Yesuusi mulla danchare asse saino mancho calla diˈˈikkino. Wolu aye manchinni roore alamete aana lowore soorrinoho. Hanni konni woroonni kulloonniri egennantinori xaggete egennaamminna borreessaano isi daafira yitinore laˈno:

 “Naaziretete Yesuusi . . . xaggete giddo lowo geeshsha ayirrado ikkinoti egennantinote.”—Herbert Joorji Weels, Ingilizennihu xaggete egennaami.

 “Xaa geeshsha uullate aana [Yesuusi] geeshsha mannu heeshsho soorrinohu wolu manchi dino; isi konni kaˈano mannu heeshsho soorrasi digattanno.”—Keneeti Iskaati Latuureti, Ameerikunnihu xaggete egennaaminna borreessaanchi.

 Yesuusi wolu aye manchinni roore mannu heeshsho soorra dandiinohu mayiraatiro Qullaawu Maxaafi xawise kulanno. Yesuusi muli jaallasi iso ayeti yitannoro xaˈminsa woyite, insa giddonni mittu togo yee halaale coyiˈrino: “Ati heeshshote Magani Beetto Kiristoosiiti.”—Maatewoosi 16:16.