2022 wata lünis 10 de octubri junaqmi, tempränulla Rusiapita soldädukuna Ucraniachö wakin markakunaman misil niyanqan bombakunata mandayarqan. Tsëtaqa rurayarqan, Crimëapita Rusiaman pasaq reqishqa puentita, 8 de octubri junaq ushakätsishqa kayaptinmi. Tsëkuna manaraq pasakuptinmi, wakin gobernaqkunaqa nishqana kayarqan Armagedon qallanampaqna kaqta.

•   “Kennedy [Estädus Unïduschö presidenti] kanqampita y Cüba nacionchö misil niyanqan bombakunata tariyanqampita kananyaqqa, manam Armagedon qallanampaqna këkanqanta rikarquntsiktsu. [...] Tukuyläya bombakunata utilizarqa, munar o mana munarpis Armagedonchömi ushayanqa” (Estädus Unïduschö presidenti Joe Biden, 2022 wata 6 de octubri).

•   “Noqapis Armagedonna kanqantam pensä, y entëru Patsachö nunakunam peligruchö këkantsik” (Ucrania nacionchö presidenti Volodímir Zelenski, tukuyläya bombakunapaq tapuyaptin ninqan; 2022 wata 8 de octubri, BBC News).

 ¿Tukuyläya bombakunata utilizäyaptintsuraq Armagedon kanqa? ¿Ima nintan Bibliachö?

 Manam. Armagedon palabraqa Bibliachö juk kutillam yurin, tsëqa këkan Apocalipsis 16:16 ninqanchömi. Tsë guërraqa manam nacionpura pelyayanqantsu kanqa, sinöqa Teyta Dios y ‘entëru patsachö gobernaqkunam’ guërrachö kayanqa (Apocalipsis 16:14). Diosqa Armagedon guërrachömi llapan gobiernukunata ushakätsinqa (Daniel 2:44).

 Armagedonchö ima maskuna pasakunampaq kaqta musyëta munarqa, “¿Imatan Armagedon guërraqa?” neqta leyi.

 Manam. Capaz gobiernukunaqa tukuyläya bombakunata utilizäyanqa, peru Teyta Diosqa manam permitinqatsu kë Patsata ushakätsiyänanta. Bibliachömi nin:

•   “Kë patsaqa manam ni imëpis ushakanqatsu” (Eclesiastes 1:4).

•   “Allita ruraq nunakunapaqqa kë patsam herenciankuna kanqa” (Salmus 37:29).

 Tsënö kaptimpis, Bibliachö willakunqan y kanan witsan imëka pasanqanta rikanqantsikmi, ushanan tiempuchöna kawëkanqantsikta rikätsikun (Mateu 24:3-7; 2 Timoteu 3:1-5). Shamoq tiempupaq Bibliachö ima ninqanta musyanëkipaqqa, grätislla Bibliapita yachakuy.