Cada punllami maipi cashpapash shuj shuj llaquicuna tiashcata noticiacunapica uyapanchi. Chashna llaquicuna tiashcataca telepi, celularpi o internetpimi yalichin. Huaquinbicarin chashna noticiacunapica na ricuna cosascunataimanmi ricuchin.

 Chaicunataimanmi huaquinbicarin huahuacunaca ricun.

 ¿Chaicunamanda huahuacunata cuidangapaca imatata rurana capangui?

•  ¿Noticiacunata ricushca jipaca huahuacunahuanga imata pasan?

•  ¿Huahuacuna ama manllachun, ama llaqui llaqui sintirichunga imatata rurai ushapangui?

•  ¿Huahuacuna punda imapash pasashcata na cungai ushajpica imata rurana capangui?

•   Huahuacunaca manllanai noticiacunata ricushpaca ninandami manllarin. Huaquin huahuacunaca paicuna imashina sintirishcataca na villanllu, pero chai noticiacunata ricunaca paicunataca ninandami afectai ushan. a Por ejemplo noticiata ricushca jipa taitamamacuna ninanda preocuparijta ricushpaca huahuacunapashmi preocupari callarin.

•   Shuj noticiata ricushpa na ali intindimandami huahuacunaca pandacunatara pensai callarin. Por ejemplo huaquin huahuacunaca noticiacunata ricushpaca paicunapa familiatapash shinallata pasanga yashpami pensai callarin. Huaquimbica noticiacunapica imapash pasashcataca cutin cutinmi yalichin, chai noticiatallata cutin cutin ricushpaca huaquin huahuacunaca chai llaqui cutin cutin pasajushcatami pensai callarin.

•   Huahuacunaca ima noticiacunalla cierto cajtaca na cuenta japinllu. Huahuacunaca televisiongunapi noticiacuna culquita ganangapaj imapash noticiacunata yalichijtaca na yachanllu. Imapash noticiacunata televisionbi yalichijushpaca imatapash ashtahuan mirachishpami villan. Ashtahuan gentecuna chai programatalla ricuchunmi shina ruran.

•   Na yapa noticiacunata ricuchun saquinachu capangui. Huahuacunaca nima noticiatapash na ricunachu can nishpaca na ninajupanchichu. Pero yapata noticiacunata ricunapash paicunapaca na yapa alichu.

   “Huaquimbica imapash noticiata ricushca jipaca chai noticiamandami huahuacunapa ñaupapi parlai callarinchi. Chaicunata huahuacunapa ñaupapi parlashpaca paicunataca ninandami lastiman cashcanchi” (María).

   Bibliapica ninmi: “Runapaj shungupi llaquilla canami, ñavita urai cumuchin” (Proverbios 12:25).

•   Paicuna parlajujpi aliguta uyashpa, imashina sintirinajujtapash aliguta ricushpa tratapangui. Huahuacuna ima pasashcata na ni ushashpaca talvez dibujashpami ima pasashcataca ni ushanga. Huahuacunahuan parlajushpaca juyaihuan, cushilla parlapangui. Ima noticiata ricushcata yarichijunapash na minishtirinllu.

   “Ñucanchi ushiguca paipa ladopi tiarishpa pai parlajujpi aliguta uyajpimi tranquila sintirin. Huahuacunahuan parlajushpaca ‘imata ruraringa, acostumbrarinami canchi’ nishpaca na nijunachu capanchi’” (Sarahi).

   Bibliapica ninmi: “Aliguta uyajcuna, aliguta yarishpara rimajcuna cana canguichi” (Santiago 1:19).

•   Noticiapi ricushcashna ñucanchitapash pasanga yashpa ama pensanajuchun ayudapangui. Por ejemplo huahuacuna noticiacunapi pitapash secuestrashcata uyashpaca cada punlla tucui ladocunapi secuestranajun yashpami talvez pensai callaringa. Huahuacunamanga cangunata ama imapash pasachunmi tucuita ali ricurianajunchi nishpa intindichipangui. Caita siempre yaripangui, imapash pasajpillami noticiacunapica yalichin.

   “Huahuacunataca imatapash ricushpa ama yapata manllarichun, ama yapata llaquiyachunmi ayudana canchi. Huahuacunaca llaquilla cashpaca imacunatapashmi pensai callarin, chaimandami huahuacunataca ali cosascunapi pensarichun ayudana canchi. Shinallami paicunaca tranquilo sintiringa” (Lourdes).

   Bibliapica ninmi: “Aliguta yachajushca runapaj shunguca, aligutapacha yarichishpami rimachin. Ashtahuan ali shimicunatallami rimachin” (Proverbios 16:23).