Андэ Библия алав «душа» пэ еврейско шыб пэрэандярдёл не́феш и пэ ӷреческо шыб психе́. О еврейско алав ворта сыкавэл «тварения, сави ԥурдэл», ай о ӷреческо алав «жунди создания» a. Вижал, душа — када екжэно о мануш или жывотно, ай най кода, со андэ тила, со потом посли смэрть на парашэл тэ жувэл. Роздиқаса, сар па Библия ашэл понятно, кай и душа — када екжэно о мануш.

•   Кала о Дэл Иегова создал лэ пэрвонэ манушэс лэ Адамос, тоди, сар ԥэнэнпэ андэ Библия, во ашэля жунди душа (Бытие 2:7). Лэ Адамости на сас дино душа, во ашэля жунди душа или мануш.

•   Сар ԥэнэнпэ андэ Библия, и душа можэт тэ терэл бути, тэ авэл боқали, тэ хал, тэ кандэл лэ властен и тэ лэлпэ каринг о трупо (Левит 5:2; 7:20; 23:30; Второзаконие 12:20; Римлянам 13:1). Вся када терэл о мануш, ай най варисави-та лэстири «часть».

Можэт тэ мэрэл и душа?

 Да, и душа можэт тэ мэрэл. Бут стихоря андэ Библия сыкавэн, кай и душа можэт тэ мэрэл. Акэ дэсавэ стихоря пала када:

•   «[И душа, сави] терэл бэзэх, мэрэла» (Иезекииль 18:4, 20).

•   Андэ дэлмутни время андо Израилё важ само баро бэзэх, трэбуй сас акэ сар наказать: «[Кодэя душа] трэбуй тэ умарэн» (Исход 12:15, 19; Левит 7:20, 21, 27; 19:8). «Ай кодэва, ко стерэла варисаво найлашимос андэ суббота, лэс трэбуй тэ умарэн» (Исход 31:14)

•   О алав, саво ворта пэрэандярдёл, сар «мули душа» андэ дэсавэ библейски стихоря пистромэ, кала и дума жал пала лэ манушэско трупо (Левит 21:11; Числа 6:6). И хоть андэ бут переводоря Библии, андэ кадэла стихоря используеца алав «мули тила» или «муло» андо пэрво еврейско тексто тердёл алав не́феш, када «душа».

И «душа» можэт означать «жызня»

 Андэ Библия алав «душа» и «жызня» дэкала стон сар синонимо. Например, андэ Иов 33:22 о еврейско алав не́феш означает «жызня». Кадяжэ андэ Библия ԥэнэнпэ, кай о мануш можэт тэ рискует пэстиря душаса, то есть ла жызняса, или тэ хасарэл ла (Исход 4:19; Судей 9:17; Филиппийцам 2:30).

 Кай тэ полас, со означает о алав «душа», поможый о стихо анда Бытие 35:18, андэ саво ԥэнэнпэ, кай и душа «вижалас». Кадэва образно алав сыкавэл, кай о мануш парашэл тэ жувэл. Дэсавэ переводоря Библии пэрэдэн о гиндо анда Бытие 35:18, сар «измэкэл о духо».

Катар жыля, кай и душа нэ можэт тэ мэрэл?

 И христиански веры сытярэн кадэлэсти най анда Библия, ай линэ анда дэлмутни ӷреческо философия. Андэ «Библейско инцыклапедия» пистромэ: «Кай андэ Библия ԥэнэнпэ пала полностью мануш, ай най пала варисави-та часть. Катэ нисо на ԥэнэнпэ пала бесмертно душа, сави бэшэл андэ ӷрешно тила и андэ тила, сави можэт тэ римойпэ». Ай андэ «Теологическо инцыклапедическо словарё» пистромэ акэ со: «Кай андэ Қандири, сави стердэ посли апосталоря, пала душа сытярэнас па кода, со ԥэнэнпэ андэ ӷреческо философия».

 Лэ Дэвлэсти на чалёл, кала ӷамин кода, сости во сытярэл, кодэлэса, сави философия росԥэнэн и мануша, кала линэ тэ сытярэн пала бесмертно душа. Ай акэ со пистромэ андэ Библия: «Диқэн, кай нико тэ на залэл тумэн андо рабство через и мудрость кадэлэ миростири и через хохавни и ӥвутни дума. Вся када ритярдёл пэ традицыи, пэ принцыпоря кадэлэ мирости» (Колоссянам 2:8).