WEDELLOOTAHO
9: Ayimmakki Afa
HATTO YAA MAYYAATE?
Ayimmakki suˈmakkinna danakki calla diˈˈikkitino. Hatteentenni harunsattohu amanyootu seeri, ammanattorinna akatikkino ayimmakki xawisanno. Addanko, mannaho leellannorino leellannokkirino mitteenni ate ayimma kulanno.
HASIISSANNOHU MAYIRAATI?
Ayimmakki seekkite afittoro, ammanoottore seekkite cuˈmiˈratto ikkinnina sammi yite darawokki hoode dihaˈratto.
“Duuchu manni suuqete uduunne suntanni kankichi gedeeti. Kankichu uddiˈranno uduunne doodha didandaanno; isira mannu doorella uddisiisanno.”—Adiriyani.
“Gara ikkinore assa qarra ikkitannoe woyite nafa hatto assa dandeemma gara rosoomma. Anera addu jaallaati yeemmari harunseemma amanyoote ayirrissannoreeti; togoo manniwa aana baxeemma.”—Koortinii.
QULLAAWU MAXAAFI BIDDISHSHA: “Wodaniˈne haarooˈmo ikkinnina tenne gobba [alame] mannita busha doogo hadhinoonte.”—Roomu Sokka 12:2.
MAA ASSA DANDIITINANNI?
Jawaantekkinna laanfekki hattono ammanoottore badde affe xa hiittoo manchootironna albillitte hiittoo mancho ikka hasiˈrattoro hedi. Aante noo xaˈmuwa xiinxallakki tennera kaaˈlitannohe.
Jawaantekki: Hiitti ogimmanna dandoo nooe? Danchu akatiˈya hiikkonneeti? (Lawishshaho: Barrisiˈrummokki iillate rosichi nooe? Aneneeto qeeˈleemmo? Chaachaaraho? Shaqqadoho?) Assanni noommohu danchu coyi maati?
KAAˈLITANNO AMAALE: Dancha akatakkinna jawaantekki badde afa qarra ikkitinohe? Hatto ikkiro, annakkinna amakki woy ammaˈnatto jaalakki jawaantekki maatironna hatto yee hedinohu mayiraatiro xaˈmi.
QULLAAWU MAXAAFI BIDDISHSHA: “Mittu mittunku umisi looso fonqole lao! Assino coyi dancha ikkiro, isonoo wolu manni ledo taashsha agure, umisi kuˈlannore afiˈranno.”—Galatiyu Sokka 6:4.
Laanfekki: Roore biddi assiˈra hasiissannoe akati hiikkonneeti? Bushare assate roore doogameemmohu hiittoo woyiteeti? Aneneeto roore qeeˈla hasiissannoehu hiittoo coyiraati?
QULLAAWU MAXAAFI BIDDISHSHA: “‘Cubbu dinonke’ yinummoro umonke dongeemmo; halaaluno giddonke dino.”—1 Yohaannisi 1:8.
Ammanootto coye: Galeemmo seeri hiittooho? Mayira? Maganu noota ammaneemmo? Noota ammaneemmo gede assinoeri maati? Taashsho xeˈinoreeti yeemmohu hiittoo coyeeti? Mayira? Albillitte ikkanno yee ammaneemmo coyi maa maati?
QULLAAWU MAXAAFI BIDDISHSHA: “Buuxe afa towattannohe; buuxa bushu coyiwiinni agartannohe.”—Lawishsha 2:11.
Kurino Lai
WEDELLU XAˈMANNOTE 10 XAˈMORA QOLLOONNI DAWARO
Isi Ani Ayeti?
Akattakki, jawaantekki, laanfekkinna mixokki badde afakki, mannu gara ikkinokkire assatto gede xixxiiwannohe yannara dancha doorsha doodhatto gede kaaˈlitannohe.
