1. Xana i yini paradeyisi dzra moya, nakone hi tiyimisele ku yentxa yini?

 LANI misaveni ku ni Paradeyisi dzra ku fanekisela ledzri nga ni vhanu vanyingi lava yentxaka mintizro yinyingi leyinene, dzri tale hi vhanu vanyingi lava tikholisaka hi ku zrula ka ntiyiso. Kutani lava va nga ka paradeyisi ledzri va tiyimiseli kuva va nga humi ka dzrone. Nakone va djula leswaku vhanu vanyingi va tipatsra na vone ka xiyimu lexi xa ku hlawuleka. I yini? I paradeyisi dzra moya! a

2. I yini leswi nyonxisaka ka paradeyisi dzra moya?

² Lexi hlamalisaka, Yehovha a tumbuluxe paradeyisi dzra moya ledzri nga ni vhanu va ku zrula ni wumun’we, nambileswi va hanyaka ka misava ya Sathana leyi taliki hi wubihi lani vhanu va kone va nyenyanaka. (1 Yoh. 5:19; Mpful. 12:12) Xikwembu Nkulukumba wezru wa lizrandzru awa swi vona swikazratu leswi tisiwaka hi misava leyi, kambe a yentxa leswaku malandzra yake ma sizreleleka akuva ma mu tizrela na ma nyonxile. Bibele dzri tlhamuxela paradeyisi dzra moya swanga ‘vutumbelo’ lebyi sizrelelekiki ni ‘nsimu leyi txheletiwaka’. (Eza. 4:6; 58:11) Hi ku tovokisiwa hi Yehovha, lava hanyaka ka paradeyisi ledzro va ni ku nyonxa nakone va sizrelelekile nambileswi va hanyaka ka masiku lawa ya wugamu ya ku kazrata.—Eza. 54:14; 2 Tim. 3:1.

3. Xana wuprofeta lebyi tsraliwiki ka Ezaya 65 byi hetiseke hi ndlela yini a Israyele?

³ Hi ku tizrisa muprofeta Ezaya, Yehovha a tlhamuxele leswi wutomi bya vhanu lava nga ka paradeyisi dzra moya dzri taka tsrhamisisa xiswone. A ntlhamuxelo wa wuprofeta lebyo u nga byi kuma ka Ezaya ndzrima 65, lebyi hetisekeke hi khambi dzra ku sungula hi lembe dzra 537 N.N.Y. A nkameni luwani a Vayuda  lava tisoliki va ntsrhunxiwile a wukazraweni a Babilona va va va tlhelela a tikweni dzravu. Yehovha a tovokise vhanu vake nakone a va pfune ku pfuxeta doropa dzra Yerusalema ledzri a dzri hohlotiwile va tlhela va pfuxeta ni tempele leswaku va gandzrela Yehovha kone.—Eza. 51:11; Zak. 8:3.

4. Xana wuprofeta lebyi kumekaka ka Ezaya 65 byi hetiseka hi ndlela yini masikwini yezru?

⁴ A wuprofeta bya Ezaya byi tlhele byi hetiseka hi khambi dzra wubidzri hi 1919 N.Y. loko vagandzreli va Yehovha va le masikwini yezru va ntsrhunxiwa ka Babilona Lwenkulu. Xileswo, a paradeyisi dzra moya dzri sungule ku ndlandlamuka a misaveni hinkwayu. Vazrezri vanyingi va ku hiseka, va simeke mabandla manyingi lawa ma bekiki mihandzru ya moya. Vavanuna ni vavasati vanyingi lava a va ni tihanyi va tlhela va tikhoma hi ndlela ya ku biha va “yambala wumhunu lebyimpshwa lebyi fambisanaka ni ku zrandzra ka Xikwembu Nkulukumba”. (Efe. 4:24) Swi le livaleni leswaku matovoko manyingi lawa muprofeta Ezaya a khaneliki ha wone, ma ta hetiseka a nkameni lowu taka a misaveni leyimpshwa. Kambe nambi swoswi lava nga ka paradeyisi dzra moya ku ni matovoko lawa va tikholisaka ha wone. A hi voneni ndlela leyi paradeyisi ledzro dzri hi khumbaka ha yone ni leswaku ha yini hi nga fanelanga ku dzri tsrhika.

