BIBLIAPA YACHACHISQAN. “Tukuymanta llalliqtaqa kuyanakuychikyá, kuyanakuyllam tukuy imatapas sumaqtaqa allinyanachin” (Colosenses 3:14).

¿IMAPIM YANAPAWANCHIK? Bibliapiqa manam warmi-qari kuyanakuymantachu astawanqa riman, aswanqa kuyakuyniyuq kaspa llakipayakuymanta, pampachakuymanta, llampu sunqu kaymanta, mana piñakuq kaymanta, sumaq sunqu hinaspa pacienciakuq kaymantam (Miqueas 6:8; Colosenses 3:12, 13). Kayna kuyakuyniyuq kayqa tiempopa risqanman hinam astawan wiñan, manam warmi-qari chayllaraq riqsinakuspanku kuyanakuyninku hinallachu.

Brenda sutiyuq warmim 30 wataña casarasqa kachkan, paymi nin: “Chayllaraq casarasqakunapa kuyanakuyninkuqa manam chaynallachu tiempopa risqanman hina kuyanakuywanqa”, nispa.

Sam sutiyuq qarim 12 wataña casarasqa kachkan, paymi nin: “Warmiytawan ñuqatam Bibliapa sumaq yachachikuyninkuna admirachiwaqku. Chay yachasqaykuta ruwayman churaptiykuqa allinmi tarikuniku. Wakinpiqa riqsikunim pisipasqa, hukmanyasqa utaq piñasqa kaspay mana kasukusqayta. Chaynapi tarikuspaymi Jehova Diosta mañakuni kallpata quwananpaq. Hinaspaymi señorayta abrazani, chaymi ratonmanqa piñachinakusqaykuta qunqaruniku”, nispa.

Jesuspa nisqanman hinaqa yachayniyuq kayqa qawakun ruwayninchikkunapim (Mateo 11:19). Arí, allintapuni yanapawasqanchikraykum nichwan Bibliaqa yachaywan qillqasqa kasqanmanta. Lliw yachachikuyninkunaqa tukuy tiempopipas, pi runatapas hinaspa may nacionniyuq kaqkunatapas allintapunim yanapan. Chaymantapas, runakunapa imayna kasqanman hina qillqasqa kasqanraykum nichwan Jehova Diosmanta kasqanta. Arí, Biblia yanapawasqanchikta musyakunapaqqa nisqankunatam ruwayman churananchik. Bibliaqa niwanchikmi “Diospa allin kasqanta” riqsinapaq (Salmo 34:8). Chaynaqa, ¿kasukunkichu?