Kenia nacionpin iskay precursorkunata huk wasiman haykunankupaq invitarqanku, chaypin huk huch’uy runata cama patapi rikuspanku admirakurqanku. Cuerponpas makinkunapas nishu huch’uypunin karqan. Paykunan willarqanku ‘wist’ukunapas taruka hinaraqmi p’itanqa’ nispa Diospa promestesqanta, hinan uyan k’ancharirqanraq kusikuymanta (Is. 35:6).

Paypa sutinmi Onesmus, kunanqa tawa chunka watanpi hiñanan kashan, paymi nacerqan tullunpi onqoyniyoq (osteogénesis imperfecta). Tullunkunaqa p’akikuq vaso hinan, kallpawan hap’ispaqa p’akikunmanmi. Chay onqoyta mana ima hampipas qhaliyachiyta atisqanraykun payqa yuyaykurqan wañunankama silla de ruedaspi kaspa ñak’arinanta.

Onesmusqa Biblia estudiaytan qallarirqan. Ichaqa mamanmi mana munarqanchu huñunakuykunaman rinanta imaynapipas k’irikuspa astawan ñak’arinanta manchakuspa. Hinan iñiqmasikunaqa huñunakuykunapi yachachikusqanta grabaspa wasinpi uyarichiqku. Phisqa killaña Bibliata estudiashaspan ichaqa chhayna onqoyniyoqña kashaspapas huñunakuykunaman riyta munarqan.

¿Astawanchu ñak’arirqan huñunakuykunaman risqanrayku? Manan. Aswanpas paymi nin: “Huñunakuykunapi kaqtiymi nanayniyqa pisiyaq hina kaq”, nispa. Paytaqa sumaq suyakuymanta yachasqanmi chhaynata sientechiq. Mamanqa anchatan kusikurqan wawan allinta sientekusqanta rikuspa, chaymi paypas Bibliata estudiarqan. Payqa niqmi: “Wawaypa hampinqa Diosta serviymi”, nispa.

Chay qhepamanmi Onesmusqa predicayta qallarirqan, chaymantataq bautizakurqan, kunanqa iñiq t’aqanpin yanapakuq qhari kashan. Payqa manan puriyta atinchu huk makillanwantaqmi imatapas ruwan, chaywanpas tukuy atisqantan ruwayta munarqan Jehová Diosta servinanpaq. Precursor auxiliar kaytan munarqan, ichaqa manan payllaqa sillanta purichiyta atiqchu, hukpunin tanqanan karqan chaymi solicitudta mana hunt’arqanchu. Chay llakikuyninta iñiqmasikunaman willakuqtinmi paykunaqa “yanapasqaykikun” nirqanku. Chaynapin Onesmusqa precursor auxiliar kayta atirqan.

Precursor regular kayta munaspapas kaqllamantataqmi llakikurqan. Ichaqa huk kutinmi Salmo 34:8 textota leerqan sapa p’unchay textota t’aqwinapaq qelqapi, chaypin leerqan: “Reqsiykuychis, hinaspa rikuychis may sumaqchus Señor Diosqa kashasqanta”, nispa. Chayqa anchatan kallpacharqan, chaypi yuyaymanaspan precursor regular kananpaq decidikurqan. Kunanqa semanapi tawa p’unchaytan predican, askha runakunamantaqmi Bibliamanta yachachishan. 2010 watapin Precursorkunapaq Escuelaman rirqan. Chaypi yachachiqninmi karqan ñawpaq kutipi wasinman visitaq precursorkunamanta huknin, chaywanqa anchatachá kusikurqan.

Tayta-mamanqa wañupunkuñan, ichaqa iñiqmasikunan yanapashanku. Anchatan “gracias” nin askha bendicionkuna chaskisqanmanta, ancha kusikuywantaqmi suyakushan Isaías 33:24 textoq hunt’akunanta, chaypin nin: “Manan mayqellanpas: ‘Onqosqan kani’, ninqachu”, nispa.