27 de junio de 2021 punllata, shuj grabashca programapica Traducción del Nuevo Mundo Biblia aparatocunapi utilizangapaj aimara shimipi llujshishcatami villarca. Bolivia llactapi tucuilla congregaciongunapash, grupocunapashmi chai programataca ricuita usharca. Bolivia llactamanda Comité de Sucursalpi sirvij Nelvo Cavalieri shuti huauquimi cai mushuj Biblia llujshishcata villarca.

• 1 millón 600 mil yali gentecunami aimara shimitaca parlan. Paicunaca Titicaca shuti jatun lagomanda ladolla llactacunapimi ashtahuanbachaca causan. Chai lagoca Andes shuti urcucunapimi can

• Bolivia llactapica runa gentecunapa 36 shimicunami llactapa oficial shimicuna can. Bolivia llactapi runa gentecunapa chai idiomacunamandaca aimara shimimi segundo ashtahuan parlashca shimi can

• Más o menos 2 mil publicadorcunami Argentina, Bolivia, Brasil, Chile, Perú llactacunapi aimara shimita parlaj 60 yali congregaciongunapi sirvin

• Cai Bibliata traducingapaca, 6 traductorcunami chuscu huatacunata trabajarca

Shuj traductorca nircami: “Cai Bibliaca aimara shimita parlaj gentecunaman Jehová Diosmanda shuj alipacha valishca regalomi can. Cunanga paicuna parlashca shimipi, paicuna intindishca shimipimi Bibliataca liita ushan. Jehová Diosllata paicunapa shunguman chayajta parlajushcatami sintinga” nishpa.

Bolivia llactamanda Comité de Sucursalpi sirvij Mauricio Handal shuti huauquipash nircami: “2017 huatapi Escrituras Griegas Cristianas aimara shimipi llujshishcamandapachami, chai traducción shunguman chayashcamandaca ashtacacuna agradicinajushca. Cunanga Biblia completotami charipanchi. Cai Bibliaca gentecuna parlashcashanallata escribishca, intindirinallami can. Cai Bibliata liishpa gentecuna aliguta intindinata, Jehová Diosman quimirinataca seguromi capanchi” nishpa.

Cai Bibliata charishcamandaca, aimara shimita parlaj ñucanchi huauquipanigucuna shuj salmista runagushna Jehová Diosman cai shimicunata ningapaj munanatami yachapanchi: ‘Can quishpichinata shuyashpa, canba Shimipi nijujta yariashpami shuyajuni” nishpa (Salmos 119:81).