Tsamba Kuna Tito 2:1-15
2 Mbwenye iwe pitiriza kulonga pinthu pyakuti pisabverana na cipfundziso cadidi.+
2 Amuna akukalamba asafunika akhale akulinganira mu pinthu pinacita iwo, akulemedzeka, andzeru zadidi, akuwanga mu cikhulupiro, aufuni kakamwe na akupirira.
3 Munjira ibodzi ene, akazi akukalamba asafunika kupangiza makhaliro anapasisa mbiri Mulungu, akhonde kulonga anango mwakuipa, akhonde kukhala mabitcu a vinyu, mbwenye akhale apfundzisi a pinthu pyadidi,
4 toera akwanise kuphedza* atsikana kuti afune amunawo, afune anawo,
5 akhale andzeru zadidi, a makhaliro akucena, aphate mwaphinga mabasa a panyumba,* akhale anthu adidi, pontho abvere amunawo,+ toera mafala a Mulungu akhonde kulongwa mwakuipa.
6 Munjira ibodzi ene, pitiriza kucenjeza aphale toera akhale anthu andzeru zadidi;+
7 mu pinthu pyonsene, pangiza kuti wathema kutowezerwa mʼmabasa adidi. Pfundzisa pinthu pyakulungama,* mbupangiza kuti uli na manyerezero akukola,+
8 mbuphatisira mafala adidi akuti nkhabe munthu anafuna kuasandika,+ toera apingizi apasike manyadzo, mbakhonda kuona cinthu toera kutilonga mwakuipa.+
9 Mabitcu asafunika kubvera ambuyawo mu pinthu pyonsene,+ awangisire toera kuakomeresa, akhonde kuatawira mwakuipa,
10 pontho akhonde kuabera,+ mbwenye apangize kuti athema kunyindirwa na ntima onsene, toera munjira zonsene iwo abalikise cipfundziso ca Mulungu, Mpulumusi wathu.+
11 Thangwi Mulungu apangiza kukoma ntima kwace kukulu, kunatsogolera anthu a mitundu yonsene toera kupulumuka.+
12 Kukoma ntima kweneku kusatipfundzisa toera tikhonde pinthu pyakuipa na pifuno pya dziko,+ mbatikhala na ndzeru zadidi mu umaso, tikhale anthu akulungama na akuperekeka kuna Mulungu pakati pa anthu a dziko ino,*+
13 mu ndzidzi unadikhira ife kukwanirisika kwa cidikhiro cathu cakutsandzayisa,+ angadzaonekera Mulungu wankulu na Mpulumusi wathu Yezu Kristu mu mbiri yawo.
14 Iye aperekeka thangwi ya ife+ toera atiombole*+ mu pinthu pyonsene pyakuipa, pontho toera acenese mbumba yakuti kwa iye ndi ninga cinthu cakufunika kakamwe, yaphinga mʼmabasa adidi.+
15 Pitiriza kupfundzisa pinthu pyenepi, ucenjeze,* pontho usandike na mphambvu zonsene.+ Leka kutawirisa kuti munthu akupwaze.
Pidzindikiro Pyapantsi
^ Peno: “kucenjeza; kupasa uphungu.”
^ Peno: “atsalakane nyumba zawo.”
^ Munjira inango: “Pfundzisa munjira yakucena.”
^ Peno: “anthu a mu ndzidzi uno.” Onani Mabvekero a Mafala Anango.
^ Peno: “atisudzule, atibuluse.”
^ Peno: “uwangise.”