Kenia nacionpim iskay precursorkunata huk wasiman yaykunankupaq nirqaku, hinaptinmi rikururqaku taksachalla runata camanpi, chaywanmi precursorkunaqa admirakurqaku. Chay runapaqa wasa tullunwan brazonkunam taksachalla kasqa. “Wistukunam luwichu hinaraq pawaykachanqaku” nispa Diospa promesanmanta willaptinkum chay runaqa anchata kusirikurqa (Is. 35:6).

Paypa sutinmi Onesmus, 40 watanpiñam tarikun. Payqa nacerqa osteogénesis imperfecta nisqanku onqoywanmi, chay onqoywanmi tulluchankuna runtu qara hina chaylla pakikun. Chay onqoypaqqa manam ima hampipas kanchu, chaymi Onesmusqa piensarqa ruedayoq sillapi tiyaspan wañunan punchawkama nanayninta aguantananpaq kasqanpi.

Onesmusqa Biblia estudiaytam qallaykurqa. Mamanmi ichaqa mana munarqachu huñunakuyninchikkunaman rinanta, payqa piensarqam imawanpas imanakuruspan aswanyarunanpaq kasqanpi. Chaymi iñiqmasinchikkunaqa huñunakuyninchikkunapi yachachikuykunata grabaspa uyarinanpaq wasinman apaqku. Ichaqa 5 killaña Bibliata estudiaspanmi huñunakuyninchikkunaman riy munasqanmanta willakurqa, manam manchakurqachu imapas pasarunantaqa.

¿Aswanyarurqachu Onesmusqa huñunakuyninchikman risqanwan? Manam, paymi nin: “Huñunakuypi kaptiyqa ima nanayniypas samaykuwasqanpaqmi rikchakuwaq”, nispa. Diospa promesankunamanta yachasqanwanmi allinña sientekurqa. Mamanpas kusisqallaña kasqanta qawaspanmi Biblia estudiayta qallaykurqa. Paymi nin: “Diosta serviyninqa hampi hinam”, nispa.

Chaymanta killakuna pasayllatam Onesmusqa manaraq bautizakuchkaspan predicaqña karqa. Tiempo pasasqanman hina bautizakuruspanmi kunanqa siervo ministerialña. Mana puriyta atispanpas chaynataq huknin brazon mana kuyuriptinpas payqa munarqam Jehova Diosta astawan serviyta. Precursor auxiliar kaytam munarqa ichaqa chaypaq papelcha huntachiytam manchapakurqa. ¿Imanasqa? Payqa piensarqam ruedayoq sillanta tanqaspa pipas sapa kutilla yanapananpaq kasqanpi. Precursor auxiliar kay munasqanmanta willakuptinmi iñiqmasinchikkunaqa yanapaykuyta munarqaku. Chayna yanapaykusqankuwanmi Onesmusqa precursor auxiliar karqa.

Precursor regular kayta munaspanpas manchapakurqam. Ichaqa sapa punchaw estudianapaq qellqata leesqanmi kallpancharqa. Chay yachachikuyqa karqa Salmo 34:8 nisqanman hinam, ninmi: ‘Pruebaspayá otaq servispayá yachaychik Diosqa allin kasqanta’, nispa. Chaypi yuyaymanaspanmi precursor regular kayta qallaykurqa. Kunanqa semanapim tawa kutita predicaq lloqsin, chaymantapas achka runakunamanmi Diosmanta yachachichkan, paykunapas allintam ñawparichkanku. 2010 kaq watapim rirqa Precursorkunapaq Escuelaman. Payqa astawan kusisqam tarikurqa puntata tariqnin iñiqmasinchik chay escuelapi yachachiq kasqanwan.

Paypa tayta-mamanqa wañukunkuñam, ichaqa congregacionninpi iñiqmasinchikkunañam ima necesitasqanpipas sapa punchaw yanapachkanku. Payqa anchatam agradecekun Jehova Dios tukuywan bendecisqanmanta, chaymantapas ‘manañam mayqannikichikpas ninkichikñachu: “Onqochkanim” nispaqa’, Diospa prometesqantam suyachkan (Is. 33:24).