NDLELA LEYI LAVA NGA KA PARADEYISI DZRA MOYA VA TITWAKA HA YONE

5. Swanga hi lani swi dumbisiwiki ha kone ka Ezaya 65:13 he wani matovoko lawa hi ma kumaka a paradeyisini dzra moya?

⁵ Lihanyu ledzrinene ni ku tiyisiwa. A wuprofeta bya Ezaya byi kombisa ku hambana a makazri ka lava nga ka paradeyisi dzra moya ni lava nga handle ka dzrone. (Dondzra Ezaya 65:13.) Yehovha, hi lizrandzru a nyika malandzra yake hinkwaswu leswi ma swi vilelaka hi tlhelo dzra moya akuva ma tama ma va kusuhi na yene. Hi ni moya wa ku xwenga, Zritu dzrake ni swakuda swa moya leswi hi nga swi ‘daka, . . . hi nwa . . . [ni] kuva hi tsrhava’. (Dzringanisa ni Mpfuletelo 22:17.) Hi tlhelo dzrin’wana, lava nga handle ka paradeyisi dzra moya va ni ‘ndlala . . . , tozra . . . , [ni] tingana’. Xileswo a va na wuxaka na Xikwembu Nkulukumba.—Amo. 8:11.

6. Xana buku dzra Yoel 2:21-24 dzri ma tlhamuxela hi ndlela yini malulamiselo ya moya lawa Yehovha a hi nyikaka wone, nakone hi nga pfunekisa kuyini?

⁶ Ka wuprofeta byake, Yuwele a tizrise mintxhumu leyi tolovelekiki ya ku fana ni tinhleke, vhinyu ni mafuzra akuva a kombisa leswaku Yehovha, hi lizrandzru a hanana vhanu vake mintxhumu leyi va yi vilelaka ku patsra ni swakuda swa moya. (Yl. 2:21-24) A yentxa leswo hi ku tizrisa Bibele ni mabuku yezru lama seketeliwiki Bibeleni, pajina dzrezru dzra internet, mintlhanganu, masembleya ni makongresu. Masiku hinkwawu loko hi patsreka ka malulamiselo lawa hi ta va ni lihanyu ledzrinene hi tlhela hi tiyisiwa.

7. Xana i yini xi hi nyikaka ‘ku tsrhava ka timbilu’? (Ezaya 65:14)

⁷ Ku nyonxa ni ku yaneliseka. Malandzra ya Xikwembu Nkulukumba ma nga ‘yimbelela’ hikusa ma tlangela hinkwaswu leswi Yehovha a ma yentxelaka swone. (Dondzra Ezaya 65:14.) A mintiyiso leyi yi hi tiyisaka ni swidumbiso leswi hi txhavelelaka leswi nga Zritwini dzra Xikwembu Nkulukumba kun’we ni ku lavisela loku tiyiki loku seketeliwiki ka xitizrulo xa Kriste, swi hi yentxa hi ‘tsrhava’. Ku bula hi mintxhumu leyi ni vamakwezru va moya swi hi nyika ku nyonxa ka ntiyiso!—Amaps. 34:8; 133:1-3.

8. He wani matsrhamela mabidzri ya lisima ya vhanu lava nga ka paradeyisi dzra moya?

⁸ A vhanu va Yehovha lava nga paradeyisini dzra moya va ni lizrandzru ni wumun’we. A ku “twanana” loko ku hi yentxa hi twisisa ndlela leyi wutomi byi taka va xiswone a misaveni leyimpshwa, lani vhanu va Yehovha va  taka kombisana lizrandzru ni wumun’we hi lani ku yengetelekiki ku tlula namunhla. (Kol. 3:14) Makwezru wa kukazri wa xisati a hi byela leswi a swi xiyisisiki loko a vona vamakwezru hi khambi dzra ku sungula. Yene a li: “A ni nga nyonxanga a wuton’wini byanga nambi a ndangwini wanga. Khambi dzra ku sungula ni voniki vhanu va kombisana lizrandzru dzra ntiyiso, ku ve loko ni tive Timboni ta Yehovha.” Lweyi a djulaka ku nyonxa kumbe ku yaneliseka a fanela ku va ka paradeyisi dzrezru dzra moya. Swi nge na mhaka leswi vhanu va swi yanakanyaka mayelanu ni vhanu va Yehovha, vone va ni vito ledzrinene ka Yehovha ni ka hinkwavu lava mu gandzrelaka.—Eza. 65:15.

