Bibliam nin Diospa espiritunqa atiynin kasqanta (Miqueas 3:8, Chuya Qellqa, CQ; Lucas 1:35). Chay atiyninwanmi Diosninchikqa munaynin ruwakunanpaq imatapas ruwan (Salmos 104:30; 139:7, CQ).

 Chuya espiritutaqa hebreo rimaypim ninku “rúaj” nispa, griego rimaypiñataqmi “pnéuma” nispa. Bibliapi Diospa espiritumanta rimaspanqa yaqa llapanpim nichkan Diospa atiyninmanta (Genesis 1:2, CQ). Ichaqa qatiqninpi kaqkunapas espiritumantam rimachkan:

•   Imapas samayniyuq utaq kawsaq (Habacuc 2:19, CQ; Apocalipsis 13:15).

•   Wayra (Genesis 8:1, CQ; Juan 3:8).

•   Runakunapas hinaspa animalkunapas samayllawan kawsasqan (Job 34:14, 15, CQ).

•   Runakuna imayna kasqan (Numeros 14:24, CQ).

•   Dios hinaspa angelkuna (1 Reyes 22:21, CQ; Juan 4:24).

 Kay nisqanchikkunataqa manam rikuyta atichwanchu, chaynam Diospa atiyninpas wayra hina mana rikuy atina, chayna kasqantam yachaysapa William E.Vine sutiyuq runapas nirqa.

 Imaynam makinchikwan imatapas ruwanchik, chaynam Jehova Diosninchikpas atiyninwan imatapas ruwan (Efesios 2:10; Deuteronomio 26:8; Salmos 102:25, CQ). Diosmi espiritunwan utaq atiyninwan tukuy kaykunata ruwarqa:

•   Hanaq pachatam unancharqa (Salmos 33:6; Isaias 66:1, 2, CQ).

•   Bibliata qillqanankupaqmi atiyninwan yanaparqa (2 Pedro 1:20, 21).

•   Diosqa atiyninwanmi serviqninkunata yanaparqa milagrokunata ruwanankupaq chaynataq paymanta willakunankupaqpas (Lucas 4:18; Hechos 1:8; 1 Corintios 12:4-11).

•   Diosqa atiyninwantaqmi kasukuqninkunatapas yanapan allin runa kanankupaq (Galatas 5:22, 23).

Chuya espirituqa manam runa hinachu

 Bibliam willawanchik huk kutipi Dios lamar quchata pukuykuptin iskayman rakikurusqanmanta, chaytaqa ruwarqa chuya espiritunwanmi utaq atiyninwanmi. Chaywanmi yachanchik chuya espirituqa mana runa hina kasqanta (Exodo 15:8, 10, CQ). Imaynam allpa manka ruwaqpa makinpas mana kikillanmantachu imatapas ruwan, chaynam Diospa espiritunpas utaq atiyninpas mana kikillanmantaqa imatapas ruwanchu (Lucas 11:13). Chaymantapas bibliaqa Diospa espirituntam tupachin yakuwan, nintaqmi chuya espiritupa huntasqa runaqa iñiyniyuq chaynataq yachayniyuq kasqanta. Chaywanmi yachanchik chuya espirituqa mana runa hina kasqanta (Isaias 44:3, CQ; Hechos 6:5; 2 Corintios 6:6).

 Bibliaqa niwanchikmi Diospa sutin Jehova kasqanta, churinpañataq Jesus kasqanta, ichaqa manam niwanchikchu chuya espiritupa sutintaqa (Isaias 42:8, CQ; Lucas 1:31). Huk kutipim Jesuspa qatiqnin Esteban musquyninpi hina hanaq pachapi qawarqa iskay runata, manam kimsatachu. Bibliam nin: “Paymi chuya espirituwan huntasqa kaspan hanaq pachata sumaqta qawarispan Diospa kanchariyninta rikururqa, rikururqataqmi Jesustapas Diospa alliq lawninpi sayachkaqta”, nispa (Hechos 7:55). Diosqa chuya espiritunwanmi utaq atiyninwanmi Estebanta yanaparqa chayta qawananpaq.

