Qullaawu Maxaafi Xoomu Daafira Mayyaanno?
Qullaawu Maxaafi mayyaanno?
Biˈree waro, mannu dancha giddonni xoomanno (qatumanno) woyite Maganu hagiidhanno. Gara ikkitinokki hedonni xoommanni xoomi kayinni Magano dihagiirsiisanno. Ikkirono, Qullaawu Maxaafi yannankera noo manna xoommeno xoontinoonteno diyaanno.
Qullaawu Maxaafi giddo kulloonni manni xoominohu mayiraati?
Maganu kaaˈlonna biddishsha hasiˈrate. Yerusaalame haˈrate kaino manni Maganu kaaˈlansara lowo geeshsha hasiˈrannota leellishate xoomino. (Izira 8:21-23) Phaawuloosinna Barnabaasino songote cimeeyye shoontu woyite saˈe saˈe xoontino.—Soqqamaasinete Looso 14:23.
Maganu fajjo illachishate. Yesuusi cuuamihu gedensaanni, uullate aani soqqanshosi yannara Maganu fajjo wonshanno gede isonooto qixxeessate 40 barra xoomino.—Luqaasi 4:1, 2.
Loossino cubbira aagintaawate woy maaro eate. Maganu ammanantinokkita Israeelete daga masaalaanchu Iyueeli widoonni togo yiino: “Coˈo yiino wodaninni, ita aga agurtine (woy, xoontine), wiˈlitinanninna raartinanni anewa higge!”—Iyueeli 2:12-15.
Cubbo Diwate Barra ayirrissanno woyite. Maganu Israeelete dagara uyino Seeri, Israeele diru dirunku Cubbo Diwate Barra ayirrissanno woyite xoontanno gede kulanno. a (Leewaawoota 16:29-31) Israeele togoo yannara xoomansa hasiissannote; korkaatuno hatto assansa guuntete xeˈne noonsarenna Maganu maaro hasiissannonsare ikkitinota qaagganno gede assitannonsa.
Mitu manni xoomannohu gara ikkinokki korkaati maati?
Mannaho leellamate yine. Yesuusi mittu manchi xoomanno woyite mannaho kula hasiissannosikkitanna xoominota isinna Maganu calla afa hasiissannota rosiisino.—Maatewoosi 6:16-18.
Keeraancho lawe leellate. Mittu manchi xoomino daafira calla amanyootunni woy ayyaanaamittetenni wole manna rooranno yaa diˈˈikkino.—Luqaasi 18:9-14.
Anfanni heeˈnenni cubbo loonse hakkonne kiisate. (Isayaasi 58:3, 4) Mittu manchi xoomasi Magano hagiirsiissannohu, hakku manchi hajajamannoha ikkirootinna loosino cubbira godowinta gaabbirooti.
Ammaˈnote woga wonshate yine. (Isayaasi 58:5-7) Mittu anni hagiidhannohu, beettisi mulla seera wonshate yee goowi alita baxeemmohe yiisiro ikkikkinni godowinta baxannosita leellishannoha ikkirooti; xooma lainohunni, Maganuno hattooti.
Kiristaanu xoomara hajanjoonni?
Dihajanjoonni. Maganu Israeelete daga Cubbo Diwate Barra xoontanno gede hajajino; ikkollana, maaro eanno manni cubbo Yesuusi gudise diwi gedensaanni tini gattino. (Ibiraawoota 9:24-26; 1 Pheexiroosi 3:18) Cubbo Diwate Barra ayirrisa Muse Seeri widira kiirantanno; Kiristaanu kayinni Muse Seerinni galannoha diˈˈikkino. (Roomu Sokka 10:4; Qolasiyaasi Sokka 2:13, 14) Konni daafira, mittu mittunku Kiristaanchi xoomannoronna teˈee umisi doodhanno.—Roomu Sokka 14:1-4.
Kiristaanu Magano magansiˈranno woyite qaru coyi xooma ikkinokkita huwatanno. Qullaawu Maxaafi kulanno garinni, xoomunna hagiirru xaadannokki coyeti. Addu ammanaano kayinni magansidhanno Magani Yihowa hagiirraamo ikkino daafira, magansidhannohu hagiirrunniiti.—1 Ximootewoosi 1:11; Rosiisaancho 3:12, 13; Galatiyu Sokka 5:22.
Batinyu manni Qullaawu Maxaafi xoomu daafira kulannore huwatino gari soˈrote
Soˈrote hedo: Yesuusi cuuamihu gedensaanni halalla 40 barra xoominota qaagate Kiristaanu xooma hasiissannonsa.
Halaale: Yesuusi togoo xoomi daafira uyino hajajo dino; qoleno hundi Kiristaani togoo xooma xoominota leellishshannoti Qullaawa Borro taje mittowano dino. b
Soˈrote hedo: Kiristaanu Yesuusi reyo qaagooshshi yannara xooma hasiissannonsa.
Halaale: Yesuusi rosaanosi reyosi qaagooshshe ayirrissanno woyite xoontanno gede dihajajino. (Luqaasi 22:14-18) Yesuusi isi reyanno woyite rosaanosi xoontannota coyiˈrinoha ikkirono, hatto yiinohu xoommanni gede hajajate ikkikkinni reyi gedensaanni ikkannore kulateetilla. (Maatewoosi 9:15) Qullaawu Maxaafi, hudiˈrino Kiristaani Yesuusi Reyo Qaagooshshe ayirrisara albaanni minensa ite daanno gede amaalanno.—1 Qorontoosi 11:33, 34.
a Maganu Israeelete daga Cubbo Diwate Barra ‘sagale ittannokki’ gede hajajino. (Leewaawoota 16:29, 31) Hatto yaa, xooma hasiissannonsa yaate. (Isayaasi 58:3) Hakko daafira, Kontemporarii Ingilishi Verzhini konne qummeeshsha, “Cubbiˈnera dadillitinoonnita leellishate sagale ittinoonte” yite tirtino.
b Niwu Kaatoliki Insayikilopiidiya yinanni maxaafi 40 barri xoomi dayino gara kulanni togo yaanno: “Umihu sasu sanira, Faasika ayirrinsara albaanni xoommanni xoomi mitte lamala disaˈˈanno; isinni roore anga mitto woy lame barralla xoommanni. . . . Shoyilluu barri xoomire mite yine qummi assinoonnihu Niiqiyu Songohu (325) ontikki seeri aanaati; ikkirono mitu egennaammi koye qummi assinoonnihu 40 barri xooma ikkinota diammantanno.”—Layinki Ittime, Gafa 8, qoola 468.
Kurino Lai
NINKE DAAFIRA
Hasaawinseemmohe Gede Kuˈli
Qullaawu Maxaafi xaˈmo hasaawa, woy Yihowa Farciˈraasine daafira ledde afa dandaatto.