9. Xana a buku dzra Ezaya 65:16, 17 dzri hi dumbisa yini mayelanu ni swikazratu leswi hi kumanaka na swone?

⁹ A va vileli nakone va zrulile. A buku dzra Ezaya 65:14 dzri li lava nga handle ka paradeyisi dzra moya va ta ‘bandlukana hi ku vaviseka ka timbilu tavu [nakone] va ta bongosa hi ku xaniseka ka mimoya yavu’. Kambe, ku ta yentxeka yini hi mintxhumu hinkwayu leyi xanisaka vhanu va Xikwembu Nkulukumba? A tinxanisa leto ‘a ti nge he dzrimukiwi, ti nga ka ti nga buyi a miyanakanywini ya [Xikwembu Nkulukumba]’. (Dondzra Ezaya 65:16, 17.) Yehovha a ta helisa swikazratu hinkwaswu nakone hi ku famba ka nkama a hi ge he ti dzrimuka ndlela leyi swi hi xanisiki ha yone.

10. Xana ha yini u tlangela hi ku hamba xiyenge xa nhlegeletanu ya Xikwembu Nkulukumba? (Tlhela u vona mufoto.)

¹⁰ Nambi hi swoswi, hi kuma ku zrula loko hi le mintlhanganwini yezru ya wukriste, lani hi kotaka ku dzrivala mintxhumu ya misava leyi, leyi hi hlatiyelisaka. Hi pfuna vamakwezru leswaku va kuma ku zrula loko hi kombisa lizrandzru, ku nyonxa, ku zrula, wunene ni ku nabyala ku nga matsrhamela ya moya wa Xikwembu Nkulukumba. (Gal. 5:22, 23) I tovoko dzrikulu kwezru ku hamba xiyenge xa nhlengeletanu ya Xikwembu Nkulukumba! Lava taka tama va va ka paradeyisi dzra moya va ta vona ku hetiseka hi ku helela ka xidumbiso xa “matilo lamampshwa ni misava leyimpshwa”.

11. Hi ku ya hi Ezaya 65:18, 19, xana paradeyisi ledzri Yehovha a dzri vumbiki dzri fanela ku hi khumba hi ndlela yini?

¹¹ Ku tlangela ni ku khumbeka. Ezaya a ya mahlweni a hi byela leswaku ha yini hi fanela ku ‘tsrhava ni ku tsrhavisisa’ a paradeyisini dzra moya. Paradeyisi ledzri dzra ku fanekisela dzri hambiwe ha Xikwembu Nkulukumba. (Dondzra Ezaya 65:18, 19.) Xileswo swa twala ku va Yehovha a hi tizrisa kuva hi byela vhanu leswaku va huma ka tinhlengeletanu ta misava leyi, va dondzra ntiyiso mayelanu na Yehovha ni  ku va pfuna leswaku va hamba xiyenge xa paradeyisi ledzri dzra ku fanekisela! Hi khumbeka swinene hi matovoko lawa hi nga na wone hi leswi hi nga ntiyisweni nakone leswo swi hi kutxa ku bulela van’wana ha wone.—Yer. 31:12.

12. Xana u titwa hi ndlela yini hi swidumbiso leswi nga ka Ezaya 65:20-24, nakone ha yini u titwa hi ndlela leyo?

¹² Leswi hi nga ka paradeyisi dzra moya hi ni ku lavisela nakone ha nyonxa ni ku tlangela. Kambe, akuva hi kuma leswo swo djula hi yanakanya hi leswi hi taka swi vona ni ku swi yentxa a misaveni leyimpshwa ya Xikwembu Nkulukumba! A Bibele dzri hi dumbisa leswi: ‘Kone ku nga vi na xin’wanana lexa ku hanya masiku ya ku hlawa, ni xiduhati lexi taka gomiseliwa masiku . . . Va ta yaka tiyindlu, va tsrhama ku tone; va byala mivinya va va va da ni mihandzru ya yone.’ ‘Va nga ka va nga tikazrateli mahala’; hikuva hi ta ‘tovokisiwa hi Yehovha’. Yene a hi dumbisa wutomi lebyi sizrelelekiki, lebyi nyonxisaka ni lebyi nga ni nkongometo. Na ‘va nga si na bandlukana’, yene a ta tiva xivileleko xa mun’wana ni mun’wana wavu ‘a ta xuzrisa ku navela ka mintxhumu leyi hanyaka hinkwayu’.—Eza. 65:20-24; Amaps. 145:16.

