Ên-ën. Hakango aye so ayeke na yâ ti angbene manuscrit afa so a changé atënë ti yâ ti Bible ape, atâa so a kiri a sû peko ni fani saki mingi na aye so ayeke buba bubango.

 A wara lani angbene manuscrit ti Bible saki mingi. Ambeni tënë so ayeke na yâ ti ambeni manuscrit ni amä terê ape, so aye ti fa so na sungo peko ni a-erreur ayeke dä. Mingi ni, a yeke gï akete kete ye, so achangé nda ti atënë ni ape. Me, a wara kamême ambeni kota kangbi na yâ ti amanuscrit ni; na bango ambeni kangbi ni, a zia ni dä na mbana angu mingi ti ba yâ ti atënë ti Bible. Zia e bâ ambeni tapande ni use:

1.   Na yâ ti ambeni ngbene traduction ti Bible, a wara tënë so na 1 Jean 5:7, a tene: “na yayu, Babâ ni, Tënë ni nga na yingo vulu: na ala ota kue ayeke oko.” Me, amanuscrit so zo alingbi ti zia bê ti lo dä afa so atënë ni so ayeke pëpe na yâ ti avrai mbeti ni so a sû ni lani. A zia ni dä na peko. a Tongaso, afini traduction ti Bible so zo alingbi ti sara confiance na ni, a zi atënë ni dä.

2.   Iri ti Nzapa asigi fani saki mingi na yâ ti angbene manuscrit ti Bible. Me, mingi ti atraduction ti Bible azia na place ti iri ni atitre tongana “Seigneur” wala “Nzapa.”

 Laso, a wara amanuscrit mingi so asara si ayeke facile ti wara a-erreur so. b Na hakango ambeti so, eskê atënë ti Bible laso ayeke na lege ni?

•   Wandara William Green atene na ndö ti mbage ti Mbeti ti Nzapa so a sû ândö na Hébreu so a iri ka ni “Ancien Testament”, lo tene: “E peut ti tene biani so mbeni ngbene mbeti so a sû atënë ni na lege ni tongana ni ayeke dä ape.”

•   Mbeni wandara ti Bible so iri ti lo ayeke Frederick Bruce asara mbeni tënë na ndö ti mbage ti Mbeti ti Nzapa so aChrétien asû ândö na Grec wala “Nouveau Testament,” lo tene: “Aye mingi afa polele so atënë ti Nouveau Testament ayeke tâ tënë ahon ambeni mbeti so azo asigi na ni, nga mbeni zo oko apeut ti dë kite ape so atënë ti yâ ni ayeke tâ na lege ni.”

•   Sir Frederic Kenyon, so azo ahinga lo mingi tongana mbeni wandara ti amanuscrit ti Bible, atene: “Mbeni zo apeut ti gbu Bible na maboko ti lo na lo tene sân mbeto wala sân gingo bê so Tënë ti Nzapa ayeke tâ tënë, nga lo fa ni na ahale ti angoi nde nde, me atënë ti yâ ni angbâ lakue na ngangu.”

•   A-Juif nga na aChrétien so asû peko ti Bible abata ambaï so afa akota siokpari so azo ti Nzapa asara lani c (Nombre 20:12; 2 Samuel 11:2-4; aGalate 2:11-14). Nga, ala bata ambage so a fâ ngbanga na ndö ti mara ti aJuif ndali ti kengo yanga ti ala nga so fango ye ti ala aluti na ndö ti ngobo ti azo (Osée 4:2; Malachie 2:8, 9; Matthieu 23:8, 9; 1 Jean 5:21). Na sungo peko ti ambaï so na lege ni, azo ti sungo peko ti Bible afa so ala yeke na confiance na Mbeti ti Nzapa nga ala bâ ni na nene ni mingi.

•   Eskê a yeke na lege ni ti pensé so Nzapa, so a sû Bible na gbe ti yingo ti lo, ayeke bata atënë ni lege ni ape? d (Ésaïe 40:8; 1 Pierre 1:24, 25). Kozo ni kue, ye so lo ye lani ayeke ti tene azo ti ândö nga na ti laso awara ye ti nzoni na lege ti Mbeti ti Nzapa (1 aCorinthien 10:11). Ti tâ tënë ni, “aye kue so a sû ândö giriri na yâ ti Mbeti ti Nzapa, a sû ni ti tene a fa ye na e, si na lege ti gbungo ngangu ti e nga na lege ti dengo bê so alondo na yâ ti Mbeti ti Nzapa e duti na beku.” (aRomain 15:4).

•   Jésus na adisciple ti lo asara lani kua na mbage ti Mbeti ti Nzapa so a sû ândö na Hébreu, sân ti tene ala gi bê ti ala wala a sû atënë ni na lege ni (Luc 4:16-21; Kusala 17:1-3).