 Ninkum: “Chuya espirituqa runa hinam. Chaymi Dios tayta, Dios churi, Dios chuya espiritu huklla kanku. Chaytam 1 Juan 5:7, 8 Chuya Qellqa 2012 bibliapi nichkan”, nispa.

 ¿Chaynachu?: Manam. Chuya Qellqa 2012 bibliapim 1 Juan 5:7, 8 kaynata nin: ‘Kay kimsankum testigo kanku. Hanaq pachapi Dios tayta, Dios churi, Dios chuya espiritu, kay kimsanmi huklla kanku. Espiritu, yaku hinaspa yawarpiwan. Chay kimsanmi huklla kanku’, nispa. Ichaqa ‘hanaq pachapi Dios tayta, Dios churi, Dios chuya espiritu kay kimsanmi huklla kanku’ nisqantaqa manas apostol Juanqa qillqasqachu. Chaynatam ninku yachaysapa runakuna, chaymi ninku bibliapi chayqa mana kananmanta. Bibliamanta yachaq Bruce M. Metzger sutiyuq runapas nirqam: “Chaytaqa apostol Juanqa manam qillqarqachu, chayraykum bibliapiqa mana kananchu”, nispa.

 Ninkum: “Bibliaqa chuya espiritumanta rimaspanqa runa hina kasqanmantam riman. Chaynaqa chuya espirituqa runa hinach”, nispa.

 ¿Chaynachu?: Manam. Bibliapi chuya espiritumanta rimaspanqa wakinpim runamantapas hina riman. Huk kutipim Jesus nirqa chuya espirituqa yanapakuq kasqanmanta, chaymi nirqa qatiqninkunata yanapananmanta, yachachinanmanta, hinaspa hamuq tiempopi imapas kananmanta willananmanta. Chayna nisqanwanqa manamá runa hina kasqantachu nichkan (Juan 16:7-15). Bibliaqa yachaymantapas, wañuymantapas hinaspa huchamantapas rimaspanqa runamanta hinam riman, ichaqa manam chayraykuchu nichwan runa hina kasqankumantaqa (Proverbios 1:20, CQ; Romanos 5:17, 21). Huchamanta rimaspanpas ninmi engañakuq chaynataq wañuchikuq kasqanta (Mateo 11:19; Lucas 7:35; Romanos 7:8, 11).

 Ninkum: “Bautizakuqkunaqa chuya espiritupa sutinpim bautizakunku, chaynaqariki chuya espirituqa runa hinachiki”, nispa.

 ¿Chaynachu?: Manam. Bibliapi “paypa sutinpim utaq wakpa sutinpim kaytaqa utaq waktaqa ruwanki” nispanqa nichkan imatapas ruwananpaq kamachisqa kasqanmantam (Deuteronomio 18:19-22; Ester 8:10, CQ). Castellanopipas wakinpim ninku “leypa sutinpi” nispanku. Chayna nispankuqa manam “ley” huk runa kasqantachu nichkanku. Chaynallataqmi chuya espiritupa sutinpi pipas bautizakusqanmanta nispaqa, manam nichkanchu chuya espirituqa huk runa kasqantaqa, aswanqa chuya espiritupa sutinpi bautizakuspanqa, riqsikunkum Diosqa chuya espiritunwan, utaq atiyninwan munaynin ruwasqanta (Mateo 28:19).

 Ninkum: “Jesuswan apostolninkunaqa nirqakum chuya espirituqa runa hina kasqanta”, nispa.

 ¿Chaynachu?: Manam, bibliaqa manam yachachinchu chuya espirituqa runa hina kasqantaqa, chaytaqa runakunañam nirqaku. Chaytam nin huk riqsisqa libropipas, ninmi: “381 watapiñam iglesia catolica tantiarurqa chuya espirituqa runa hina kananpaq hinaspa Dios hina kananpaq”, nispa. Chaytaqa tantiarurqaku apostolkunapa wañukusqankumanta iskay pachak masnin watakuna qipatañam.