Imatapas chayllaraq ruwayta qallarispaqa piensanchikmi: “¿Imapitaq kayqa yanapawanqa?”, nispa. ¿Allinchu kanman Dios mañakuyninchikmantapas chayna piensayninchik? Mañakusqanchik imapi yanapawasqanchikmanta yachay munasqanchikqa manam huchachu. Diosta yupaychaq Job sutiyuq runapas mañakusqanta Dios uyarisqanta utaq mana uyarisqanmantam yachayta munarqa (Job 9:16).

Huknin yachachikuypim yachamurqanchik runakunaqa costumbrenkuman hinalla utaq allinyayta munasqankuraykulla Diosta mañakusqankumanta. Jehova Diosqa mañakusqanchiktam uyariwanchik paypa munasqanman hina mañakusqaqa. Kallpanchawanchiktaqmi payman asuykunapaqpas (Santiago 4:8). ¿Imakunapim yanapawachwan Diosta sapa kutilla mañakusqanchikqa? Qatiqninpiyá yachasun.

¿Imawanpas sasachakusqaykiwanchu hukmanyasqa tarikunki? Chayna tarikuptikiqa bibliam kaynata nisunki: ‘Tukuy tiempoyá Diosta mañakuy’, nispa (1 Tesalonicenses 5:17). Chaymantapas ninmi: “Orakuspaykichikyá lliwta Diosman willaychik”, nispa (Filipenses 4:6). Nintaqmi: “Diosninchikmi hawkayachisunkichik runakunapa mana entiendey atinan hawkayaywan. Chaynapim imamantapas mana preocupakunkichikchu nitaq llakikunkichikchu”, nispa (Filipenses 4:7). Ima llakinchikmantapas Diosman willakuspaqa hawkayaytam tarisun. Bibliaqa niwanchiktaqmi: ‘Tayta Diosman sasachakuynikikunata saqiykuy, paymi yanapasunki’, nispa (Salmo 55:22, CQ12).

Jehova Diosta mañakusqankuwanmi enteron pachapi achka runakuna hawkayayta tarinku. Corea del Sur nacionmanta kaq warmim nirqa: “Llumpay  sasachakuypi kaspaymi Diosta mañakuni chaywan hawkayayta tarispaymi hawkalla kawsakuni”, nispa (Hee Ran). Filipinas nacionmanta kaq Ceciliapas nirqam: “Llumpaytam llakikuni iskay warmi wawaykunamanta, chaymantapas manaña riqsiwaqniy mamaytam uywani. Chaymi Diosta mañakuykuspay sapa punchaw ruwayniykunata hawkalla ruwani. Manam iskayrayanichu wawaykunatawan mamayta allinta uywanaypaq Jehova Dios yanapawananmantaqa”, nispa.

Imapas pasasusqaykiwan hukmanyasqa tarikuspaykiqa utaq wañuy patanpiña kaspaykiqa Diosta mañakuy kallpanchaykusunaykipaq. Chaynata ruwaspaqa hawkallam tarikunki. Bibliam nin: ‘Payqa llakipayakuq taytam [...]. Paymi kallpanchawanchik tukuy sasachakuyninchikpi’, nispa  (2 Corintios 1:3, 4). Jesusmi huk kutipi llumpay llakisqa tarikuspan ‘qunqurakuykuspan Diosta mañakurqa’. Hinaptinmi huk angel rikuriykamuspan kallpanchaykurqa (Lucas 22:41, 43). Diospa kamachisqanta ruwasqanrayku mana allin runakuna chiqniptinmi Nehemiaspas hukmanyasqa tarikurqa. Chaymi Diosta mañakurqa: ‘Kallpanchaykullawayá’, nispa. Chaynata mañakuptinmi Nehemiasta Dios kallpanchaykurqa mana manchakuspa ima ruwasqanta hinalla ruwananpaq (Nehemias 6:9-16). Reginald sutiyuq runam nirqa: “Sasachakuypi tarikuspayqa Diostam mañakuni, pay yanapaykuwananmantaqa manam iskayrayanichu, chayqa yanapawanmi hawkalla kawsakunaypaq”, nispa (Ghana). Mañakuptinchikqa Jehova Diosqa kallpanchaykuwasunmi.

Wakinpiqa imapaqpas tanteakusqanchikqa vidanchikpi allinninchikpaq utaq mana allinninchikpaqmi kanman. Chaynaqa, ¿imaynatam allinta tanteakuchwan? Bibliam nin: ‘Mayqannikichikpapas yachaynikichik pisilla kaptinqa, Diostayá mañakuychik, payqa lliw mañakuqninkunamanqa mana piñakuspam chaninninpi quykunqa’, nispa (Santiago 1:5). Diosta mañakuptinchikqa yachaytam quwasun imapaqpas allinta tanteakunapaq. Jesusmi nirqa: ‘Mañakuqkunamanqa hanaq pachapi kaq taytaykichikmi qusunkichik chuya espiritunta’, nispa (Lucas 11:13).

Jesucristopas imapaqpas tanteayta munaspanqa taytan Jehova Diostam mañakurqa yanapaykunanpaq. Chaymi 12 apostolninkunata akllananpaq ‘tukuy tuta mañakurqa’ (Lucas 6:12).

Jehova Diosta mañakuspa Jesus hina imapaqpas tanteakuqkunaqa kusisqam kawsakunku. Filipinas nacionpi kaq Reginam llumpay sasachakuypi tarikurqa. Qusan wañukuptinmi iskay wawankunata sapallan uywarqa, chaymantapas llamkapakunanpaqmi mana tarirqachu. ¿Imataq yanaparqa chayna sasachakuypi tarikuptin? Paymi nirqa: “Jehova Diosta mañakuspa paypi tukuy sunquywan hapipakusqaymi”, nispa. Huk runapas Diospa yanapayninta mañakusqanmantam nirqa: “Wasikunata ruwaypim llamkapakurqani ichaqa chaypi manaña llamkanaypaqmi niykuwarqaku. Chaymi allin llamkayta tarinaypaq Jehova Dios yanapaykuwananpaq mañakurqani. Payqa yanapaykuwarqam allin llamkayta tarinaypaq, chayqa yanapawanmi payta hinalla servinaypaq”, nispa (Kwabena, Ghana). Imapaqpas allinta tanteakunaykipaq Jehova Diosta mañakuptikiqa qamtapas yanapaykusunkim.

Diosta mañakusqanchik imakunapi yanapawasqanchikmantam wakillanmanta yacharunchik. (Astawan yachanaykipaq qaway “ Mañakusqanchikwan ima yanapakuykuna chaskisqanchikmanta” niq yachachikuyta). Mañakusqaykita Dios uyarisunaykita munaspaykiqa paymantam allinta yachanayki. Chaymi kallpanchaykiku Jehova Diospa testigonwan * yanapachikuspa bibliata estudianaykipaq. Bibliapi yachachisqanman hina Diosta mañakuptikiqa uyarisunkim (Salmo 65:2).