Néna in bonpé la pèrd in moun zot té i èm é té in gran soufrans pou zot, akoz sa, zot i poz azot bann kèstion la. Banna i rod pa rienk bann répons, mé osi in soulajman. Néna dot, kan zot i pans la Shoah a, pou zot sé lo pli pir ké in moun lé kapab fé, é zot i gingn pu kroir Bondié.

 Sak domoun i pans : Lé pa bien domand anou poukosa Bondié la lès la Shoah arivé.

 An vré : Domoun navé in bonpé la foi la poz azot kèstion la : akoz Bondié la lès la méchansté arivé ? Par égzanp, lo profèt Abakuk la domand Bondié : « Koman ou pé aksèp lo malèr arivé san fé rien ? Otour d’moin néna rienk la violans é lo pli for i abuz su lo pli fèb » (Abakuk 1:3, Bib an fransé kouran). Olèr k’fé Abakuk roproch, Bondié la mèt sa dan la Bib, komsa chakèn i gingn lir ali.

 Sak domoun i pans : Bondié i fé pa in kont kan domoun i souf.

 An vré : Bondié i suport pa la méchansté é tout lo bann doulèr k’i ariv avèk (Provèrb 6:16-19). Dann tan Noé, la « fé mal son kèr » kan li la vu la tèr té ranpli èk la violans (Jénèz 6:5, 6). Lé sur, kan lavé la Shoah son kèr la sègné (Malaki 3:6).

 Sak domoun i pans : Bondié la utiliz la Shoah pou puni bann Juif.

 An vré : Dann tan promié sièk, lé vré, Bondié la lès bann Romin détrui Jéruzalèm (Matié 23:37–24:2). Mé dépi sa, li puni pa é li prèfèr pa in pèp plis k’in not. Pou li, « na poin diférans ant bann Juif é sak lé pa Juif » (Romin 10:12, Bib an fransé kouran).

 Sak domoun i pans : Si néna vréman in Bondié toupuisan é ranpli èk lamour, akoz li la pa anpèch la Shoah arivé.

 An vré : Bondié lé jamé lotèr la soufrans, mé nadfoi li lès bann zafèr la arivé, mé pou in tan (Jak 1:13 ; 5:11).

 Bondié la lès tout lo bann soufrans é la Shoah arivé, pou lo mèm rézon : sé pou règ in problèm la arivé na lontan. La Bib i amont bien sé Satan k’i dirij lo monn, mé pa Bondié (Luk 4:1, 2, 6 ; Jan 12:31). Andsou lartik la, nora « Agard sa osi », va èspliké ankor plis poukosa Bondié i pèrmèt la soufrans. Alon oir dé vérité inportan dan la Bib, ké va èspliké akoz Bondié la lès la Shoah arivé.

1.   Bondié la fé domoun èk la libèrté fé bann choi. Bondié la di Adan èk Èv, bann promié moun, sak li èmré k’zot i fé. Mé li la jamé oblij azot obéi ali. Zot la choizi par zot mèm, kosa lé bien é kosa lé mal. Zot la fé bann mové choi é dépi sa, toultan bann domoun la pran bann mové désizion. Akoz sa, lo monn antié la vni plizanpli pir (Jénèz 2:17 ; 3:6 ; Romin 5:12). Sé sak lo liv Énoncé des principes du judaïsme conservateur (anglé) i di : « Si jordi néna in ta soufrans dan lo monn, sé parské nou la mal ansèrv nout libèrté pou choizi. » Olèr k’anlèv azot zot libèrté pou choizi, Bondié la préfèr lès domoun ésèy dirij azot par zot mèm pou in tan.

2.   Bondié i gingn é li vé répar lo bann déga la Shoah la fé. Bondié la promèt rodone la vi bann milion domoun, an parmi néna sak lé mor akoz la Shoah. Bann rèskapé la pas martir. Sé pou sa Bondié va anlèv la doulèr ké néna dan zot kèr akoz bann mové souvnir la (Izai 65:17 ; Akt 24:15). Kom Bondié i èm anou, lé sur li va ténir son bann promès (Jan 3:16).

 Bonpé rèskapé la Shoah la gard zot foi é zot la konpran poukosa zot i viv. Kosa la èd azot fé sa ? Banna la konpran poukosa Bondié i lès lo mal èk la méchansté arivé é osi parské banna i koné ké li va répar tousala.