13. Xana buku dzra Ezaya 65:25 dzri tlhamuxela hi ndlela yini ku txintxa loku vhanu va ku yentxaka a wuton’wini byavu loko va sungula ku tizrela Yehovha?

¹³ A va na tihanyi nakone va sizrelelekile. Hi ku pfuniwa hi moya wa Xikwembu Nkulukumba, vhanu vanyingi lava a va ni tihanyi nakone a va nga dumbeki va hambe ku ntxintxa lokukulu a wuton’wini byavu. (Dondzra Ezaya 65:25.) Vone va tikazrate swinene akuva va tsrhika mahanyela ya ku biha lawa a va na wone. (Rom. 12:2; Efe. 4:22-24) I ntiyiso leswaku vhanu va Xikwembu Nkulukumba a va hetisekanga, xileswo hi ta tama hi phazama. Nambitanu, Yehovha a tlhanganise “vhanu va tinxaka hinkwatu” lava mu zrandzraka ni lava zrandzrananaka, mabindzru ya kone va ni ku zrula ni wumun’we. (Tit. 2:11) Ledzri i hlolana ledzri ngo hambiwaka ntsena hi Xikwembu Nkulukumba wa ntamu hinkwawu!

14. Xana a buku dzra Ezaya 65:25 dzri mu khumbise kuyini makwezru wa kukazri?

¹⁴ Xana swi nga koteka akuva mhunu a txintxa wumhunu byake hakunene? Yanakanya hi mfambu lowu. Mumpshwa wa kukazri lweyi a pfaleliwiki hi makhambi manyingi a djele na a ni 20 wa malembe, a a tikhoma hi ndlela ya ku biha nakone a a ni tihanyi. A pfaleliwe djele hi kola ka ku yiva movha, wukanganyisi ni swin’wana. A a swi zrandzra ku lwa minkama hinkwayu. Loko hi khambi dzra ku sungula a twe mintiyiso ya Bibele ni loko a sungula ku ya mintlhanganwini ya Timboni ta Yehovha, a tiyiseke leswaku a kume nkongometo a wuton’wini byake, ku nga ku tizrela Yehovha—a paradeyisini dzra moya. Ntsrhaku ka loko a ve Mboni ya Yehovha leyi babatisiwiki, a yanakanye hi ndlela leyi Ezaya 65:25 yi byi khumbiki ha yone wutomi byake. Yene a a tsrhike ku va mhunu wa tihanyi ku fana ni nghonyama kambe a va wa ku zrula ku fana ni hamba.

15. Ha yini hi djula ku zramba vhanu akuva va va na hine ka paradeyisi dzra moya, nakone hi swi yentxisa kuyini leswo?

¹⁵ A buku dzra Ezaya 65:13 dzri sungula hi mazritu lawa: ‘Hi leswo ke, Hosi Yehovha a hlaya swoleswo.’ Kutani a ndzrimana 25 yi gama hi mazritu lawa: ‘Ku hlaya Yehovha.’ Swidumbiso swake minkama hinkwayu swa hetiseka. (Eza. 55:10, 11) A paradeyisi dzra moya dzri kone swoswi. Yehovha a vumbe ndangu wa vagandzreli lava nga ni wumun’we hakakunene. Hi ku hamba xiyenge xa ndangu lowu hi titwa na hi zrulile swoswi nakone hi titwa na hi sizrelelekile ka misava leyi nga ni tihanyi. (Amaps. 72:7) Hi mhaka leyo, hi djula ku pfuna vhanu vanyingi kuva va va xiyenge xa ndangu lowu. Hi yentxa leswo hi ku va hi hlengela hi xitalu ka ntizro wa ku hamba vadondzrisiwa.—Mat. 28:19, 20.

