Росԥэн, мангав тут пала пэско децтво.

Мэ арақаделэм андо 1943 бэрш андэ Италия. Амаро ери жувэлас андо найбаро гаворо. Мэрно дад ритярэлас ферма и терэлас анда каш разни изделия. И родителя барярэнас ман и мэрнэ ԥралэн и ԥэян андэ католическо вера.

Васо ту закамлян тэ ашэс рашаса?

Кала мэ сымас цыкноро, манди чалёлас тэ ашунав, со росԥэнэнас и рашая. Мэ любисаравас тэ ашунав лэндирэ ӷолосоря, ай кадяжэ тэ диқав, сар вонэ проандярэн и служба. Важ када мэ закамлэм тэ ашав рашаса. Кала манди сас 13 бэрш и мама отдя ман андэ школа-интернат, кай лэ шаворэн сытярэнас, кай посли вонэ тэ ашэн рашанса.

Сытёнас тумэ котэ па Библия?

В общем то най. Кала манди сас 15 бэрш, ек учителё дя манди Евангелия, када пала лэ Иисусостири жызня и служэния, мэ най еқвар ла проадиносардэм. Кала манди сас 18 бэрш, мэ лаглэм андо Римо, котэ мэ сытювавас андэ трин рашаицки университеторя, пала савэ диқэлас екжэно о Папа Римско. Котэ мэ изучал богословие, история, философия, психология, ай кадяжэ латинско и ӷреческо шыб. И хоть амэ адиносарасас и библейски стихоря наизусть и ашунасас и Библия пэ воскресно служба, па чачимастэ, и Библия амэ нэ изучали.

Ту сытярэсас па Библия аврэн?

Хоть май бут мэ теравас бути андэ администрацыя, но мэ кадяжэ сытяравас аврэн важ о Дуйто Ватиканско соборо.

Васо ту лян тэ на допатяс, кай тири вера чачуни?

Мэ пэрэжывал пала трин маменторя. Пэрво, када кай и қандири ӷулел андэ политика. Дуйто, када кай на шон сама по билажавардимос, саво терэлпэ кай и рашая, и кай и мануша, савэ котэ тэлён. И трито, када кай манди здэласпэ дэсо нэправильно анда кода, сости сытярэнас и католически қандиря. Например, сар можэт о любящё Дэл тэ мучий вечно лэ манушэн посли лэндири смэрть? Или разве о Дэл камэл, кай амэ бут разоря тэ повторяем и молитвы и тэ пэрэбираем и чётки? *

Со ту ришыл тэ терэс?

Мэ мангавас лэ Дэвлэс ясвэнца, кай во тэ сыкавэл манди о дром. Мэ кадяжэ тиндэм каталическо «Иерусалимско Библия», сави кати вимэклэ пэ итальянско шыб, и лэм ла тэ адиносарав. Еқвар утром посли воскресно служба, кала мэ вешал пэстири рашаицко ӥда, андэ семинария авелэ дуй мурша. Вонэ сас лэ Иеговастирэ свидетеля. Май бут часостар амэ дасас дума пала Библия и пала кода, со́ андэр латэ пистромэ пала чачуни вера.

Со посли када ту погиндосардян пала кадэла мануша?

Манди чалеля, кай вонэ екжэнэ фартэ патянас андэ кода, со росԥэнэнас, и драго ӷанэнас и католическо Библия. Май позжэ мандэ ля тэ авэл авэр лэ Иеговаско свидетелё, савэс ақарэнас Марио. Кажно суббота во постоянно андэ любо поӷода авэлас мандэ андэ семинария и в 9 часов утра ужэ звонияс андэ вудара.

Сар пэ када диқэнас авэр рашая?

Мэ ақаравас лэн, кай вонэ тожэ тэ авэн, кала амэ розласас и Библия, но нико андар лэндэ на диқэлас пэ када серьёзно. Ай манди фартэ чалёлас ла изучать. Мэ арақлэм атветоря, савэ линэ ман лэ одестар, пэ вопросоря, савэ мэ дэлмут родавас, например, васо о Дэл домэкэл найлашимос и биды.

Ԥэнэнас и май барэ рашая, кай тэ ашавэс тэ сытёс па Библия?

Андо 1975 бэрш мэ най еқвар лаглэмас андо Римо, кай тэ росԥэнав, андэр со мэ патяв. И май барэ рашая дэнас дума манца, кай мэ тэ парашав тэ патяв андэ када, но нико андар лэндэ на доԥэндя пэстирэ алава па Библия. Важ када 9 января, андо 1976 бэрш, мэ пистросардэм письмо андо Римо, кай мэ отԥэнделэм тэ авав католико. Через дуй дес мэ улаглэмтар анда семинария и лаглэм по поездо пэ пэстири пэрво собрания кай лэ Иеговастирэ свидетеля. И вижыля, кай мэ попэлэм по канӷрэсо, пэ саво сас фартэ бут манушэн. Котэ сас вся па аврятэ, най кадя, сар мэ присытелэм. Кай кажно свидетелё сас пэстири Библия, и всаворэ ла ԥэрнавэнас, кала о мануш па сцэна росԥэнэнас варисави библейско тема.

Сар пэ када диқля тиро ери?

Бут ко анда мэрно ери фартэ тасавэнас пэр мандэ. Но мэ уӷанглэм, кай ек анда мэрнэ ԥрала, саво жувэл андэ Ломбардия, по северо андэ Италии, сытёл па Библия лэ Иеговастирэ свидетелёнэнца. Мэ лаглэм тэ диқавпэ лэса. Котэ и свидетеля поможысардэ манди тэ арақав бути и кай тэ жував. Май позжэ андэ кодэва жэ бэрш, мэ болделэм сар лэ Иеговаско свидетелё.

Жалееш пала пэстири ришэния?

Ни ӷрама. Мэ диқав, кай па чачимастэ пашэлэм каринг о Дэл, важ кода кай акана мэ точно ӷанав вся анда Библия, ай най анда философия и қандири. И акана мэ моӷу тэ сытярав аврэн вужэ одеса и патяимаса.