Diospita juk libru shamuptinqa alläpa alli kanantam shuyarantsik, y tsënömi Bibliaqa. Tukïläya idiömakunachömi waranqëpayan jorqayämushqa. Jinamampis yachatsikïninkunaqa nunakunapa kawënintapis cambiëta puëdinmi. (Leyi 1 Tesalonicensis 2:13 y 2 Timoteu 3:16.)

¿Imanirtaq següru kantsik Biblia Diospita shamunqanta? Nunakuna parlanqanqa manam cumplikanllatsu, peru shamoq tiempupaq Biblia parlanqankunaqa ninqannöllam cumplikan. Tantiyarinapaq, mar Muertupa lädunmampam, pachak watakuna Jesus yurikunampaq pishikaptin Isaïas librupita rurayanqan copiata tariyarqan. Tsëchömi willakurqan Babilonia markachöqa mana ni imëpis täräyänampaq kaqta. Y tsë profecïaqa Jesus wanurinqampita atska watakuna pasanqanchöran cumplikarqan. (Leyi Isaïas 13:19, 20 y 2 Pëdru 1:20, 21.)

1.600 watachöran qellqar ushayarqan, y chusku chunka nunakunanömi qellqayarqan. Juk yachatsikïllapitam parlayarqan, y qellqayanqanqa manam contranakuntsu. ¿Imanötaq rurayarqan? Kikin Jehovämi yanaparqan. (Leyi 2 Samuel 23:2.)

Wakin Bibliata qellqaqkunataqa angelkunawanmi parlaparqan, y wakin kaqtanam suëñïninkunachö revelarqan. Imakunata qellqayänampaqmi entienditsirqan, y pëkunanam shumaq palabrakunata akrëkur qellqayarqan. (Leyi Apocalipsis 1:1; 21:3-5.)