Huaquin gentecunaca ninmi, shinalla catishpaca 2030 huatacamanga cada huatami 8 millón gentecuna huañunga nishpa. Ashtahuangarin ninmi, tabacomandami 2100 huatacamanga ashtaca ashtaca millón gentecuna huañunga nishpa.

Tabacopa culpamandami tucuicunallata llaqui apanchi. Tabacota chupador huañujpica paicunapa familiacunapashmi llaquirin, culqui problemacunatapashmi charin. Tabacota na chupadorcunapash tabaco cushnita mutijimandami cada huata 600 mil yali huañun. Tabaco chupadorcunata jambingapaca ashtaca culquimi minishtirin.

Shuj ungüicunapa jambi na tiajpipash, tabaco viciopaca jambi tianmi. Organización Mundial de la Saludpa directora general Margaret Chan shutica ninmi: “Tabacota chupana vicioca gentecunapa culpamandallatami tian. Shinapash gobiernocunahuan gentecunahuan ayudarishpaca chai viciota mishai ushanchimanmi” nishpa.

Ama ashtahuan gentecuna huañuchunmi agosto de 2012 huatapica casi 175 llactacuna tandanajushpa parlarirca campañacunata rurashun nishpa. * Shinapash cada huatami tabacota rurajcuna, jatujcunaca pobre llactamanda huarmicunapash, jovengunapash tabacota chupachun nishpa ashtaca millón dolarcunata propagandacunapi gashtashca. Tabacota chupadorcunapash vicio japishpami tabacota na saquingapaj munashpa ashtacacuna huañun. Tabacota chupanata na saquijpica shamuj 40 huatacunapica ashtahuan gentecunami huañunga.

Ashtaca propagandacuna llujshijpi, tabaco viciopi urmashpami ashtaca gentecunaca viciota saquingapaj munashpapash na ushashca. Naoko shuti huarmiguca ninmi, jovenmandapachami tabacota chupai callarircani. Televisiongunapi, peliculacunapi o imapash propagandacunapica importante gentecunallami tabacota chupan nishpami ricuchin carian nishpa. Taitamamacuna cáncer de pulmonhuan huañujta ricushpa, ishcai ushicunata viñachina cashpapash tabaco viciotaca na saqui usharcachu. Paica ninmi: “Cáncer de pulmón japinata manllashpa, tabaco cushnimanda ñuca ushicuna ungunata pinarishpapash tabacota saquitaca na usharcanichu. Ima horapash na saqui ushashachu yarcanimi” nishpa.

Shinapash Naoko shuti huarmiguca tabacota saqui usharcami. ¿Imashinata saqui usharca? ¿Imashinata shuj gentecunapash chai viciota saqui ushashca? Chaitaca shamuj temapi ricupashun.