 XANA HI NGA VA PFUNISA KUYINI VHANU VAN’WANA KUVA VA NGHENA KA PARADEYISI DZRA MOYA?

16. I yini lexi nga pfunaka vhanu akuva va nghena ka paradeyisi dzra moya?

¹⁶ Mun’wana ni mun’wana wezru a nga yentxa xa kukazri akuva a pfuna van’wana leswaku va nghena ka paradeyisi dzra moya. Akuva hi yentxa leswo hi fanela ku yetisela Yehovha. Yene a nga sindzrisi mhunu akuva a nghena ka nhlengeletanu yake na a nga swi djuli. A matsrhan’wini ya leswo, a ‘kokela’ vhanu kwake. (Yoh. 6:44; Yer. 31:3) Vhanu va timbilu letinene lava dondzraka hi matsrhamela lamanene ya Yehovha, a va kokela kwake hi ndlela ya ku hlamalisa. Hine ke, hi nga swi kotisa kuyini ku kokela vhanu ka paradeyisi dzra moya hi kola ka matsrhamela yezru lamanene?

17. Xana hi nga va pfunisa kuyini van’wana akuva va nghena ka paradeyisi dzra moya?

¹⁷ Yin’we ya tindlela ta ku pfuna vhanu akuva va nghena ka paradeyisi dzra moya i ku kombisa lizrandzru ni wunene ka vamakwezru. Hi djula leswaku, lava va ha ka ku sungula ku hlalela mintlhanganu ya bandla va titwa ku fana ni leswi lava a va nga li vapfumeli a Korinte wa khale va titwisiki xiswone loko va hlalela mintlhanganu hi khambi dzra ku sungula. Vone va te: “Kunene Xikwembu Nkulukumba a na n’wine.” (1 Kor. 14:24, 25; Zek. 8:23) Xileswo, hi djula ku tama hi yingiseta xitsratsriyo lexi liki: “Hanyisanani hi ku zrula.”—1 Tes. 5:13.

18. I yini lexi nga yentxaka vhanu va djula ku va ka nhlengeletanu yezru?

¹⁸ Minkama hinkwayu hi fanela ku vona vamakwezru swanga hi lani Yehovha a va vonaka ha kone. Hi yentxa leswo hi ku va lava hi lavisisaka matsrhamela yavu lamanene ku nga li swihoxo swavu leswi ku nga li khale swi taka hela. Hi nga swi kota ku lulamisa timhaka leti hi nga ha vaka na tone hi ndlela ya lizrandzru, hi ku va minkama hinkwayu hi ‘kombananana wumbilu, ntwelawusiwana,  hi dzrivalelana hi ku ntsrhunxeka’. (Efe. 4:32) Kutani vhanu lava na vone va djulaka ku kombisiwa lizrandzru ledzro va ta djula ku hamba xiyenge xa paradeyisi dzra moya. b

U NGA HUMI KA PARADEYISI DZRA MOYA

19. a) Hi lani swi kombisiwiki ha kone ka bokisi ledzri liki “ Va Humile Va Gama Va Tlhelela”, i yini leswi van’wana va swi hlayiki loko va tlhelele ka paradeyisi dzra moya? b) Xana hi fanela ku tiyimisela ku yentxa yini? (Tlhela u vona mufoto.)

¹⁹ Hi dzri tlangela ngopfu paradeyisi ledzri dzra moya! Dzri xonge ngopfu nakone dzri ni vagandzreli va Yehovha. Hi djula ku tama hi tlangela Yehovha hi kola ka paradeyisi ledzri a hi hambeliki dzrone. Lweyi a djulaka ku tiyisiwa, ku yaneliseka, ku sizreleleka, ni ku zrula a fanela ku nghena ka paradeyisi dzra moya nakone a nga txhuki a huma ku dzrone! Kambe hi fanela ku tivonela hikusa Sathana a djula ku hi kanganyisa akuva hi huma ka paradeyisi dzra moya. (1 Pet. 5:8; Mpful. 12:9) A hi fanelanga hi mu pfumelela leswaku yene a hlula. A hi tameni hi tizra hi nkhinkhi leswaku paradeyisi dzra moya dzri tama dzri xonga, dzri xwenga dzri tlhela dzri zrula.