GENTECUNACA CAITAMI NINCUNA

Achca gentecunaca cullquimanta pugllanaca shujtajcunataca mana llaquichinchu, leypi nishcatami pajtachicunchij nincunami. Gobiernocunapish loteriapi ganashca cullquihuanmi shujtajcunata ayudancuna.

BIBLIACA CAITAMI YACHACHIN

Bibliapica cullquimanta pugllanaca alli cashcata o mana alli cashcataca mana ninchu. Pero, Yaya Dios caimanta imata yuyajta intindichunmi Bibliapica huaquin consejocuna tiyan.

Cullquimanta pugllajcunaca ashtahuan cullquita ganangapajmi shujtajcunata mishanallapi yuyancuna. Chashna rurashpaca Jesús ima nishcata mana cazushcatami ricuchincuna. Paica: ‘Pajta ashtahuan charisha ninguichijman’ nircami (Lucas 12:15). Gentecunaca ashtahuan charisha nishpami pugllanata munancuna. Mana tucuicuna ganai tucujpipish empresacunaca achca premiocunata cushun nishpami crichincuna. Chaimantami gentecunaca charij casha nishpa achca cullquita apostancuna. Empresacunaca ashtahuan charij cana munaita jarcanapaj randica pugllashpa jahualla cullquita ganachunmi animancuna.

Cullquimanta pugllaipica shujtajcuna pirdijpimi caishujca paicunapaj cullquita japin. Chashna rurashpaca paillapi yuyashcatami ricuchin. Pero Bibliapica: “Pipish quiquinpaj allipajllaca ama mashcachun, ashtahuanpish shujtajpaj allipaj mashcachun” ninmi (1 Corintios 10:24). Chunga mandamientocunamanta shuj mandamientopipish: “Shujtaj ima charishcacunatapish ama munangui” ninmi (Éxodo 20:17). Pugllaj runaca caishuj pugllajcunapaj cullquihuan saquiringa raicullami paicuna pirdichun munan.

Shinallataj ashtahuan charisha nijcunaca suertepimi confiancuna. Pero, Bibliapica suertepi mana confiana cashcatami advirtin. Ñaupa punllacunapica maijan israelitacunaca Diospi feta mana charishcamantami ‘suerteta cuj diosta’ adorai callarircacuna. ¿Chaitaca Diosca ima shinataj ricurca? Paica: “Ñuca ñaupajpi millaita rurashpami ñuca mana munashcata agllarcanguichij” nircami (Isaías 65:​11, 12).

Huaquin llajtacunapica gobiernocunaca pugllaipi ganashca asha cullquihuanmi pobre gentecunata, escuelapi huahuacuna yachachunpish ayudancuna. Chashna ayudashpapish ashtahuan charina munaita charichun, paicunallapi yuyachun, imata japinga raiculla imatapish rurachunmi gentecunataca animancuna.

“Shujtaj ima charishcacunatapish ama munangui” (Éxodo 20:17).

BIBLIACA CAITAMI YACHACHIN

1 Timoteo 6:9-pica: “Charijyashun nijcunaca mana allita rurana yuyaicuna shamujpi urmashpaca, cutinllatajmi chꞌahuanyachij yuyaipi huatashca tucun. Chai chꞌahuanyashca llaquichij yuyaicunami runacunataca llaquichishpa, tucurinapi, chingarinapi huashicuchin” ninmi. Ashtahuan charisha nijcunaca cullquimantami pugllancuna. Diospaj Shimipica ashtahuan charina munaica mana alli cashcatami ricuchin. Chaimantami chaicunamantaca cuidarina canchij (Efesios 5:3).

Huaquincunaca pugllashpami rato achca cullquita ganancuna. Chashna pugllanaca cullquita cꞌuyachunllami animan. Bibliapica: ‘Tucui millaita ruranata callarichijca, cullqui munaimi can’ ninmi. Ashtahuan cullquita charina munajcunaca chai yuyaillami causan. Chaimantami crishcatapish saquishpa achca preocupacioncunata charin. Bibliapi nishca shinaca “chaita munashcamantami maijancunaca crishcata saquishpa, achca llaquicunata apacuncuna” (1 Timoteo 6:​10).

Cullquita ashtahuan charisha nijcunaca paicuna charishcallahuanca mana cushilla causanchu. Eclesiastés 5:​10-pica: “Cullquita yalli cꞌuyajca, mashnata charishpapish mana cushicunchu. Charinacunata yalli cꞌuyajpish chaihuanca, paipaj ima allita mana japinchu” ninmi.

Chashna achca pugllashpa cullquita charinata munajcunaca cunanca chai viciotaca mana saqui pudincunachu. Estados Unidos llajtapica achca achcami chai viciopica urmashcacuna.

Proverbios 20:21-pi nishca shinaca ashtahuan charisha nijcunaca charijcunami cai tucun. Pero Diospaj bendiciontaca mana charincunachu. Ashtahuanpish cullquimanta pugllana viciopi urmajcunaca dibimi tucushcacuna. Huaquinpica cullqui illajmi saquirishcacuna, paicunapaj amigocunata, trabajota, hasta paicunapaj familiatapishmi pirdishcacuna. Pero Bibliapi tiyaj consejocunami chai llaquicunapi ama urmachun ayudan.

“Charijyashun nijcunaca mana allita rurana yuyaicuna shamujpi urmashpaca, cutinllatajmi chꞌahuanyachij yuyaipi huatashca tucun. Chai chꞌahuanyashca llaquichij yuyaicunami ruranacunataca llaquichishpa, tucurinapi, chingarinapi huashicuchin” (1 Timoteo 6:9).