MINAANNI minaamasi teesse heedhanno gede assa dandaannohu hiittoonniiti? Batinyu manni minaannihu qaru loosi minisi mannira maalaamittete hasiisannore shiqishate yee ammananno dagoomi giddo lophino. Ikkollana, maalaamittetenni qawaaxxiˈre heeˈrannohu mitu minaamuwira teese heeˈranni noohu gede ikke dimacciishshamannonsa; isinni waajjanni heeˈranno. Lawishshaho, Ispeenete gobbati Roosa yinanni mancho minaannise daafira togo yitino: “Isi gobba mannira dancha manchooti; mine kayinni kaajjadoho.” Nayijeeriyaho heedhannoti Joyi togo yite noore coyidhino: “Minaanniˈya ledo sumuu yoommakki coyi heeˈranno wote isi, ‘Ani minaannakki ikkummo geeshsha yeemmohere baala assa hasiissannohe’ yaannoe.”

Minaanni silxaanesi baxillunni horoonsiˈra dandaannohu ma garinniiti? Qoleno, minisi minaamasira teesse heedhannoha woy “fooliishshote bayicho” ikkannose gede maa assa dandaanno?—Ruuti 1:9, lekkaalliidi qaagiishsha.

Maganu minaannanna minaama taashshe laˈˈannoha ikkirono, Qullaawu Maxaafi lamunkura mini giddo addi addi qeechi noonsata kulanno. Roomu Sokka 7:2 mine assidhino mancho “minaannise higge” hunda noota kultanno. Duucha dirijjitta albisa ikke addi addi hajonsa qineessanno mancho shoontannonte gede, Maganu minaanni minaamasira umo ikkanno gede shoomino. (1 Qorontoosi 11:3) Minaanni mini giddo albisa ikke marraˈˈa hasiissannosi.

Minaanna, Maganu uyinohe silxaane horoonsiˈra hasiissannohehu hiittoonniiti? Qullaawu Maxaafi togo yaanno: “Minaannuwa, Kiristoosi songo baxinonna isonooto isera sayise uyinonte gede, kiˈneno minaamuwaˈne baxaˈne agurtinoonte.” (Efesooni 5:25) Ee, Yesuusi Kiristoosi seenne adhe egenninokkiha ikkirono, isi lawishshi dancha minaanna ikkatto gede kaaˈlannohe. Togo yineemmohu mayiraatiro hanni laˈno.

Yesuusi woloota sheshifachishino hattono duhansa shaashshino. Yesuusi gadadaaˈmitinorenna addi addi qarrinni duhu batiˈrinonsare baala togo yiino: “Anewa amme, . . . ani fooliishshiisheemmoˈnena.” (Maatewoosi 11:28, 29) Isi duuchanka wote mannu shetto tirino hattono ayyaanaamittetenni fooliishsho afidhanno gede assino. Konni daafira, batinyu manni Yesuusi duhansa shaashshannota huwate isiwa shiqansa dhagge assiˈnannita diˈˈikkitino.

 Minaanni Yesuusi lawishsha harunsa dandaanno gara. Minaamakkira duha shaashsha dandaatto doogga hedi. Mitu minaamuwira Roosara noosete gede hedo macciishshantannonsa; ise xissiisidhe togo yitino: “Minaanniˈya ashikarchosi gede asse laˈˈannoe.” Hagiirraame galte noosihu Kuweku kayinni togo yiino: “Duucha wote minaamaˈya duhase kaaˈla dandeemmo gara xaˈmeemmo. Baxeemmose daafira, duucha wote mini loosose umiˈyanni kaaˈleemmose.”

Yesuusi shaqqadohonna mararannoho. Mitte buxicho mancho 12 diro buutote xibbinni amadante shette heedhino. Ise Yesuusi maalale loosanno wolqa afiˈrinota macciishshituti, “Uddanosilla kisummaro, hureemma” yite heddu. Hatto yite hedase garaho. Ise Yesuusiwa shiqqe uddanosi handaara kissu gedensaanni, bayichonko hurtu. Mitu manni tini mancho seyattinohu gede asse hedinoha ikkara dandaanno; ikkirono Yesuusi ise mararsitannota ikkitinota huwatino. * Isi shaqqillunni togo yiinose: “Beettoˈya, . . . waadannohe dhibbikkinni fooliishshiˈri.” Isi ise saalfattanno gede diassino woy diboroorinose; qoleno, dhibbise waadannoha ikkinota huwatinota coyiˈrino. Konni garinni isi manna mararannoha ikkinota leellishino.—Marqoosi 5:25-34.

 Minaanni Yesuusi lawishsha harunsa dandaanno gara. Minaamakki hisattinokki wote, albinni roore shaqqado ikki; qolteno cinci. Isera macciishshaminore atera iillinohu gede assite hedate woˈnaali. Lawishshaho, Rikaardo togo yiino: “Minaamaˈya shiimurinni caaccaabbanni noota huwateemmo wote, roore hifachishannosere coyiˈreemmokki gede albinni roore qoropheemmo.”

Yesuusi rosaanosi ledo hasaawino. Yesuusi jaallasi ledo duuchare hasaawanno. Isi togo yiino: “Anniˈyawiinni macciishshoommo coye baalanka kuloommoˈne.” (Yohaannisi 15:15) Yesuusi hiincatenna huuccatto assiˈrate yee callisi sayisino yanna nooti dikaandannite. Ikkirono, isi duucha wote giddosi hedo baalanta rosaanosira kulanno. Jaddo loosinohu gede assine kiirre shinasira albaanni noo hashsha, isi “lowo geeshsha dadillinota” maaxikki kulinonsa. (Maatewoosi 26:38) Isi rosaanosi ikkitonni koffi yiino wote nafa, insa hasaawisa horonta diagurino.—Maatewoosi 26:40, 41.

Minaanni Yesuusi lawishsha harunsa dandaanno gara. Giddokki hedonna simmeetekki minaamakkira kulte ise ledo hasaawi. Minaama minaannise mannu noowa fulino wote hasaawa goolannoha ikke mine kayinni sammiima ikkeenna qarrantara dandiitanno. Aana yinanni mancho minaannise godowisi hedo kule hasaawisannose wote mayi macciishshamannosero kultino. Ise togo yitino: “Baxannoeti leeltannoe; qoleno isira muli jaalasi ikkoommata huwateemma.”

Minaamakki qaxxaasate yite cuqqo gibbooti. Mitte mancho togo yitino: “Minaanniˈya anera koffi yaanno wote, haammata barra dicoyishiishannoe. Hunoommari noohu gedenna mishamoommahu gede asse hedeemma gede assannoe.” Ediwiini kayinni Yesuusi lawishsha harunsate woˈnaalanno. Isi togo yiino: “Giirinoe coyi heeˈranno wote, bayichonko tumo diqoleemmo; ikkollana, lamunkura coyenke hasaawe tirate injiitannonke yanna haseemmo.”

Bitimaho qummi assiniti Joyi, minaannise Yihowa Farciˈraasine ledo Qullaawa Maxaafa xiinxalla jammari kawa woyyaawanni noota huwattino. Ise togo yitino: “Isi xa woyyaawino; qoleno Yesuusi lawishsha harunse shaqqado minaanna ikkate lowo geeshsha sharramanni no.” Lowo miliyoone ikkannohu adhamino manni konni garinni Qullaawa Maxaafa xiinxalle lowo horo afiˈrino. Atino Qullaawa Maxaafa xiinxallite horo afiˈra hasiˈratto? Woxe kaffaˈlittokki xiinxallissannohe gede Yihowa Farciˈraasine shiqqe xaˈma dandaatto.