María Isabel ayeke mbeni maseka-wali so ayeke mbeni nzoni wafango tënë na gbata ti San Bernardo, na Chili, na Amerika ti Mbongo. Lo na babâ na mama ti lo na yaya ti lo ti wali ayeke ambeni zo ti kete mara so a iri ni Mapuche. Ala kue na yâ ti sewa ni asara ngangu ti sara si mbeni fini congrégation ti yanga ti Mapuche abâ gigi, na a iri yanga ti kodoro ni so Mapudungun.

Na ngoi so a tene na ala so a yeke sara nga Matanga ti Dango Bê na kuâ ti Christ na yanga ti Mapudungun na a pete ambeti ti tisango ndo 2 000 na yanga ti kodoro ni so, a sara si María Isabel agbu li ti lo ti bâ tongana nyen la lo lingbi ti mû maboko ti kangbi ambeti so. Lo pensé na ndo ti aye so ambeni maseka so ayeke aTémoin asara ti wara lege ti fa tënë na amba ti ala ti klase nga na awafango mbeti na ala. Lo sara tënë na ndo ni na babâ na mama ti lo, na ala kue ayeda ti tene María Isabel agbu li ti lo na ndo ti mbeni ye so lo lingbi ti sara ti kangbi ambeti ti tisango ndo so na ekole. Nyen la lo leke ti sara?

Kozo ni, María Isabel ahunda na akota zo ti ekole ti lo ti mû lege na lo ti collé mbeni mbeti ti tisango ndo ni na yanga ti gbagba ti ekole ni. Ala yeda ti tene lo sara ni na ala gonda lo ndali ye so lo pensé ti sara so. Na mbeni ndapre na ngoi ti iringo a-élève, wayinda ti ekole ni asara même tënë ti tisango ndo so na yâ ti haut-parleur!

Na pekoni, María Isabel ahunda ti gue ti sara vizite na yâ ti aklase ni kue. Na ngoi so awafango mbeti ni ayeda, lo hunda na yâ ti aklase ni oko oko kue wala ambeni élève ni ayeke aMapuche. María Isabel atene: “Mbi pensé lani mbi tene mbi yeke wara peut-être a-élève 10 wala 15 so ayeke aMapuche na yâ ti ekole ni kue, me ala yeke gbani. Na nda ni mbi kangbi lani ambeti ti tisango ndo 150!”

Mbeni wali so abâ mbeti ti tisango ndo so na yanga ti gbagba ti ekole ni ahunda ti hinga zo so lo lingbi ti sara lisoro na lo na ndo ti Mémorial ni. Tara ti bâ tongana nyen la bê ti lo adö na ngoi so a gue na lo na mbage ti mbeni molenge-wali ti ngu bale-oko! María Isabel atene na ngia, lo tene: “Lo pensé fade na mbeni kota zo.” Na pekoni so María Isabel amû na lo mbeni mbeti ti tisango ndo ni na lo sara nduru tënë na lo na ndo ni, lo hunda adresse ti wali ni ti tene lo na babâ na mama ti lo ague asara vizite na wali ni ti fa na lo aye mingi na ndo ti Royaume ti Nzapa. Tere ti awafango tënë 20 so ayeke fa tënë na yanga ti Mapudungun anzere mingi na ngoi so ala bâ wali so na ambeni Mapuche 26 so asara nzara ti tënë ni aga na Mémorial. Groupe ti yanga ti Mapudungun ayeke fadeso mbeni congrégation so ayeke gue na li ni.

Atâa ngu ti mo ayeke oke, mo lingbi ti sara mara ye so molenge-wali so asara so ti tisa amba ti mo ti ekole wala ti place ti kua na Mémorial, wala ti ga ti mä mbeni diskur, wala na mbeni kota bungbi ti district? Ngbanga ti nyen mo gi pëpe na yâ ti ambeti ti e aye so aita asara so alingbi ti mû maboko na mo ti sara mara ti ye so? Sambela nga Jéhovah ti mû na mo yingo vulu ti lo ti mû maboko na mo ti wara ngangu ti sara tënë ti lo na azo (Luc 11:13). Tongana mo sara ni, mo nga kue mo lingbi ti wara anzoni ye dä mingi nga aye ni so ayeke mû ngangu na mo mingi.