Taita Diosca huaquin oraciongunata na uyanllu. Cai ishcai clase oraciongunatami Taita Diosca na uyan.

1. Taita Diospa voluntadta na pactachij oraciongunataca na uyanllu

 Taita Diosca paipa Shimi Bibliapi nishcashnaca, paipa munaita o paipa voluntadta na pactachij oraciongunataca na uyanllu (1 Juan 5:14). Por ejemplo, Bibliapica ambiciosocuna o culquita ninanda ansiarishpa munajcunaca, Taita Diospa Gobiernota herenciatashna japitaca na ushangachu ninmi. Culquimanda pugllaicunaca culquita ashtahuan ansiarishpa munachunmi animan (1 Corintios 6:​9, 10). Chaimandami Taita Diosca loteriata ganangapaj ayudahuai nishpa oracionda rurajpica na uyan. Taita Diosca na shuj magoshna tucui ñucanchi munashcata chai rato pactachinllu. Nali munaihuan rurashca oraciongunata Taita Dios na uyajta yachashpaca ñucanchica ninandami cushijunchi (Santiago 4:3).

2. Taita Diosta llaquichingapaj munaj personacunapa oraciongunataca na uyanllu

 Huaquingunaca Taita Diospa ñaupapi imacunata nali cashcata yachashpatami chaicunata rurashpa catin. Chaimandami paicunapa oraciongunata Taita Diosca na uyan. Na cazungapaj munaj gentecunaca Taita Diosca cashnami nirca: “Ninanda mañanajujpipash, ñapacha uyashachu” nishpa (Isaías 1:15). Paicuna arripintirishpa perdonda chasquingapaj esforzarishca cajpica, Taita Diosca paicunapa oraciongunataca uyanmanmi carca (Isaías 1:18).