Lo péché sé in zafèr ké nou fé, ké nou pans oubien in santiman, ké lé pa an akor avèk sak Bondié i domand anou. Sa i vé dir, dézobèi bann loi Bondié i done anou é fé lo mal, otroman di fé sak, pou Bondié, lé pa jus (1 Jan 3:4 ; 5:17). La Bib i di osi ké si in moun i koné sak lé bon, mé k’li fé pa,sa osi sé in péché. (Jak 4:17).

 Dan bann lang la utilizé promié débu pou ékri la Bib, lo bann mo tradui par péché i vé dir « rat sak ou viz », sétadir out lintansion. Par égzanp bann solda Israèl dann tan avan, zot té si tan tèlman gabié pou manié la frond, ké « navé poin jamé inn té i rat » sak zot té i viz. Si i tradui mo pou mo, i pouré dir « té fé pa d’péché » (Juj 20:16). Donk, fé bann péché i vé dir rat sak ou viz, sétadir bann loi Bondié k’lé parfé.

 Kom sé li la fé tout zafèr, Bondié néna lo droi désid sak lé bon é sak lé pa bon pou tout domoun (Révélasion 4:11). Pou tout sak nou fé, nou néna d’kont pou rand ali (Romin 14:12).

Èské lé posib pa fé d’péché dutou?

 Non. La Bib i di ké « tout domoun la péché é na poin inn i gingn ariv koté la gloir Bondié » (Romin 3:23 ; 1 Roi 8:46 ; Éklézias 7:20 ; 1 Jan 1:8). Poukosa sa ?

 Bann promié moun su la tèr, Adan èk Èv, navé poin d’péché. Sé parské Bondié lavé fé azot parfé, kom li (Jénèz 1:27). Mé kan zot la dézobéi Bondié, zot la pèrd zot vi parfé (Jénèz 3:5, 6, 17-19). Akoz sa zot bann zanfan osi la gingn bann mèm défo, zot té fé bann péché, é zot té pu parfé (Romin 5:12). Parèy kom David, in roi Israèl la di « Moin néna la mark lo péché dépi k’moin lé né » (Psom 51:5, Bible en français courant).

Èské désèrtin péché lé pli grav ké dot ?

 Oui. Par égzanp, la Bib i di ké bann bonom ké té abit la vil Sodom lété « mové », ké zot té i fé « bann gran péché » é ké zot péché lété « bien lour » (Jénèz 13:13 ; 18:20). Alon oir troi zafèr ké va èd anou konpran akoz in péché lé grav ou i pèz bien lour.

1.   Grav koman ?La Bib i mèt anou an gard kont bann péché grav kom, fé bann péché sèksuèl, ador bann fo bondié, volé, boir pou èt sou, abuz su domoun, tué domoun, é fé lo sor (1 Korintien 6:9-11 ; Révélasion 21:8). Èl i fé in diférans avèk bann péché k’i fé san réfléchi ou san fé èspré, kom bann kozman ou bann zafèr k’nou fé é k’i fé mal lé zot (Provèrb 12:18 ; Éfézien 4:31, 32). Malgré sa, la Bib i di pa nou, fé pa in kont èk bann péché la, parské sa i pé pous anou pou fé bann zafèr pli grav kont bann loi Bondié (Matié 5:27, 28).

2.   Lintansion. Détroi moun i fé d’péché parské zot i koné pa la volonté Bondié (Akt 17:30 ; 1 Timoté 1:13). Mèm si la Bib i èskiz pa bann péché la, èl i fé in diférans avèk bann péché k’lé fé èksopré pou dézobéi bann loi Bondié (Nonm 15:30, 31). Bann péché fé èksopré i sort dann in « kèr mové » (Jérémi 16:12).

3.   Konbien d’foi ? La Bib i fé osi in diférans ant in péché k’i fé tanzantan, é in péché k’i fé pandan in bon bout d’tan (1 Jan 3:4-8). Sak i fé « èksopré fé bann péché », mèm si zot la fine konèt fé sak lé jus, Bondié i kondane azot. (Ébré 10:26, 27).

 Sak la fé bann péché grav i pé santi azot komsi sa i pèz azot atèr. Par égzanp, lo roi David la ékri: « Mon bann fot la mont pli o k’mon tèt ; parèy kom in fardo bien lour, zot lé vnu tro lour pou moin gingn suporté » (Psom 38:4). Malgré sa, la Bib i done anou lèspoir la : « Ké lo méchan i kit son mové chemin é lo bonom mové, son bann pansé ; ké li rovien vèr Jéova, ké nora pitié d’li, oui a nout Bondié, parské li pardone larjman. » (Izai 55:7).