Fani mingi na yâ ti kua ti lo ti fango tënë, Jésus afa nene ti sarango tere kete (Luc 14:8-11). Lo yeke na nzara mingi ti wara akoli na awali so ayeke sara na Nzapa na sarango tere ti ala kete. Me, ambeni na milieu ti azo ni ayeke akota zo ti sarango siokpari.

Ascribe na aFarizien abâ so atënë ti Jésus anzere na azo ni so, so ala bâ ala tongana asioni zo mingi so. Ala ayeke diko tënë na gbe ti go, ala tene: “Koli so ayeke yamba awasiokpari, na lo yeke te kobe na ala.” (Luc 15:2). Ascribe na aFarizien ayeke bâ tere ti ala kota na ala yeke bâ atanga ti azo tongana poussière ti gbe ti gere ti ala. Mbeni ye so afa so ala bâ azo ni so na nene ni ape ayeke so, amokonzi ni ayeke iri azo ni so na mbeni iri ti yanga ti Hébreu so ayeke ‛am ha·’aʹrets, so aye ti tene “azo ti kodro [ti sese]”.

Me ti Jésus, lo yeke ne azo ni so, lo yeke sara nzoni bê na ala nga lo yeke zia tere ti lo na place ti ala. Azo ni so, so a bâ ala tongana ambumbuse zo so, na so a yeke wara nga na popo ni azo so a hinga ala tongana azo so ayeke sara siokpari mingi so, ayeke na nzara mingi ti mä atënë ti Jésus. Tënë ti bê ti Jésus ayeke tongana nyen nga lo kiri tënë tongana nyen na awato ti lo so ayeke kasa lo ndali ti so lo yeke sara ye na nzoni bê na mbage ti azo ni so?

Kiringo tënë ti lo asigi polele na yâ ti mbeni pendere toli so lo mû, so akpa tere kete na ti so lo tene lani na Capernaüm (Matthieu 18:12-14). Jésus afa aye ni mo bâ mo tene aFarizien ni ayeke sara ye na lege ni nga ala yeke na tënë na li ti ala pëpe na popo ti ataba ti Nzapa. Na mbage, na yâ ti toli ni, lo fa azo so a bâ ala tongana ambumbuse zo tongana azo so agirisa. Lo tene:

“Zo wa na popo ti ala, tongana lo yeke na ataba 100, na oko ti ala agirisa, lo yeke zia pëpe atanga ni 99 na yâ ti benyama ti gue ti gi oko so agirisa juska lo wara lo? Tongana lo wara lo, lo yô lo na ndo ti go ti lo, na tere ti lo anzere. Tongana lo si na yanga-da, lo iri akamarade ti lo nga na avoizin, lo tene na ala: ‘Ala ga e sara ngia, ndali ti so mbi wara taba ti mbi so agirisa so awe.’”—Luc 15:4-6.

Nyen la Jésus aye ti tene na lege ti tapande ni so? Lo fa nda ni lo tene: “Mbi tene na ala so ngia ayeke duti ande mingi na yayu ndali ti wasiokpari oko so achangé bê ti lo ahon ti so ayeke dä ndali ti azo ti mbilimbili 99 so ayeke na bezoin ti changé bê ti ala ape.”—Luc 15:7.

Tënë ti Jésus na ndo ti tënë ti changengo bê so adoit ti son bê ti aFarizien ni. Ala bâ tere ti ala so ala yeke azo ti mbilimbili na ala bezoin pëpe ti changé bê ti ala. Na ambeni ngu so ahon lani, tongana ambeni wato ti Jésus akasa lo ndali ti so lo la lo te ye na azo ti rongo nginza ti impôt nga na awasiokpari, Jésus akiri tënë na ala lani atene: “Mbi ga ti iri azo ti mbilimbili pëpe, me awasiokpari.” (Marc 2:15-17). So aFarizien abâ ti ala so ala yeke na bezoin ti changé bê ti ala ape, ye so amû ngia oko ape na a-ange. Me, ngia ayeke na yayu tongana awasiokpari achangé bê ti ala biani.

Ti fa encore so tongana mbeni wasiokpari achangé bê ti lo kota ngia ayeke na yayu, Jésus akiri amû tapande ti mbeni ye so asi na yâ ti mbeni da, lo tene: “Wali wa, tongana lo yeke na alê ti nginza bale-oko ti drachme, na oko agirisa, lo yeke zia wâ na lampe pëpe na lo yeke balê yâ ti da ti lo ti gi ni nzoni juska ti tene lo wara ni? Na pekoni, tongana lo wara lê ti nginza ni, lo iri akamarade ti lo nga na avoizin, lo tene: ‘Ala ga e sara ngia, ndali ti so mbi wara lê ti nginza ti drachme so agirisa so awe.’”—Luc 15:8, 9.

Ye so Jésus aye ti fa na lege ti tapande so ague oko na ti so lo fa na lege ti tapande ti mbeni taba oko so agirisa so. Lo tene: “Legeoko nga, mbi tene na ala: Ngia ayeke na popo ti a-ange ti Nzapa ndali ti wasiokpari oko so achangé bê ti lo.”—Luc 15:10.

Tara ti gbu li na ndo ti ye so, tere ti a-ange kue ayeke nzere mingi tongana ala bâ mbeni wasiokpari achangé bê ti lo! Tënë so ayeke biani mbeni kota tënë ngbanga ti so tongana mbeni wasiokpari achangé bê ti lo na tongana lo yeke na popo ti azo so ayeke komande ande na yâ ti Royaume ti Nzapa, lo yeke duti ande na kota ndo na ndo ti a-ange! (1 aCorinthien 6:2, 3). Atâa so kue, kota bê asara nga a-ange ndali ni ape. Tongaso, nyen la e doit ti sara tongana mbeni wasiokpari achangé bê ti lo na lo kiri na mbage ti Nzapa?