Yaqapaschá ninki: “Diosqa yachanmi yuyaykusqayta imachus necesitasqaytapas, ¿imaraykutaq mañakunayri?”, nispa. Jesuspas nirqanmi: “Yayaykichisqa manaraq mañakushaqtiykichismi yachanña imakunatachus necesitasqaykichista”, nispa (Mateo 6:8). Ñawpaq Israel llaqtamanta rey Davidpas nirqan: “Manaraq rimarishaqtiymi, Señor Diosníy, qanqa llapantaña yachanki”, nispa (Salmo 139:4). Chhaynaqa, ¿imaraykun Diosmanta mañakunanchis? Chayta yachanapaq Bibliata qhawarisunchis. *

Bibliaq willasqan hina Jehová * Diosqa tukuyta yachan, ichaqa manan chayllatachu munan (Salmo 139:6; Romanos 11:33). Payqa manan huk computadora hinallachu imaymana informacionta ñoqanchismanta waqaychan. Aswanpas Diosqa ñoqanchiswan amigontin kayta munaspan sonqonchispi imachus yuyaykusqanchista reqsiyta munan (Salmo 139:23, 24; Santiago 4:8). Chaymi Jesusqa qatikuqninkunata kallpacharqan mañakushanallankupaq Jehová Dios yachanña imachus necesitasqanchista chaypas (Mateo 6:6-8). Sapa kutilla Kamaqninchiswan parlarisun chayqa, astawanmi paywan amigontin kasun.

Mayninpiqa manan yachanchischu ima mañakuyta. Diosmi ichaqa tukuy yachaq kayninpi entiendewanchis imatapunichus mañakuyta munasqanchista, hinaspa imachus necesitasqanchisman hina qowasun (Romanos 8:26, 27; Efesios 3:20). Kawsayninchispi Diospa yanapayninta reparaspataq astawan payman asuykusun.

Bibliaq willasqan hina Diosqa uyarinmi serviqninkunaq mañakusqanta, ichaqa manan llapa mañakuytachu uyarin. Ñawpa Israel llaqtapi millay kawsay yapakuqtinmi, Diosqa profeta Isaiaswan willachirqan: “Anchataña mañakuwaqtiykichispas, manan uyarisqaykichischu. Qankunaqa runa wañuchiqkunan kankichis”, nispa (Isaías 1:15). Chaypi nisqan hina, pikunachus Diospa kamachikuyninta mana kasukunkuchu otaq mana paypa munayninman hinachu mañakunku chayqa, manan uyarinchu (Proverbios 28:9; Santiago 4:3).

Biblian nin: ‘Munayninman hina imatapas Diosmanta mañakuqtinchisqa payqa uyariwanchismi’, nispa (1 Juan 5:14). Ichaqa mayninpiqa manan munasqanchisman hinapunichu kutichimunqa. Apóstol Pablon kinsa kutita mañakurqan ‘khiska t’ipasqa hina nanayninta’ Dios qhaliyachinanpaq (2 Corintios 12:7, 8). Yaqapaschá ñawinmanta onqosharqan. Apóstol Pabloqa qhaliyachirqanmi onqosqakunata, wañusqatapas kawsarichirqanmi, ichaqa manan atirqanchu qhaliyachikuyta, chaywanqa anchatachá llakikurqan (Hechos 19:11, 12; 20:9, 10). Manaña munasqanman hinachu kutichimurqan chaypas, agradecekurqanmi (2 Corintios 12:9, 10).

Ñawpa tiempopin Diosqa wakin serviqninkunaq mañakusqankuman milagrota ruwaspa kutichimurqan (2 Reyes 20:1-7). Maynillanpin ichaqa chayta ruwarqan. Wakinqa Diospa mana uyarisqan hina sientekuspanku sinchita llakikuqku. Hukninmi karqan rey David, paymi nirqan: “Señor Diosníy, ¿hayk’aqkamataq qonqapuwanki? ¿Wiñaypaqchu qonqapuwanki?”, nispa (Salmo 13:1). Ichaqa Jehová Diospa yanapasqanta yuyarispan astawan payman hap’ipakurqan. Chaymi mañakusqanpi nillarqantaq: “Ñoqaqa ancha munakuyniykimanmi k’askakuni”, nispa (Salmo 13:5). Kunan tiempopi Diosta serviqkunapas David hina askha kutita mañakunanchis kutichimusqanta reparananchiskama (Romanos 12:12).

Imachus necesitasqanchistan qowanchis.

