsë nacionchö mormón mayikikunawan pelyankimantsuraq?”. Mana creipaqnö kaptimpis, awmi niramarqanmi. Religionnïpa yachatsikïninkunatam más musyapar sïguirqä y Iglesiäpa wakin respetashqa pushakoqninkunatam tapurqä, tapukunqäkunapa respuestan mana musyëpaq kanqanta y tiempowanraq musyakänampaq kaqtam pëkunaqa niyämarqan.

Tsëta niyämanqanwanqa llakishqam quedarirqä. Misionero këta imanir munanqätam tapukur qallëkurqä y tsë ruranqäqa nunakunata yanapanäpaq wakin trabäjonölla kanqantam cuentata qokurirqä. Jinamampis, këkunata ruraqkuna alli rikashqa kayanqanmi noqataqa gustamaq. Pero rasun kaqchöqa ichikllatam Diospita musyaq kä. Bibliapa textonkunata atska kuti leishqa karpis kë librotaqa manam alläpa precisaqtanötsu rikaq kä. Jina nunakunapaq y Patsapaq Diospa munënin ima kanqantapis manam musyarqätsu.

Jehoväpa testïgonkunawan Bibliata yachakurninmi, yachakurqä Diospa jutin ima kanqanta, wanurishqa ima pasamänapaq kaqta, Diospa munënin cumplikänampaq Jesus imanö yanapakunqanta y maskunatapis. Alfinmi kë shumaq librota reqir qallëkarqä, ¡y imanömi gustëkamaq rasumpa kaqta yachakïkanqäpita wakinkunawan parlëqa! Dios kawanqantaqa imëpis musyarqämi, pero kananqa pëman mañakïtam puëdï imëka alli amïgowan parlëkaqnö. 12 de julio 2004 watam Jehoväpa testïgonnö bautizakurirqä y joqta killakuna pasariptinmi llapan tiempöwan Diospita yachatsikur qallëkurqä.

Jehoväpa testïgonkunapa Brooklyn (Nueva York) principal sucursalninchömi, pitsqa watapa yanapakurqä. Alläpam kushikö entero Patsachö nunakuna yachakuyänampaq puëdinqämannö ichikllatapis Bibliakunata y wakin publicacionkuna rurëchö yanapakunqäpita. ¡Tsë llapan watakuna Diosta reqiyänampaq nuna mayïta yanapakunqäqa pasëpam kushitsimashqa!