Testigo de Jehovacunaca religionda cambiarichunga pitapash na obligapanchichu. Chaimandallatami ñucanchicuna llujchishca Villajun revistapica cashna nijuparca: “Gentecuna religionda cambiarichun obliganaca, nalipachami can” nishpa. a Ñucanchicunaca cai razongunamandami pitapash na obligapanchi:

•   Jesusca paipa yachachishcacunata gentecuna crichunga, nunca na obligarcachu. Paica ashacunalla alicachishpa uyanatami ali yacharca (Mateo 7:13, 14). Shuj viajeca, pai yachachijujpimi huaquin discipulocunaca Jesús imata yachachijushcataca nalicachishpa uyarca. Shina pasajpica Jesusca, quidaichi nishpaimanga na obligarcachu, richunmi saquircalla (Juan 6:60-62, 66-68).

•   Jesusca paipa discipulocunataca, quiquingunata uyachunga pitapash na obliganachu canguichi nishpami yachachirca. Chaipa randica, uyangapaj dispuesto caj gentecunata, ali chasquijcunatami mascana canguichi nircami (Mateo 10:7, 11-14).

•   A la fuerzaca pipash na religiondaca cambiarinachu can. Porque Taita Diosca gentecuna paicunapa munai paitalla adorachun, paitalla sirvichunmi munan. Paita sirvichunga nipita na obliganllu (Deuteronomio 6:4, 5; Mateo 22:37, 38).

 Testigo de Jehovacunaca, Bibliapi nishcashnami ‘huasin huasin rishpa’ ‘mundo entero llactacunapi villachinchi’ (Hechos 1:8; 10:42; 20:20). Chaimandami ñucanchitaca callari primer cristianocunatashnallata, religiondaca a la fuerzami gentecunataca cambiachingapaj munanajun nishpa juchachin (Hechos 18:12, 13). Shinapash ñucanchicunaca na chaitaca rurapanchichu. Ñucanchica gentecunata respetaimandami, cada uno decidichun saquipanchi. Testigo de Jehovacunaca tucui gentecunallata Bibliamanda yachajushpa, paicunallata maijan religionman pertenecingapaj munashcata decidichunmi munapanchi.

 Ñucanchi crishcacunata shujcunapash crichunga na obligapanchichu. Jesusta ali catinajushcamandami política cosascunapica na participanchi. Ni politicocunatapash na apoyanchi. Shujcunapash testigo de Jehovacuna tucuchun nishpapash, culquita o imapash ayudacunataca na cupanchichu. Testigo de Jehovacunaca, cristianocunami canchi ninajushpapash, Jesús yachachishcata na pactachij gentecunashnaca na capanchichu. b

 Bibliapica tauca gentecuna paicunapa taitamamacunapa religionda na catishcatami ricuchin. Paicunallatami ima religionda catinataca agllarca. Por ejemplo Abrahán runagu, Rut shuti huarmigu, Atenas llactamanda huaquin gentecuna y apóstol Pablopashmi religiondaca cambiarirca (Josué 24:2; Rut 1:14-16; Hechos 17:22, 30-34; Gálatas 1:14, 23). Shinapash Bibliapica Taita Dios alicachishca religionmanda llujshishca gentecunamandapashmi parlan. Paicunaca imata decidishcatami catita ushan, paicunapa derechomi can (1 Juan 2:19).

 Organización de las Naciones Unidaspa, Declaración Universal de Derechos Humanos nishca documentopica cashnami nijun: “Mundo enteromanda gentecunami derechocunata charin” nishpa. Chai documentopica, “tucuicunallatami religionda cambiaringapaj munashpa o imata crishcata cambiangapaj munashpaca cambiaringapaj derechota charin” nishpa. Shinallata imatapash investigangapaj, imapash informacionda chasquingapaj, shujcunamanbash villachingapaj derechota charishcatapashmi nijun. Shina nishpaca shuj religionbi imata crishcatapash shujcunaman parlai ushashcatami nin. c Cai derechocunata tucuicuna charishcamandaca, shujcunapash ñucanchi crishcacunata na chasquishpa, paicunapa crishcacunata difindinataca yaipimi charina capanchi.

 Bibliapica ima religionda charijpipash, tucui gentecunata respetachunmi mandan (1 Pedro 2:17). Shinallata Bibliapica, taitamamacunata cazunami canguichi ninmi. Chai mandamientotami testigo de Jehovacunaca cazupanchi. Ñucanchi taitamamacuna shuj religionda charijpipashmi, paicunataca respetapanchi (Efesios 6:2, 3).

 Shinapash na tucui familiacunachu Bibliapi imata mandashcataca alicachin. Por ejemplo, Zambia llactamanda shuj huarmiguca ninmi: “Ñuca llactapi gentecunaca pipash shuj religionda catijpica familiata, comunidadta traicionajuj cuendami can” ninmi. Gentecuna chashna ricujpipashmi, chai huarmigu solterayajushpaca testigo de Jehovacunahuan Bibliata yachajui callarirca y testigo de Jehová canatami decidirca. Paica ninmi: “Ñuca taita y ñuca mamitaca, ‘religionda cambiarishpaca ñucanchitami nalipacha sintichishcangui, canhuanga ninandami culirashcacuna canchi nihuarcami’ ninmi. Shina nihuajpica ninandami llaquirircani, porque paicunataca ninandami juyani y yanga costumbrecunata ñana catijushcamandallaca na ningapaj munanllu que ñana ñuca familiacunata juyashcata. Sino que Jehová Dios munashcashna cangapaj munaimandami chashnaca rurani” ninmi. d