Huk munakuq taytaqa manan wawanpa llapa mañakusqantachu qon nitaq kaqpachachu qonpas. Chhaynallataqmi Diosqa manan munasqanchisman hinachu nitaq kaq ratochu mañakusqanchisman kutichimuwasun. Chaywanpas, munakuq Taytanchisqa tiempollapin imachus necesitasqanchista qowasun (Lucas 11:11-13).

Mayninpin mana reparayllata kutichin.

Sichus llakikuypi kashaspa Diospa yanapayninta mañakuqtinchis mana sut’itachu rikusunman kutichimusqanta chayqa, ¿nisunmanchu: ‘Jehová Diosqa manan kutichimuwanchu’, nispa? Manan, yaqapaschá mana reparayllata kutichimuwarqanchisña. Yaqapaschá amigonchis necesitasqanchis ratopi yanapawarqanchis (Proverbios 17:17). Jehová Diospaschá payta kachamunman karqan. Otaq Biblia leesqanchispi allin yuyaychayta tarirqanchis llakikuyninchista atipananchispaq (2 Timoteo 3:16, 17).

Sasachayninchista allichananmantaqa Jehová Diosqa kallpatan qowanchis chayta atipanapaq (2 Corintios 4:7). Huk kutinmi Jesús sinchi llakikuypi tarikurqan, hinaspan Diosmanta mañakurqan chay llakikuymanta librasqa kananpaq. Jehová Diosmi ichaqa mana chaytachu ruwarqan, aswanpas huk angeltan kachamurqan payta kallpachananpaq (Lucas 22:42, 43). Kunanpas huk amigowanmi kallpachawasunman llakikuypi tarikuqtinchis (Proverbios 12:25). Qhawarisqanchis hina, mayninpin mana reparayllata Diosqa mañakusqanchisman kutichimunman, chaymi kallpachakunanchis chayta reparanapaq.

Tiempollanpin mañakusqanchisman kutichin.

Bibliaq nisqan hina Diosqa tiempollanpin humilde runakunaq mañakusqanman kutichimun (1 Pedro 5:6). Sichus Dios mana usqhayllachu mañakusqanchisman kutichimun chayqa, manan ninanchischu: “Diosqa manan ñoqapi interesakunchu”, nispa. Aswanpas yachayniyoq kayninpin payqa allinta qhawarin ima tiempopi mañakusqanchisman kutichimunanpaq.

Sichus huch’uy wawayki huk bicicletata mañakusunkiman chayri, ¿rantiwaqpachachu? Manachá. Aswanpas wiñanantaraqmi suyanayki kanqa, otaq chayta necesitaqtinña rantinayki kanqa. Diospas chhaynallatataqmi ruwan, sichus sapa kutilla paypa munayninman hina mañakusun chayqa tiempollanpi qowasunman sonqonchispi ima munasqanchista (Salmo 37:4).

Biblian llapa cristianokunata niwanchis mañakushanallanchispaq. Wakinqa ninmanpaschá: “Rimayqa facilyá, chay ruwaymi ichaqa sasa”, nispa. Ari, wakinpaqqa sasan kanman, astawanqa unayña hatun llakipi tarikuqtin. Chaywanpas Jesuspa nisqan hina mañakushanallanchispunin.

Jesusmi huk wakcha viudamanta willarqan, chay viudas sapa kutilla mana allin juezmanta yanapayta mañakuq (Lucas 18:1-3). Chay juezqa manas kasuqchu, chaymantas ichaqa nisqa: “Kay viudapaq qatiykachawasqanrayku chaninchapusaq, amaña hamupayawaspa pacienciayta tukuwananpaq”,  nispa (Lucas 18:4, 5). Griego rimaypi “pacienciayta tukuwan” nisqa simiqa tupan juezpa “ñawinta saqmaywan” otaq nisunman: “Viudan chay juezta p’enqayman churasharqan”, nispa. * Chaymi juezqa allin qhawarisqa kayta munaspa chay viudapaq chaninchapurqan, Jehová Diosninchismi ichaqa ancha munakuqllaña, chaymi payqa astawanraq ‘tuta-p’unchay mañakusqanchista’ kutichimuwasun. Jesusmi nirqan: “Usqhayllan paykunapaq chaninchapunqa”, nispa (Lucas 18:6-8).

Sichus ninki: “Diosqa manan mañakusqayta uyariwanchu”, nispa chayqa ama pisipaychu aswanpas mañakushallay. Chayta ruwaspan rikuchinki cheqaqtapuni Diospa yanapayninta necesitasqaykita, Diospa yanapaynintapas reparanki, chaywantaq astawan Diosman asuykunki. Sichus iñiywan Diospa munayninman hinataq mañakunki chayqa kutichimusunkipunin (Lucas 11:9).