QULLAAWU MAXAAFI giddo “faradi gaare” yine tirroonnihu hundi afii qaali duuchu dani faradi gaare kulannoha ikkara dandaanno. (Soq. 8:28, 29, 38) Ikkirono Itiyophiyu manchi gulufino faradi gaare olaho woy qolchanshote horoonsiˈnanni faradi gaare roortannota ikkitukki digattino. Hanni togo yineemmo gede assannonkeha mito korkaata laˈno.

Seeda gobba haˈrinohu kuni Itiyophiyu manchi lowo silxaane noosiho. Isi, “Itiyophiyu mootitte Hindeke yinannitera muli amaalaanchootinna woxese baalaho hajajaanchoho.” (Soq. 8:27) Xaa yannara noo Sudaanenna Gibitsenniti wodiidi gobba hakkawaro Itiyophiyu gobba widooti. Kuni manchi seeda doogo haˈrate mitte faradi gaare calla horoonsiˈrinoha ikka hoogara dandaanno; ikkirono isi seeda doogo haˈrate ikkanno uduunne hogophinoti dihuluullissannote. Umi xibbi diro, manna hogombanni faradi gaare giddo mite shoole goomma afidhinote; hattono umiido diwantinote. Soqqamaasinete Loosi maxaafi daafira kulannohu mittu maxaafi, “Togoo faradi gaare lowo uduunne hogophate, gulufe haˈranno mannira hattono seeda doogo haˈrate injiitinote” yiino.

Filiphoosi isiwa iilli woyite Itiyophiyu manchi nabbawanni no. Qullaawu Maxaafi, “Filiphoosino faradi gaarenniwa rahe mare, Itiyophiyu manchi himanaanchu Isayaasi maxaafa nabbawanna [macciishshinota]” kulanno. (Soq. 8:30) Tenne faradi gaare seekkinoonnihu sununni haˈrateeti. Tini faradi gaare sununni hadhannota ikkitino daafira Itiyophiyu manchira ofolle nabbawate injiitinosi; qoleno Filiphoosi tenne faradi gaare lekkatenni dode iilla dandiino.

Itiyophiyu manchi Filiphoosi “Faradi gaareˈya aanira giddite ane ledo ofolli” yiinosi. (Soq. 8:31) Qolchanshote horoonsiˈnanni faradi gaarera qolchantannori faradi gaare uurrite gantanno. Doogo haˈnanni faradi gaare kayinni ofollinanni base afidhinote; hakko daafira Itiyophiyunnihu mureessu manchiranna Filiphoosira ofoltanno bayichi noonsa.

Soqqamaasinete Looso fooliishsho 8te nooti qullaawu ayyaaninni borreessinoonni hedonna xagge leellishshanno garinni, muli barri kawa borruwankera Itiyophiyunnihu mureessu manchi gulufino faradi gaare leellishshanno misile biddi assinoonni; isi gulufinoti olaho woy qolchanshote horoonsiˈnannita shiima ikkitukki jawa faradi gaareeti.